الأحد، 16 يونيو 2013

Dress with Jeans Underneath

شفت قبل كم يوم غلاف لمجلة قلامور فرانس، على الغلاف كان نتاليا فيدانوفا لابسة فستان أحمر من ديور (هنا نسخة الفستان على الرانواي علشان تشوفونه أوضح) و لابسة تحته بنطلون جينز. أول ما شفته جا ببالي هو هذي النسخة الأكثر كاجوال من موضة بنطلون تحت الفستان (اللي كانت موجودة بأكثر من عرض). 

تعرفون إني أحب فكرة خلط قطع فخمة، مع قطع كاجوال، و أعتقد بالنسبة لي، و بالنسبة لأكثر الناس (على ما أظن) ما فيه شيء أكثر كاجوال من الجينز. 

بعد ما بديت أكتب، تذكرت أنه فيه بعض الناس سووا هذي الحركة قبل. أتذكر بفترة رحت لستار ستي (يمكن شيء 2003 - 2005) و أتذكر كانوا فيه كثار لابسين بناطيل جينز تحت الفساتين. وقتها ما عجبتني الفكرة، و لا لبستها (أعرف ناس لبسوها كثير). ما أعرف وش السبب بس أتذكر إني سمعت أنه هذي الموضة جت بتأثير من "المسلمات" في أوروبا، لأنهم يضطرون للبس شيء تحت الفساتين علشان تكون أستر. يمكن هذا السبب اللي خلاها ما تعجبني (مو مشكلة الستر، قضية إني ما أحتاج ألبس فوق بعض لأي سبب). 

المهم لو رجعت هذي الموضة (جينز تحت الفستان)، تعتقدون أنكم ممكن تلبسونها؟ أو بتطلع كول زي ما هي طالعة على نتاليا؟ أو الفرق أنه هذي نتاليا و زيادة على كذا إيدتوريال؟ بالنسبة لي يمكن أجربه بيني و بين نفسي و بعد على فساتين معينة (يعني ما أعتقد أنه ممكن يمشي مع أي فستان). 

يمكن مواصفات الفستان اللي ممكن أجرب معاه، أنه يكون فستان من دون خصر، خفيف و أعتقد المفترض أنه ما ينزل تحت الركبة. و أعتقد الجزم لازم تكون صندل (باختصار ما أظن أنه لو صارت موضة بتكون موضة سهلة للبس)، يعني ممكن عدد مرة قليل يقدرون يلبسونها صح (عندي إحساس ممكن نشوفها على أحد "ستريت ستايل"، بعروض أوت كتور الجاية بباريس، أو حتى بعروض ربيع 2014 بسبتمر الجاي). (ننتظر و نشوف) لهذاك الوقت أنتم وش رأيكم؟ و تتذكرون أنه فيه بعض الناس لبسوها؟ أو أنتم لبستوها؟ و الحين وش موقفكم من الفكرة؟.