اليوم إن شاء الله بيكون قولدين قلوب (أو فجر بكرا) من فترة ما تحمست للقولدين قلوب زي هذي المرة، مو لأن قائمة الناس اللي بتحضره هذي السنة مميزة عندي، لكن لأن اللي بيقدمه هم تينا في و إيمي بولير و هذولي الثنتين من أحب الكوميدين عندي (أحب مسلسلات الثنتين، و لا أعرف أحب أيهم أكثر) يمكن أحب تينا في أكثر بس صايره أميل لباركز آند ريكز أكثر (صراحة ما أعرف و لا مهتمة إني أعرف أحب مين أكثر) :).
المهم ما علينا، كالعادة بهذي المناسبات صاير أكثر شيء يهمني هو لبس الحاضرين لأن الجوائز صراحة بالسنوات الأخيرة صايرة تروح لناس ما تستاهل (مو كله، بس أغلبه).
من أكثر الأشياء اللي كانت معجبتني بعروض صيف 2013 هي فساتين السهرة اللي منقطة. نظريا لو قالي أحد عن فكرة لفستان سهرة منقط، كان ما دخلت الفكرة براسي أبدا، لكن بالعروض لفتت إنتباهي بأكثر من عرض و عجبتني (من اليمين: نينا ريتشي، جيني بيكام و هايدر أكيرمان).
ميزة قولدين قلوب أنه اللي يجونه يآخذون راحتهم باختيارات الملابس أكثر من الأوسكار (يظل لبس فخم)، لكن اختيارات الحاضرات أقل تقليدية مو زي الأوسكار، علشان كذا أعتقد أنه لو كانت هذي الفساتين بتآخذ فرصتها على الريد كاربيت قولدين قلوب هو أحسن مناسبة.
من الناس اللي بيحضرون و أحس ممكن تطلع وحدة من هذي الفساتين حلوة عليهم: (سيينا ميلر، جيسيكا شيستاين، كريستين ويق، جوليان مور).
لو وحدة منهم أو أي وحدة تلبس واحد من هذي الفساتين بانبسط مرة، ولو ما لبس أي أحد أي فستان منقط، أنا باشتري لي واحد و بالبسه :).
* لو كانت روني مارا بتحضر (مع إني ما قريت أي خبر عن حضورها) أتمنى أشوفها بالفستان اللي من هايدر أكيرمان.
إيش رايكم بفكرة فستان سهرة منقط؟
ليست هناك تعليقات:
إرسال تعليق