الجمعة، 2 مارس 2012

Fur Vest

جآني سؤال عن كيف ينلبس الجاليه الفرو ... أولا بالنسبة لي أكثر قطعة فرو مناسبة لجونا هي الجالية، يعني إذا كان خاطرك بفرو، و لأن الجو هنا مو بارد لدرجة يستاهل إننا نلبس جاكيت فرو، فالجاليه بيكون خيار جدا مناسب. 


(من اليمين: ألبيرتا فيراتي، مايكل كورس، باند أوف أوتسايديرز، أوسكار دي لا رينتا)

الشيء اللي خلاني أكتب عن هذ الشيء (الجاليه الفرو)، مو بس السؤال، لكن لأني بغيت أكتب عنه قبل لا يحتر الجو مرة (ما أتوقع يبرد من جديد خلاص دخل مارس)، و الأهم أنه بعروض الموضة لخريف 2012 يعني للشتاء الجاي، تقريبا الفرو موجود بكل عرض، بكل شكل، من شال لقبات، لجاكيتات، و أكيد جاليه. 

أول ما قريت السؤال بصراحة ما جا ببالي إلا طريقة وحدة للبس الجاليه، و لا أعرف ليه ببالي دائما مرتبطة صورة الجاليه الفرو بالسبعينات. كل الفكرتين اللي جو ببالي كانوا سبعينات بوهو ... الأولى جاليه فرو مع بنطلون جينز فلير، و قميص مطبع عليه بألوان باهتة، و الثاني فستان مطبع عليه (أقرب فكرة هي لوك باند أوف أوتسايديرز). لكن تذكرت إن العروض كانت مليانه فرو، فقررت إني أناظر أفكار ثانية و أجيبها لكم. 

ما أعرف ليه، مع إني ما راح ألبس جاليه فرو بهذا الشكل، لكن أظن اللوك اللي من ألبيرتا فيراتي، هو أكثر لوك ممكن يصلح على مجموعة كبيرة من الناس ... فستان أو تنورة بنسيل، جاليه فرو مع حزام و تايت و كعب من دون أي تعقيدات، حبيت هذي الفكرة لأن ما فيها تعقيدات، سهلة، و تصلح على أجسام كثيرة، خصوصا أنه الفرو يغطي على مناطق كثيرة (لو كنت مو مرتاحة تطلعينها)، و الشيء الثاني الحزام يعطي شكل لجسمك و لا يصير كأنه كتلة وحدة. 

للي يسأل عن كيف يلبس جاليه الفرو، هذي مجموعة أفكار، جربي وشوفي وشو اللي ترتاحين له، وش يناسب ذوقك و جسمك.