الاثنين، 22 يوليو 2013

Unisex Wardrobe

قلت أكثر من مرة إني مو مهتمة بملابس الرجال. أحب أشوفها، و أقلبها بالمحلات، بس مو مهتمة أتابع العروض، لأني لا أنا مهتمة، و لا أظن فيه أحد يقرأ هذي المدونة مهتم (لو فيه أحد مهتم قولوا لي). المهم، كوني مو مهتمة، هذا ما يمنع إني لو شفت شيء مثير لملابس رجالية ما أدور عليها أو أقلب فيها. 
أكثر من مرة (بالصدفة) شفت عروض لمصمم أسمه أوميت بينان (هو مصمم ملابس رجالية تركي). كل العروض اللي شفتها بالصدفة ما فيها أي شيء تركي. أمس، شفت صور صغيرة لعرضه، و انتبهت أنه فيه طرابيش فقررت أشوف العرض كامل (جذبتني الطرابيش)، بغيت أشوف كيف منسق الطرابيش مع اللبس. 



أولا خلونا نتجاهل الأقنعة (لأنها شخصيا خوفتني)، و اكتشفت لما كبرت الصور أنه الطرابيش مو صدقية بس هي جزء من القناع (اللي خوفني). العرض المفترض أنه من عروض ربيع 2014 (مع أنه طريقة اللبس و الديكور ما يوحي)، لكن ما يهم، اللي يهم إني حبيت أغلب الملابس، صحيح هي ملابس رجالية، بس بالنسبة لي حسيتها أكثر مجموعة قد شفتها "يونيسيكس". ما أعرف الملابس النسائية صار فيها كثير قصات رجالية أو العكس، لكن أظن هذي المجموعة (بالنسبة لي) ممكن ألبسها ببساطة من دون ما أحس إني لابسة لبس رجالي (خصوصا اللوك الثالث من اليمين عجبني مرة) و بنفس الوقت لو شفتها على أي رجل ما أعتقد أنه فيها أي جانب نسائي. 

ما أعرف إذا كان بينان حاط بباله هذا الشيء لما صمم المجموعة، لكن الشيء اللي جا ببالي، هل ممكن بالمستقبل تتحول كل الملابس "يونيسيكس"، شخصيا أحب الملابس هذي، بنفس الوقت أحب فساتيني، اللي ما أعتقد فيه رجل بيحب يلبسها P:. 

أنتم وش رأيكم بفكرة ملابس تنفع لكل الجنسين بنفس الوقت؟