The Calendar

مع الشهر هذا قررت إني آسوي زي المود بورد (مو بالضبط) الفكرة إني أحط لكل شهر صورة عاجبني اللبس فيها (من أي مكان). مع ثلاثة أقمشة أو أشياء نفس الشيء عاجبتني (بتفهمون مع الصورة و الكلام تحت). 

زي ما أنتم شايفين من الصورة اللي فوق الفكرة اللي ببالي صورة أعتقد أنه ممكن تعطيني فكرة عن طريقة لبس معين، و تحت الأشياء اللي حابتها الفترة هذي. 

أعرف إن اللي عندنا مو ربيع صيف، بس أنا باتصرف كأن عندنا ربيع، و أنه ممكن الواحد يلبس كنزة بهذا الوقت (إلى الآن الجو مو حار مرة خلونا ننبسط شوي). أول ما شفت هذي الصورة قبل فترة، حبيتها مرة، حفظتها عندي، ما أعرف ليه، بس حفظتها (لليوم الأسود). اليوم أعتقد جا يومها. 

حبيت كيف بالصورة البنت لابسة تنورة ماكسي فلورال مع شيء أسود و أبيض (الأسود مع الأبيض قلت أكثر من مرة إنها وحدة من موضات الصيف هذي السنة). يعني إذا ما حبيت فكرة لبس أسود و أبيض بس، ممكن تدخلين عليها فلورال، أو بحالتي طبعات كرز. ما أعرف ليه بس صايرة أحب أي شيء فيها كرز (غير الأكل) مجوهرات على شكل كرز، أو ملابس فيها طبعات كرز أو أي صورة فيها كرز P:. الشيء الثاني اللي حابته هو شيء ممكن يكون من موضة الأسود و أبيض بس اللي حابته بالضبط شيء أبيض منقط بأسود. آخر شيء أعتقد أنه يستاهل تشترين شيء منه (على الأقل أنا أحس إن لازم أسوي هذا الشيء) إني أشتري شيء جينز. ما أعرف ليه، بس أحس إنى ما أكتفي منه :( كل مرة أدخل محل و ألقى شيء جينز يعجبني أهجم عليه و أنسى إن عندي شيء يشبه له. 

باختصار لشهر مارس أبغى ألبس زي البنت، شيء ملون بدرجات الأحمر (كرز أو حتى فلورال) شيء أسود و أبيض معاه (الأفضل يكون منقط) أو لو شيء جينز (تنورة، توب، بنطلون). 

أنتم وش موجود على قائمتكم لأشياء ودكم تلبسونها؟