البوست اليوم برعاية أختي، صحيح أنا اللي جالسة أكتبه الحين، بس هو كان رغبتها بالأساس، و لما قالت لي عن الفكرة، طلبت منها على الأقل تجمع لي الصور علشان أكتب موضوع عن "ستايل مايلي سايروس".
مو لأنها هي اللي طلبته خليتها تجيب لي الصور، لكن لأني ما أميل لستايلها، (بس هي تحبه) كانت فكرتي هي لازم تختار وش الأشياء اللي تحبها فيه.
(بالمناسبة أنا ما أكرهه) لكن مو هو الشيء اللي ممكن ألبس زيه.
أولا للحق أختي جمعت لي صور كثيرة، بس كان لازم أختار منها، علشان المساحة أولا، و ثانيا علشان يصير عندي فكرة عن وش بالضبط أحتاج أكتب عنه. إذا كنت راح أوصف ستايلها من الصور اللي قدامي فهو شوي روك شوي "سلاتي" (وش أسوي هي تحب الأشياء المفتحة و المشققة)، و بعض المرات تدخل عليه شيء بوهو.
قلت لكم إني ما أكره طريقة لبسها، خصوصا لبس كل يوم، (ما أحب أبدا شكلها بالمناسبات، يطلع شكلها رخيص و جفس). لكن يمكن قضيتي معاه أنه مو لكل أحد، يعني لازم عمر معين، جسم معين، و يمكن شخصية معينة بعد.
غير الكلام قررت إني أسوي سيت لستايل مايلي، كل الأشياء كانت من my wardrobe (أظن إنه من أوائل المواقع اللي شريت منها) و الحين يحطون السعر بالريال، فما يحتاج تشيلين هم التحويل :). الأشياء مو رخيصة، كلها من التشكيلات الجديدة لخريف 2013، لكن أعتقد أنه لو كانت تحبين ستايل مايلي، أو ما تقدرين على أسعار كل هذي الأشياء، أظن لو شيء واحد من السيت يستاهل أنك تجربينه.
الكنزة المشققة هذي من ماك كيو. و لأن مايلي من الفريق اللي يلبس ليقينق كثير أخترنا لها ليقينق، و لأني حابة هذي الجزم من زمان، لقيت فرصة إني أحطها بموضوع، آخر شيء العقد، ما أعرف ليه أحسه أكثر شيء ممكن فعلا أشوف مايلي فيه.
شرايكم بستايل مايلي؟ و ببالكم أحد أو شيء حابين نتكلم عنه؟
ليست هناك تعليقات:
إرسال تعليق