يوم أنا صغيرة كانت القفازات هوسي، ما أتذكر وش اللي كان يعجبني فيها، بس أكيد إني ما عمري حصلت "قفازات أحلامي" (ما أتكلم عن قفازات البرد). حتى كنت أحلم إني أتزوج و أنا لابسة قفازات دانتيل. صراحة ما أعرف من وين كنت جايبة الفكرة، بس مشوها لي. (للي ما عرف إلى الآن، أسبوع الموضة بنيويورك لخريف و شتاء 2014 بدأ من أمس أو قبل أمس).
قبل لا أرجع لموضوع القفازات، تعرفون إني أحب أتكلم عن مصممين، على الأقل أنا ما أعرفهم قبل لأشوف عرض معين. أظن إن الموضوع يكون شوية فيه حماس، لما ألقى تصاميم حلوة، غير عن الممصممين اللي تقريبا ثلاثة أرباع الناس تعرفهم، لأنه بالعادة يكون عندهم شيء مختلف، مو ملزمين باسم الماركة لازم يحافظون على شكل معين للتصاميم. ما علينا من الكلام الفاضي. أمس شفت صور لمجموعة مصمم اسمه توم Tome، صراحة ما قد سمعت فيه قبل، و لاشفت له أي مجموعة قبل هذي، لكن أعجبني مرة شكل ملابسة مع القفازات، مو لأني كنت أحب القفازات (صراحة الحين ما أعرف وش فايدتها، و لا مين فكر فيها كإكسسوار؟!!). بس حسيت أنه خلاها عصرية، مو كأنها طالعة من فيلم تاريخي، أو من دار أوبيرا. الفستان الوردي اللي على اليسار مرة عجبني مع القفازات الحمراء، أتمنى أشوفه على أحد، بس عارفة أنه ما راح يلبس أو تلبس أي سلبريتي على الريد كاربيت قفازات (هذا احساسي).
ليست هناك تعليقات:
إرسال تعليق