الجمعة، 8 مارس، 2013

Bath Time

بأعرف كثير عملية الاستحمام لهم مو أكثر من مسألة نظافة، لكن بالنسبة لي هي أكثر من كذا، هي لغير النظافة، فرصة للإسترخاء و الابتعاد عن أي شيء ثاني بالحياة. خصوصا بعد التعب اللي تعب اللي تعبته و أنا أغطي أسابيع الموضة (هذا و أنا ما تحركت من مكاني). علشان كذا الاستحمام أو الباث فرصة لي علشان أتصرف كأنه الدنيا موقفة و لا شيء جالس يصير برا حدود الحمام، هذا اللي يخليني أقدر البانيو، و أقدر أي شيء بيساعدني إني أريح رآسي و جسمي الوقت هذا. 


صراحة ما عندي روتين معين للحمام أو للباث، أهم شيء عندي بالأشياء اللي استخدمه طبعا غير إنه ما تإذين، إن ريحته حلوة (وش أحسن شعور من إنك بعد ما تطلع من الحمام تحس بكل الروايح الحلوة تفوح منك). 
من الأشياء القليلة اللي رجعت و شريته نفسه هو هذا الجيل شاور من لوش بريحة العشب (أعرف إن الاسم ما يشجع، لكن صدقوني بعد ما تحطونه ريحته مره حلوة). شيء ثاني ثابت هو قفاز الصنفرة أو التقشير، إلي بالنسبة لي شيء أساسي بالحمام. 
بصراحة من أكثر الأشياء اللي حمستني إني أكتب هذا الموضوع هي الشمعة، قلت لكم قبل إني ما أعرف كثير عن الشموع، لكن لأنه تجيني إيميلات من بودي آند باث ووركز و كان فيه عروض على شموع الربيع (من الأشياء اللي عرفتها إن الشموع عندهم موسمية). و لأني زي ما قلت لكم أعجبتني شمعتهم فقررت الجايات كلها منهم (إلا إذا عرفت شيء أحسن) و رغم أنه ما خلصت الشمعة إلى الآن مع أنه حجمها صغير (ما أشغلها كل يوم) بس بقى فيها قليل. قلت لكم إني لما قريت أسماء الشموع حقات الربيع خفت تروح و لا تعجبني الروايح اللي بعدها (ما عجبتني روايح الخريف و الشتاء)، فقررت إني أشتري هذي الشمعة اللي اسمها بيتش كابانا. 

السكرب اللي من بودي شوب ريحته مرة حلوة "بزبدة الشيا" من زمان كنت استخدم الكاكاو، لكن هذي بالنسبة لي أحلى. بصراحة ما أشرب إيريل قراي، لكن أشرب شاهي أخضر مع النعناع من توايننقز (بس ما لقيت له صورة) بس إيريل قراي لذيذ بعد. 

الزيت هذا استخدمه بعد ما أخلص من الشاور أو الباث. الماركة هذي عندهم منتجات مرة كويسة، و أسعارهم رخيصة، أول شيء جربته منهم هو هذا الكريم بس جربت زي الكريم شيء زي الأصبع لكن ما عجبني، لكن هذا الزيت عجبني، مرة خفيف و ريحته حلوة، و أهم شيء أنه يرطب. 

آخر شيء هذا الشيء الأسود (اللي بعد شكله يخوف) هو زبدة مع حبوب من لوش، يرطب و يسوي صنفرة (خفيفة) بنفس الوقت و أهم شيء ريحته مرة حلوة (ما أظن راح أشتريه مرة ثانية مع أنه عجبني بس يحتاج أفرك البانيو بعد كل استخدام و أنا عجازة). 

إذا كنتم تحبون تسترخون بالحمام، وشو الأشياء اللي تحبون تستخدمونها؟