If I had a little money & colder winter

أعرف أنه ما فيه شي أبعد من الشتاء عننا الحين، و لا فيه شي أبعد من شتاء يخليك تفكر أساسا ببالطو، لأنه البرد البرد عندنا يومين تلفف فيها بأقرب بطنية أو فروة و خلصنا، يعني مو مستاهلة إنك تشتري علشانها لا قدر الله (بالطو) يعني بتصير شوي مسخرة :) بس هذا ما يعني أني ما أحلم إني ألبسها، خصوصا لما تكون كل المواقع ما تعرض إلا أشياء زي كذا، يعني عالم ناسية أنه مو كل العالم يجيهم برد صدقي P: ...

بالنسبة لي لما نجي للجاكيتات و البالطوات على الأقل بهذا الخريف، ما فيه أحد زي اليريطانيين، بوربري، ستيلا ... إيرديم، و أنتم ماشين ... صحيح لما كان إسبوع الموضة بفبراير عجبتني هذي العباية من إيرديم ... و إلى الآن تعجبني، و الي مهتم و عنده فلوس يبغاها له أو لي :) تراها موجودة عند luisaviaroma.com ب 4025 يورو يالله و أنتم عليكم الحساب ...

قلت لكم إني ببالي شي زيتي للشتاء ... البالطو هذا الي من بوربري يمثل كل شي ودي فيه للبس الشتاء ... الون أهم شي ... الحجم، الأزارير الذهبية ... و حتى الفرو الأسود الي تحت ...

أساسا مجموعة الخريف هذي السنة لبوربري برورسم و بوربري مليانه هذي الجاكيتات و البالطوات الي يسمونها military، عاجبتني مرة أحس إني لو ألبسها بيصير شكلي كأني طالعة من فيلم عن الحرب العالمية ... لونها، طولها، شكلها كله حلو يخليني أتمني صدق لو أنه عندي برد و أهم شي فلوس كثيرة تحليني أفسق و أشتري شي زي كذا :)

بشكل عام الحلو بجاكيتات هذي السنة، إنها مو محددة بعمر معين، قصدي أنه لو تشوفها بتحس أنها تصلح للسنة هذي، و للسنة الجاية، و حتى ل 60 سنة فاتت (ما أقدر أقولكم و بعد 60 سنة جاية) :)

إن شاء الله في حلقة قادمة نكتب لكم كيف تحولون جاكيت سعره معقول لميلتري، بس ما ودي أطول ... لأنه باقي كلام كثير، و لأنه بعد Picasa خرب من جديد و أنا ودي أوريكم صور من فوق باريس :)