Bigger, Brighter Eyes

إذا كنتوا تهتمون بالمكياج، يمكن تعرفون شارلوت تيلبري، و تعرفون عن مكياجها، أما إذا كنتوا ما تعرفون فهي مايكب أرتيست و لها خط مكياج طلع السنة اللي فاتت. قبل فترة قصيرة طلعت كيت اسمه "بيچر، برايتر أيز"/ عيون أكبر و أكثر لمعان. المهم الكيت فيه منتجاتها اللي هي تقترح إنها راح تخلي عيونك تصير أكبر (هنا تلقون ڤيديو). 

عيوني زي عيون أغلب الخليجيين كبيرة، مو كبيرة مرة، بس يعني على مقاييس العالم. بس ما يعني هذا إني أبغى أصغرها، مو لشيء، بس أحس أنه بعد بشرة حلوة، العيون، مهما كان حجمها هي اللي تعطي للوجه معنى، شخصيا أنا أناظر إن العيون تعطيني انطباع عن وضع الشخص أكثر من كلامه، ما علينا من الكلام الفاضي، خلونا نتكلم بالأشياء اللي أحب استخدمها لعيوني، لما ما أبغى أحط أي مكياج (شادو) بس أبغى عيوني تطلع حلوة. 

آي لاش كورلير: عفاطة  أو لفافة الرموش، أو ما أعرف وش الترجمة الصحيحة لها، ما يهم عرفتوا وش أقصد، هي الخطوة الأساسية لأي عين مصحصحة بعدها نجي للي بعده. 

رموش علوية أكثر: للي ما يعرف هذي الخدعة قبل، خدعة مو أنا اللي اخترعتها، و لا أنا أول من يعلم عنها، بس لو أخذت كحل ضد الماء، و كحلت جفنك العلوي من جوا، بيعطي شعور إن عندك رموش علوية كثيرة. مشكلتي مع هذي الفقرة إنها تخليني أدمع، و لا أقدر أسويها، جربت هذي الماسكار (بالوسط) من إيت كوزماتيكس، و قامت بالواجب، الماسكارا مو رخيصة أبدا، بس لشخص زيي يعاني، ممكن يشوفها تستاهل، سعرها ب 24 دولار يعني تقريبا 90 ريال. 

ماسكارا: فقرة أبدا مو ذكية، و كل العالم يعرفونها، استخدمي الماسكارا اللي تحبين، إلى الآن من أكثر الماسكرات اللي أعجبتني هي شوكينچ من إيف سان لوران. 

واترلاين: ما أعرف وش اسم هذي المنطقة بالعربي، بس هي المنطقة اللي يسوون فيها "كحل داخلي". من زمان عرفت إني ما أحب الكحل الأسود جوا عيني، قبل لا أعرف أنه يصغر العين، كذا شكلي ما يعجبني فيه، أعرف ناس يحبونه و يمكن حلو عليهم، بس أنا ما أحبه، جربت فترة الأبيض جوا، و لا أعجبني حسيت شكلي غريب، جربت اللحمي و طلع كأنه قطعة جلد أو شيء جوا عيني، كان أحمر بزيادة على لوني اللي أميل للأصفر. آخر قرار قررته إني أجرب ذهبي وردي، جربت هذا من جاين كوزماتيكس و أعجبني، لأن العين أصلا تلمع، و المفروض إذا أنا باخلي عيني مفتحه، لازم تكون تلمع، و تعكس الضوء مو لون مطفي ما فيه حياة. 

رموش تحتية أكثر: الخدعة هذي تعلمتها من ليزا ألدريج، كنت أسويها قبل و أنا ما أدري ليه أحبها، بس كنت أحب شكلي بعد ما أمسح مكياج عيوني و يبقى سواد تحتها. المهم الفكرة، بخفيف تحطين بكحل بني خطوط أو نقط عند رموشك السفلية، تحوسينها شوي، و بيطلع كأن عندك رموش سفلية أكثر. 

أنتم وش تسوون علشان تخلون عيونكم أحلى؟