Gray

ما أعرف عنكم أنتم بس أنا أحب كثير ملابس السهرات، على إني ما زحب الزواجات، بس المشكلة إنها هي المكان الوحيد الي ممكن تنلبس فيه هذي الفساتين ... أو الحل الثاني إني أصير سلبرتي P:

لسا باقي حول الشهرين على عروض الخريف، بس بعض الماركات عندها مجموعات قبل الخريف أو Pre-fall بالعادة ينزلون فيها ملبس شوي شتوية، و عدد القطع أقل من مجموعات الشتاء أو الربيع ...

الي لاحظته من أكثر من مجموعة، أنه الشتاء الجاي بيكون فيه ألوان ساطعة مره، زي الأحمر، و النيلي و البرتقالي و كمان لونين الأول: شي بين الماسترد و البني و الثاني الرمادي.

ما عمري كنت من معجبين هذا اللون (الرصاصي، و الرمادي و درجاتهم) ما أعرف ليه، حتى أتذكر سنة من السنين طاحوا فيه حسيته طلع من خشمي، كرهته كره العمى، يمكن هو الي خلاني أحب التلوين ... بعض المرات أحس فيه بلادة غير طبيعية. زي ما قلت لكم أني شفته متكرر بأكثر من مجموعة، جبيته على قطعه، قطعتبن من دون لا يكثر، و أهم شي حبيته أكثر شي على ملابس السهرات ... حمسني أني أفكر بشي رمادي كفستان زواج، بالذات الأوسكار دي لا رينتا (اللي بالوسط) حبيته بقوة، ودي أشتريه و ألبسه باللقلب يعني أخلي الأزارير ورا ...

كمان حبيت الشانيل (الي على اليمين) من زمان ما حبيت فستان لشانيل، كمه ظريف (أدري ماله معنى الوصف) بس عجبني أنه الشيفون الي بالأكمام ما بدأ من الكنف، بعد حبيت فيه الحلقات الذهبية.

الفستان الأخير، و أكيد ما بقى إلا الي على اليسار من كارولينا إيريرا ... عجبني الفستان، حسيته مع إكسسوار ذهبي، و شعر مشدود ذيل ناعم  بيطلع مره حلو، و أكيد مع كعبات سودا طويله مره.

شرايكم باللون الرمادي على الملابس، خصوصا ملابس السهرات؟ قد لبستوا فساتين سهرة رمادية؟