الأربعاء، 5 يونيو، 2013

Showtime

يمكن قليل اللي يعرفون عني هذا الشيء (يمكن بس صديقاتي بذاك الوقت، و أختي الكبيرة)، لكن بفترة من الفترات كان عندي هوس "ستيانات"، أعرف أنه شيء غريب، و يمكن هذا مو المكان "المناسب" إن أعلن فيه عن الهوس هذا، بس على إني أعتقد إني تجاوزته، أظن أنه كل مرة أشوف ستيانة حلوة أتمنى لو إنها عندي، أو حتى لو شفت ستاينة حلوة، أتمنى أنه ممكن شيء مصنوع بهذا الشكل كمية أكبر من الناس تشوفه P:. 


هوس تجميع ستيانات كان عندي لما كنت بالمتوسط، لدرجة أعتقد إن أمي بدأت تقلل علي، و صارت كل مرة ترجع الأشياء اللي جمعتها عند الكاشير. خف بعدها هوس التجميع، بس أتذكر من أكثر المجموعات اللي أتذكرها (أول ما تعرفت علي الفاشن و العروض بشكل فاهم) كان عرض لدي آن جي. 
أكيد إني ما كنت بالمتوسط (لأني لما رجعت أدور على المجموعة تاريخهاكان بعد المتوسط)، أتذكر إن كل العارضات كانت ستياناتهم واضحة بشكل و بآخر. أتذكر عجبتني أشكالهم، بس قلت ممكن أحد يلبس كذا للشارع؟ ما أتذكر وقتها أحد لبس، بس علشان أكون واضحة، ما أتذكر إني كنت أتابع أو أصلا كان فيه مواقع قوسيب تتابع السلبرتي قد كذا، فما أعرف لو أحد لبسها و لا تصور، أو أنا ما شفت الصورة، غير إني ما كنت أتابع أصلا. (تلقون المجموعة هنا). 

من اليسار: قبل فترة (يمكن شهر) بحملة ترويج فيلمها الجديد ستار ترك زوي سالدانا لبست هذي الجمب سوت البيضاء من إيلي صعب، و كانت لابسة ستيانة واضحة، بعدها بفترة كارا دوليفين طلعت بعد ميت قالا لابسة هذي البدلة من ستيلا، نفس الموضوع طالعة بستيانة دانتيل واضحة. أمس شفت هذي الصورة (يمين) لنيكول ريتشي، بهذي الجمب سوت بعد من جي براند، ولابسة "البرا توب" الأسود هذا مع الجمب سوت. 

إيش رايكم بالتريند هذا؟ ممكن تلبسونه، أو تعتقدون أنه "ما يصلح" لنا؟