السبت، 28 سبتمبر 2013

Sparkling Masculinity

يمكن من أهم عروض اليوم أو أمس (على حسب الوقت اللي تقرون فيه هذا الموضوع). كان عرض ديور، ما أقول أنه ما أعجبني، لكن أظنه من المجموعات اللي مع الوقت "تكبر" بعينك. من الأشياء اللي كانت مميزة بالعرض كان فيه موضة "الشعارات" أو الكتابات على الملابس. صراحة ما أعرف شعوري تجاه إن ماركة "عريقة" زي ديور، ملابسها عليها كتابات. ما علينا خلونا نتكلم عن العرض اللي أعجبني مرة. و هو عرض مايسن مارتين مارقيلا. 


صراحة ما أعرف ليه ما قد تكلمت عن مايسن مارتين مارقيلا قبل هنا (للي ما يعرف الماركة هي نفسها MMM اللي تعاونت H&M معاهم السنة اللي فاتت). أقول ما أدري ليه، لأني دايم ألقى نفسي معجبة بملابسهم. بهذي المجموعة ما أدري ليه حسيت فيه "روح" فينتاج بذات بشك اللي على الملابس (طريقة الشك و ألوانه). ما أعرف إذا كنت وضحت هذا الشيء من قبل، بس أحب القطع الفينتاج، و الشيء اللي دايم أقولكم إني أحبه هو الملابس الرجالية. 
أعجبني خلط الأقمشة الرجالية مع الشك. أعجبني اللبس اللي فوق يمين، عندي استعداد أسرقه من على العارضة، بعد ودي أشوف لو أحد بيلبس هذا الفستان/البالطو (أعتقد ممكن نشوفه ستريت ستايل). بس أهم شيء ودي أشوف الفستان اللي بالوسط أو على الأقل اللي يسار فوق على الريد كاربيت. 

بالنسبة لي (لذوقي الشخصي) هذا أحلى عرض شفته بكل أسابيع الموضة. وشو عرضكم المفضل لحد الآن؟