أعتقد الشتاء صار شبه حقيقي بشمال الكرة الأرضية كامل. فأظن هذي فرصة كويسة إني أكتب عن شيء شتوي، أولا إذا ما قد قلت لكم قبل، يمكن مو لازم، بس ودي أقولكم إني أحب الشتاء أكثر من الصيف، على الأقل مو صيف السعودية، اللي أظن أبرد شتاء ما يخليني أشتاق له. أنا مو مرة مع لبس الشتاء، مو ما أحبه بس تعرفون إني أحب الملابس الخفيفة، لكن أكيد أحب الجاكيتات الحلوة.
الفترة اللي فاتت شفت أكثر من سليبرتي على الريد كاربيت، جاي بجاكيته (ما أعرف هذا تريند أو إيش؟) بس ما علينا، المهم الجاكيتات مع فساتين السهرة/كوكتيل عجبتني مرة، كل الثلاثة خيارات (أعرف بتقولون كيم كرداشيان هنا واااو). أولا خلوني أوضح أنه أحس لبس كيم فيه لون ماسترد كثير (مو شين بس أحس أنه كثيرة بالنسبة لذوقي) لكنه أعجب أختي، و لأني أعتقد أنه ذوقها حلو، و مادام أعجبها فأكيد بيعجب ناس ثانين غيرها أخترته مع القصة حقت الجاكيتات (و أخيرا خلصنا من شرح موضوع كيم)، المهم أعجبني مرة شكل جاكيتها مع لبسها (الشكل مو اللون)، بعد أعجبني الجاكيت الفرو الأخضر اللي لابسته بلايك مع هذا الفستان اللي فيه تأثير اللانجري، أحسه مع المكياج و المجوهرات أعط اللبس فخامة مرة (أحس أنه لبسها بيدخل قائمة أحسن لبس لشهر ديسمبر، وش رأيكم أنتم؟).
آخر وحدة هي أليكسا شونق، مع جاكيتها اللي فيه شكل الخياطة الرجالية، أعجبني شكله مع الفستان الأبيض القصير (أعجبني أنه أطول من الفستان)، أظن أنه أعطى شكل للفستان أكثر من لما صورت من دونه، طبعا بالنسبة لي ما أقدر أنكر الدور اللي لعبه الروج الأحمر على هذا اللبس و خلاه مرة أنيق.
أنتم وش رأيكم بجاكيت مع فستان فخم (خصوصا لحفلة خارجية)؟ و إيش شكل الجاكيت/بالطو المفضل عندكم بين هذي الثلاثة.
ليست هناك تعليقات:
إرسال تعليق