Best of NYFWSS15

ما أعرف هذا الموسم كان عادي أو أنا ما كان عندي الحماس الزايد اللي بالعادة يكون عندي هذي الفترة (فترة أسبوع الموضة)، أعتقد فيه بشكل عام كان فيه ملابس حلوة، بس ما أظن أنه كان فيه مجموعات مثيرة بنيويورك. مجموعة ڤيرسوس ڤيرساتشي أعجبتني مع أنتوني ڤكارويلو و رودارتي. 

ما أعرف ليه عندي أحساس إني اختياراتي هذي المرة قليل منها بيطلع على الريدكاربيت، شخصيا و أنا أختار الأحسن ما كنت أفكر كثير بإيش اللي ممكن ينلبس، قد ما كنت أختار الملابس اللي أنا أعجبتني. لكن بكل الأحوال، خلونا نتكلم عن الملابس اللي اخترتها. 

فوق يمين، أعجبني هذا اللبس من ساس آن برايد، ما أعرف ليه أحس من فترة هذا اللبس موجود (يمكني أتخيل)، بس إلى الآن ما شفته علي الأقل بشكل حلو، على الريد كاربيت (بنطلون و فستان)، أعرف إن إيما ستون لبست شيء نفي الفكرة (تقريبا) من ديور بقولدين قلوب السنة اللي فاتت، بس أحس لو تلبسه هي أو لوبيتا بيطلع مرة حلو (أتمنى أشوفه على لوبيتا). أعجبني بعد لبس التنورة الشفافة اللي عليها ورود (تحت يسار) من مايكل كورس، أحسه بيكون حلو على جيسيكا شستاين. اللوك اللي جمبه من بوس (الفستان الأسود القصير)، عجبني أناقته (مع أنه فستان أسود قصير) يعني مو اختراع جديد، بس عجبني سيوره، أحسه بيكون حلو على ديان كروقر أو كلير دينس. الفستان الأسود الثاني من ڤيرسوس (فوق الثاني من اليمين) ما أقدر أتخيله إلا على ريانا. الفستان العنابي يسار فوق من ريم عكرا، أحسه بيكون حلو على سيلينا قوميز (مع  إني ما أتذكر إنها تلبس لريم عكرا). 

أنتم وش رأيكم بنيويورك، وش أحسن الملابس أو المجموعات لو كنتوا متابعين؟

Refresh Your Wardrobe

ما أعرف وش صاير بالعالم، بس أحس ما فيه شيء مثير، يعني فيه ملابس تعجبني بس أحس ما فيه شيء ينقال عنها. و لأني طفشت و ودي أقول شيء قررت أتكلم عن هذا المحل اللي عرفت عنه من وحدة على يوتيوب ما تعجبني كثير لأنها سعيدة بزيادة، لكن من الطفش أشوف لها بعض المرات. 

المحل موجود بأكثر من مدينة بأمريكا هنا تلقون مواقع المحلات. بالعادة ما أحب أتكلم عن تجارب التسوق حقتي، لأني أظن إنها ما تهم أحد و فيها نوع من الإستعراض البايخ (على الأقل كذا أحس) إلا إذا كان فيه شيء مثير و مفيد للي يقرأ من ورا هذي "الشروة" :) 

كنت متحمسة أزور المحل لأن عندي بالطو ودي أتخلص منه (هنا تجي فكرة المحل) المحل يبيع ملابس و أغراض مملوكة قبل من ناس ثانيين، ممكن يكونون استعملوها و يمكن لا. طبعا إلى الآن ما فيه فكرة مثيرة، فيه محلات كثير بالعالم تسوي هذا الشيء، لكن الفرق أنه الواحد يقدر يبدل أشياءه بشيء موجود أو ممكن يبيعها من دون ما يشتري منهم شيء أعتقد أنه بيعطونك 30 بالمية بس من سعر غرضك اللي بيعرض للبيع. 

ما أعرف إذا كلامي مفهوم أو لا، بس باقول لكم قصتي، من سنتين أو أكثر شريت من the outnet بالطو مطر نرسيسو رودريقز، و لا حصل لي أبدا ألبسه، و مع الوقت كل مرة أقيسة أحس إن شكله يصير أبيخ علي. و لأني حاولت أبيعه على ebay بس ما نفع قررت إني أروح لبافلو إيكسشاينج و أجرب وش يصير معاي. تخلصت من البالطو أخيرا، وبدلتها بجزمة لوفير من قوتشي (مو جديدة)، بس اللي معاي أقنعتني إنها فكرة حلوة، و تحمست :). 

طبعا من أكبر المنافع إني تخلصت من البالطو، صحيح الوقت كان شوي ضيق على إني أفتش برواق على أشياء، لكن أكيد بحاول أرجع للمحل، علشان أبدل أو أشتري (مع أني ما عندي شيء ببالي ودي أتخلص منه). 

نسيت أقول لكم إني بس دفعت 9 دولارات على هذي الجزم، لأنه هذي قيمتها مع سعر البالطو اللي أخذوه. فكرة المحل أعجبتني مرة، أتمنى ألقى زيها بأماكن ثانية، أو أنا أسوي نفسه P: بس لو كنتوا بأمريكا، أو بتزورونها أو تعرفون أحد هناك و تاثقون بذوقه، لا تفوتون تجربة المحل.