الخميس، 28 أكتوبر 2010

Chanel Suit

قلت لكم إني أقدر أشوف كيف الناس وصلوا مدونتي، يعني وش مفاتيح البحث الي استخدموها علشان يلقون هذي المدونة ... صراحة فيه ناس يدورون أشياء عجيبة مرة، أو ناس يحطون قصة كاملة و ينتظرون قوقل يفهمها ... بس من الأشياء الي شفت أنه كان بحث منطقي هو هذا البحث ما معني تيور شانيل ...
الي سوت البحث سوته مرتين، و شكلها ما لقت شي، إن كان عندها نية تسوي من جديد، فإن شاء الله هنا بتلقى الإجابة.


التيور قصته قديمة، طبعا هو مو أختراع طلعته شانيل، هو كان أساسا موضة بالعشرينيات، بس أشتهر مع كوكو شانيل مؤسسة الماركة ، لأنها كانت تسوي تصاميم مختلفة منها، بس الشي الأساسي فيها هو التنورة المستطيلة (مو بينسيل، الي يسمونها عندنا سكيني) و جاكيت ... بالبداية التنورة كانت أطول من الركبة (يعني الي هي لبستها، زي ما تشوفون بالصورة).

بس الحين التيور تقريبا يطلعون منه نسخة بكل عرض، و طول التنورة يتغير، و حتى شكل الجاكيت (مثل ما تشوفون بالصور الي فوق، هذا التيور بألوان و أشكال مختلفة، من عروض مختلفة) .
طيب وش الثابت بالتيور ... هو القماش حق شانيل الي صوف، و نفس الشي هذا القماش كل سنة يسوى، و يمكن الحين تلقون تقليده بكل العالم (تقليد القماش).
طبعا الحين عند كثير من الناس لما يقال تيور شانيل، فهم ما يقصدون الأصلي، يعني شي لازم من شانيل، كثير يسمون أي تنورة و جاكيت خصوصا التنورة الميدي (يعني تحت الركبة إلى نص الساق) تيور شانيل.
آخر شي أي شي يشتهر لازم يلبسه مشاهير، و هذا التيور كثير مشاهير لبسه من باربرا سترايسند، مارلينه ديترش، جاكلين كيندي، و ليدي ديانا و القائمة تطووووول ...