اليوم المفروض يبدأ مهرجان كان، و أمس كان فيه عرض مجموعة شانيل ريزورت 2015. من سنتين أو أكثر كنت أكتب عن وش من المجموعة أعتقد أنه راح ينلبس بكان، و صراحة أعترف إنها دايم تكون أفشل تخمينات لي. هذي المرة ما راح أتكلم عن وش أتوقع من المجموعة ينلبس بالمهرجان (مع أني بانبسط لو انلبس شيء منها)، لكن باتكلم عن العرض لأنه لو كنتوا ما تعرفون، العرض كان بدبي.
هذا العرض يمكن أكثر عرض كنت متحمسة له بعد عرض دالاس (أيوه كنت متحمسة لدالاس أكثر، لأني كنت ودي أعرف كيف ممكن يسوس كارل مجموعة فيها تأثير أمريكي على شانيل). عرض دبي كنت متحمسة أعرف لو بيختار عارضات عربيات (ما أختار و لا وحدة)، و كيف الملابس بتكون.
أعترف إن دبي مو مدينة مفضلة عندي، علشان كذا كنت خايفة الملابس تكون بايخة. بعدين فكرت قلت لو تصير تشبه المجموعة اللي عرضت بأسطنبول (أعتقد بري فول 2011)، أظن بتكون حلوة هنا.
المجموعة ما صارت تشبه مجموعة أسطنبول، بس أعتقد إن جزء كبير منها كان حلو، أسوء شيء كان عندي شنطة البنزين، بعض الناس يعتقدون أنه قلة أدب لأن المنطقة فيها بترول، يسوي شنطة على شكل جيك بنزين (بالمناسبة دبي ما فيها بترول)، بس أنا شفت إنها قبيحة. فيه شنطة ثانية على شكل لؤلؤة، أعتقد إنها حلوة، و مناسبة للخليج، و شانيل بنفس الوقت.
بعض الملابس كان فيها طبعات شماغ أحمر (ما أعجبتني)، بس الجاكيت هذا (الأول يمين) اللي على شكل كوفية أعجبني كثير، مو كأنه تصميم رخيص، و بنفس الوقت فيه روح شانيل بقوة.
أعجبتني طبعات الهندسية/ إسلامية، أعجبني الفستان الأسود (من دون الشروال)، للي ما أنتبه الترتر على شكل أفق دبي، أختي ما أعجبها، بس أنا ما أشوف أنه واضح أو رخيص، يعني ممكن الواحد يحسب أنه شك عادي.
يمكن أكثر لوك مفضل عندي، هو اللوك اللي على جون، كامل، مع البنطلون اللي تحته، من جد ودي أشوفه (مه البنطلون ريد كاربيت) أعرف إن تيلدا سوينتين ما تلبس ترتر كثير، لكن أحسه بيكون مرة حلو عليها.
إذا شفتوا العرض، وش أكثر شيء عجبكم؟ و تشوفون فكرة إن المجموعة تشبه المنطقة؟ أو مالها علاقة؟
انا شفته بالانستقرام ماادري يمكن مب كلش كان واضح
ردحذفمثل هذي البدلة اللي على اليسار شفته عندك
بس عموما اول ماشفته تقززت .. حنا عندنا نقشات كثيرة غير فكرة القماش
ماادري وش احدد لهم بس هم شانيل يعني المفروض انهم درسوا البيئة اكثر وعطون شي حلو
"" مابقى الا يحطون شنطة فيها متفجرات من زود السطحيه *
خواتي يقولون أدافع، بس أنا ما أدافع، اللي يقرأ المدونة يعرف رأيي بكارل و بتصاميمه لشانيل، بعيد عن موضوع أنه ثقافتنا أعمق من اللي هو سواه، أنا معاك، روحي شوفي محلات الجلابيات بالخليج، و من دون مبالغة إنها أجمل بكثير من اللي سواه، أنا ما أنتظر منه أنه يتعمق بالثقافة، أصلا هو كله شغل تجاري، مو فن. أساسا كارل يصمم ستة مجموعات لشانيل بالسنة ما تقل الملابس فيها عن 60. و يشارك بتصميم أربع مجموعات لفندي، و له ماركة يصمم لها، و يصور، ويصمم تصميم داخلي، ما أبغى أقول: عشر صنايع و البخت ضايغ، بس أنا صدق ما أنتظر منه شيء خارق، هذا ما يعني إني عادي باشتري أي شيء منه، أصلا ما عندي شيء منه و لا أفكر، الشيء الوحيد اللي حاولت أكثر من مرة إني أشتريه، هو جاكيت، و لا حصلت الشيء اللي يناسبني.
حذفالمهم أعجبتني مرة فكرة شنطة متفجرات P:.
غير فكرة الشماغ*
ردحذف