مرة ثانية ترجع ريم و تكتب عن الويكيند الثاني و الأخير لكوتشيلا هذي السنة. و مرة عاشرة جدا مبسوطة و شاكرة إنها شاركتني هنا بموضوع بلا مود. (و إذا فيه كلام بالبرتقالي، هذا أنا للي كاتبته مو ريم).
اليوم برجع أتكلم عن أبرز الأشياء الي شفناها في الأسبوع الأول والثاني من الكوتشيلا.
أحب كثير سولانج نولز.. دايم تعكس شخصيتها في لبسها وخياراتها دايم مختلفة بشكل جميل. في هالسنة كانت ضمن الي غنوا وفاجأت الجمهور بظهور أختها بيونسي ع المسرح ورقصوا سوا، للأسف مافيه فيديو بجودة ممتازه كل الي لقيته تصوير من بعيد بس شوفوه هنا.
الي يميز سولانج عندي ما تخاف تغامر.. لا في الألون، أو في الشعر الأفرو -صار لها كم سنة طاحت فيه- طبعاً ألوانها دايم تعكس الصيف ومن فترة انتبهت إن أغلب ملابسي ألوانها صيفية (ما تتخيلون عدد القطع الملونة مقابل الألوان الرسمية الي اختفت من عندي).
هذا اللوك هو رقم واحد بالنسبة لكل الكوتشيلا.. صعب صعب أتجاوزه مع إن شعرها صراحة ما ساعد بس حبيت التنورة والتوب الأبيض، المشكلة لما شفت صور لها وهي واقفه كأنه خف إعجابي بس شكلها الصورة مساعدتها كثير وهي جالسه.
بيونسي وجاي زي كانوا متواجدين في الكوتشيلا كثير في الأسبوع الأول والثاني.. هالاثنين لما أشوف صورهم أحس خلاص ختموا العالم. ما عجبني كثير شكلها في كل الصور، لبسها في الستريت ستايل عموماً قليل يكون موفق.
لانا ديل راي مشاعري متضاربه معها، بس ما قدرت أشوف فيها الي يشوفونه فيها الناس. ما أنكر هنا شكلها حالم ورومنسي بس ما اقتنعت إنها فاشن آيكون -اللقب صار رخيص مرة- المهم اللوك هنا كان مناسب وحبيت اللون الأورنج على بشرتها. حتى اللوك الثاني كان اختيار جيد بس مدري وش دور السيجارة في الشو.. بجد جد ما فهمت.
كيت بوسورث مع آليكساندر وانق في حفل إطلاق خبر تعاونه مه إتش آند إم.. وكمان في إطلاله لها في وحدة من الحفلات الموسيقية في الكوتشيلا. ما يحتاج أضيف إنها من البيست دريسد؟
سارا هايلاند من الناس الي ما تكبر أبد، شكلها ما يعطي أبد ٢٣ سنة.. بالصورتين أعجبني شكلها كثير في المرتين الي حضرت فيها.. اللوك الثاني بالذات طالع دريمي على بساطته.
ديان كروقر مع خطيبها جوشوا جاكسون.. ودي إنها ضحت بالتانك توب أو التنورة لأن مع بعض ما تناسقوا القطعتين، لاحظوا جوشوا بتي شيرت ميكي ماوس، مع إني أتحفظ عليه كثير بس بالسنة هذي فاتت شفنا كثير رجعوا لشخصيات الأنميشن خصوصاً موسكينو الي رجع سبونج بوب والله يعين على الي بنشوفه هالصيفية.
هنا برضو ديان وجوشوا في لبس هادي أكثر. بعد نشوف بالوسط ديتا فون تيسي ولا عجبني التنسيق ما حسيت جسمها يناسبه هالبنطلون، بالأخير نشوف فانيسا هدجنز وهالمرة خففت الزحمة عن الأسبوع الماضي.
بيلا ثورن هنا مفروض اختارت يالتوب يا الشورت. مع بعض شوي زحمة (يمين). العارضة البرازيلية آليساندرا آمبروسيو لبسها مفضل مرة.. عاجبني تركيبها للقطع بالذات التنورة، ما أعرف من وين بس ممكن جداً أشتريها.
هذا إذا أنا مو غلطانة، فستان من خط الملابس حقها (آلي باي أليساندرا) بس لافته على تحت صاير زي التنورة (هنا تلقين الفستان).
كندال جينر كتبت عنها قبل.. هنا في لوك ثاني خلال حفلة لاكوست. اللي بركز عليه هنا النظارات الشمسية الفلورال من دولتشي آند غابانا هذا الصيف بتكون من ال must have على إني حابة شكلها بس هذي تدخل قائمة أشياء تعجبني لكن ما أشتريها. ما أتخيلها تناسب شكل وجهي غير إني ما قد شريت نظارة صيفية، نظارات كندال من ناستي قال ب ٢٤٣ ريال بس.
ديان آرقون من مسلسل قلي كانت موجودة بعد.. مرة كان عاجبني شكلها من جنب بس لما شفته من قدام خف حماسي.. أتوقع بيكون آلطف مع اللون الأبيض ك توب وميني سكيرت أو حتى شورت أبيض ما أدري لبسها من وين. بس نظارتها من ميوميو وإكتشفت إنها عندها من ٢٠١٢ تلبسها . اللوك الثاني لها يذبح.. هو الألوان؟ هو الآيسكريم؟ اشتهيت جو الصيف مرة بس متأكدة لو بشوف اللبس من زاوية ثانية مارح أشتريه.
آخر شي بتكلم عنه هو أسوأ لبس.. ما حبيت آختار كثير وصفيت في الأخير على ثلاثة:
بيزي فيلبس (من اليمين): رقم الفستان مبشع شكلها ومخرب جسمها خصوصاً منطقة الصدر. باريس هيلتون: رخييييص رخييييييص. إيمي رسوم: أشوفها حاولت كثير فطلع اللوك مكركب. Big NO.
