From Mexico with Love

اليوم كان اليوم الأول من أسبوع ميلانو، و من أول العروض كالعادة قوتشي، عرض قوتشي كان فيه موضوع "الملابس الرياضية من جديد" بعد كان فيه عرض الماركة اللي أحب No. 21 ما أعرف إذا قلت لكم هذا الكلام من قبل أو لا،  بس لو كان فيه خيار إني ما ألبس إلا من ماركة وحدة، كان يمكن اخترت No. 21. ما علينا عرضهم كان حلو، بس ما أعتقد أنه كان فيه شيء يخليني أكتب عنه. العرض اللي أول ما شفت أول صور عرفت إني أبغى أكتب عنه هو ألبيرتا فيراتي

أول ما شفت الصور على طول حسيت إنه الملابس مكسيكية (على الأقل من منطقة يوكتان) ما أعرف إذا بكل المكسيك يلبسون كذا لكن اللي أعرفه إني من زمان و أنا أحب اللبس المكسيكي (مرة سويت سيت عن فريدا كالو). المهم غير الورود الوفساتين البيضاء حبيت القميص الكروبيد (يمين تحت) أحسه مرة أنيق (ما أتذكر شفت شيء يشيه له قبل). لكن أكثر شيء حبيته هو اللوك اللي بالوسط، بصراحة ما أتذكر متى آخر مرة تمنيت إني ألبس أحمر (الأحمر مو لوني أحبه روج، بس قليل مرة أختاره لبس) ما علينا من المعلومة الجانبية هذي، حبيت الجاكيت، حبيت التنورة، أبغى الحين أشوفها على أحد ودي أسوي الحين حفلة و أعزم أجاك دينق، و أخيها تلبسه (اللي ما يعرف أجاك هي عارضة من جنوب السودان) . 

Fur Vest

جآني سؤال عن كيف ينلبس الجاليه الفرو ... أولا بالنسبة لي أكثر قطعة فرو مناسبة لجونا هي الجالية، يعني إذا كان خاطرك بفرو، و لأن الجو هنا مو بارد لدرجة يستاهل إننا نلبس جاكيت فرو، فالجاليه بيكون خيار جدا مناسب. 

(من اليمين: ألبيرتا فيراتي، مايكل كورس، باند أوف أوتسايديرز، أوسكار دي لا رينتا)

الشيء اللي خلاني أكتب عن هذ الشيء (الجاليه الفرو)، مو بس السؤال، لكن لأني بغيت أكتب عنه قبل لا يحتر الجو مرة (ما أتوقع يبرد من جديد خلاص دخل مارس)، و الأهم أنه بعروض الموضة لخريف 2012 يعني للشتاء الجاي، تقريبا الفرو موجود بكل عرض، بكل شكل، من شال لقبات، لجاكيتات، و أكيد جاليه. 

أول ما قريت السؤال بصراحة ما جا ببالي إلا طريقة وحدة للبس الجاليه، و لا أعرف ليه ببالي دائما مرتبطة صورة الجاليه الفرو بالسبعينات. كل الفكرتين اللي جو ببالي كانوا سبعينات بوهو ... الأولى جاليه فرو مع بنطلون جينز فلير، و قميص مطبع عليه بألوان باهتة، و الثاني فستان مطبع عليه (أقرب فكرة هي لوك باند أوف أوتسايديرز). لكن تذكرت إن العروض كانت مليانه فرو، فقررت إني أناظر أفكار ثانية و أجيبها لكم. 

ما أعرف ليه، مع إني ما راح ألبس جاليه فرو بهذا الشكل، لكن أظن اللوك اللي من ألبيرتا فيراتي، هو أكثر لوك ممكن يصلح على مجموعة كبيرة من الناس ... فستان أو تنورة بنسيل، جاليه فرو مع حزام و تايت و كعب من دون أي تعقيدات، حبيت هذي الفكرة لأن ما فيها تعقيدات، سهلة، و تصلح على أجسام كثيرة، خصوصا أنه الفرو يغطي على مناطق كثيرة (لو كنت مو مرتاحة تطلعينها)، و الشيء الثاني الحزام يعطي شكل لجسمك و لا يصير كأنه كتلة وحدة. 

للي يسأل عن كيف يلبس جاليه الفرو، هذي مجموعة أفكار، جربي وشوفي وشو اللي ترتاحين له، وش يناسب ذوقك و جسمك.