Natalia Obsession

من فترة و أنا مأخوذة بنتاليا فوديانوفا ... مو بس لأنها حلوة، لأنها تطلع بأكثر المناسبات فخامة، بأفخم الملابس بشعر وجه مو متكلف، قبل فترة جربت لبس يمكن ألبسه لو أولاد عمي سوو زواج، و طبعا كان شعري شعر بيت، حبيت فكرة إني أترك شعري على طريقة نتاليا من دون تعب، و طبيعي.

أعترف إني بتزيين نفسي فاشلة (الشعر و المايك آب)، بس هذا ما يعني إني ما أقلب، و أشوف كيف العالم تسوي، يعني بالمايك آب أهون شوي، أقدر أسوي لنفسي مايك آب بسيط، بس رسم عيون فاشلة بقوة.

الشعر حكاية ثانية، أحمد ربي أنه شعري صح مو أحلى شعر بالعالم، بس ما يتعبني، من كثر ما أنا كارثية بتزيين الشعر، إذا اشتهيت استشوار، أستشور شعري قطعة وحدة من دون تقسيم من دون تعب :)

الحمد لله عندي أختي بالمناسبات الكبيرة، تساعدني بموضوع الشعر و رسم العين، و الباقي أنا أتكفل فيه P:.

دائما ما كان بخاطري إني أعرف كيف السلبرتيز يسوون شعورهم ويفز حلوه، طبيعية و مرتبة، و لا أعرف كيف، لأني أعرف أنه الفير يخلي الشعر كورلي بشكل مصطنع، و لا هو حلو، و لازم تتركين شعرك مدة طويلة من دون سبري و تلفين راسك علشان يهبط.

المهم، و أنا أفتش باليوتيوب، لقيت كثير ناس يسوون شعورهم بالفلات أيرون، و قد جربت فيني أختي طلع مرة حلو. ميزته أنه ممكن تتحكمين بكبر الويفز و حجمه و شكله و أشياء كثيرة ... قلت لكم أنا ما أعرف كثير بالشعر بس هي اللي سوته لي.

بعد من النت زي أي شيء ثاني عرفت أنه الأيرون السيراميك هو أحسن أنواع الأيرون، ما يكون حار مره على الشعر، و لا يحرقه، و سهل مرة التعامل معاه.

قبل أسبوعين أو شيء زي كذا (ما نيب فالحة بالتوقيتات) صديقتي أختي طلبت من أختي إني أطلب لها من الإنترنت فلات أيرون سيراميك، و أختارت ماركة، بعد زي ما قلت أنا ما أعرف عنها شيء إسمها أميكا ... لما دخلت موقعهم، عجبتني أشكال الآيرون اللي عندهم، مو سوداء، فيها ألوان و نقشات، البنت أختارت هذا اللي عليه نقشات كأنها تاتو بس فيه أشكال كثيرة، دانتيل و حيوانات و قرافيتي. المهم البنت استخدمت الآيرون لما وصل عجبها كثير خصوصا أنه مو عريض، يعني أنه يسهل فيه التسريح، مو زي لو كان عريض.

قبل لا أخلص ... هذا فيديو عجبني لكيف تسوين الشعر ويفي باستخدام الفلات آيرون، و يشبه كثير شعر نتاليا.