للي يعرفوني يعرفون إني موب مجنونة مجوهرات ... بذات الماركات، يعني ما أفهم إني أشتري قطعة بذيك القيمة و هي بالنهاية إن كثروا خيرهم مطلية ... (آسفة للي منهبلين على كارتيه لوف) بس من جد مو مستاهلة.
بس أنا الفترة الي فاتت و ما زلت بخاطري أشتري شي ما أعرف وشو بس بخاطري ... المهم الأسبوع الي فات كان المفروض أروح للقصيم فيه مناسبة، و قدر ربي و تأجلت (السفرة كانت بخاطري) صرت أدور وش ألبس، لقيت لي لبس و من دون وعي اشتريت مجوهرات (يعني إكسسوار) كبيرة، كبيرة مرة. (حلق كبير و سوارة عريضة) بعدين أنتبهت أنه هذا من تأثير آنا ديلو روسو.
صح ما قد تكلمت عن هذي المخلوقة الي وظيفتها الطبيعية مديرة تحرير فوق نيبون (اليابان)، بس الوصف الحقيقي لها هي بارنيز متنقل (للي يعرفون بارني هو محل أمريكي يبيع كل شي يوجع القلب، شي يشبه هارفي نيكلز بس على أفظع) . الي أحبه بآنا هو إنها تلبس مجوهرات ثقيلة مرة، كل قطعة تكفي إنها تنلبس لحال من فخامتها، بس هي تلبسها سوا و تمشي ...
مو هذا أميز شي بأنا، قلت لكم إنه لبسهما كثير مرات حلو، القطع الي تنقيها مع بعض حلوه، الجزم حقاتها حلوه، و الفترة الأخيرة طايحة بإكسسوارت الشعر، و تلبس أشياء مره حلوه بعد.
المهم قلت لكم إني حابة أسوي شي يشبه كذا، ودي لو عندي مجوهرات كثر حقاتها و أغير بينها قدها ... بالمناسبة net-a-porter.com الإمريكي بدأت تخفيضاته، لو كان عندكم صندوق أمريكي، أستنوا شوي و تبدأ تخفيضات السعودي و (الشرق أوسطي) ... فيه زي دايم theoutnet.com فيه أشياء حلوة بعد.
هذي بعض الصور لمجوهرات أنا
و هذا إديتوريال هي مسويته بفوق نيبون بعد يشبه شوي الستايل حقها، بتشوفون كيف المجوهرات كثيرة مرة (حلقات، عقود، سوارت، خواتم و حتى بروشات). العارضة هي البرازيلية أليساندرا أمبروزيو Alessandra Ambrosio.
ليست هناك تعليقات:
إرسال تعليق