الجمعة، 13 أبريل، 2012

Sneakers Once Again

شفت الصورة هذي لصوفيا كابولا و هي جالسة بموقع تصوير فيلمها الجديد اللي تخرجه ذا بلينق رينق (أحس أن الفيلم بيطلع حلو). بشكل عام أحب ستايل صوفيا، أحس إنها مرتاحة بلبسها على الآخر، و هذا الشيء اللي أحبه باللبس إني أخس إني مرتاحة فيه (نفسيا و ماديا)، مو شيء ما يناسب لي و لا يصلح لا لشخصيتي أو عمري، و لا لشكل جسمي. 


زي ما أنتم شايفين بالصورة لبس صوفيا جدا عادي بس أنيق، (أكثر من مرة قلت لكم إني أحب السويتير الرمادية). 

الشيء اللي حبيته بالصورة جزمها، صوفيا لابسة سنيكرز مع هذا اللبس اللي من فوق لحد الجزمة شكله مره كلاسيكي، لكن مع هذي السنيكيرز النايكي اللي فيها أحمر طالع شكلها بالنسبة لي ظريف. 

يمكن أزعجت كثير منكم بموضوع سنيكيرز، بس وش أسوي أحبها، بعدين أنا من الرياض، و سمعت أن الناس عندها سمعة إن بنات الرياض دائما لابسات جزم رياضية :). ما أقدر أتكلم عن باقي البنات بس عني أنا بصراحة إني أمشي مرتاحة أهم عندي من أي شيء ثاني، لأن لو رجلك أوجعتك كل شيء بيخرب، الطلعة بتخرب، ما راح تقدرين تشربين أو تاكلين زين، ماراح تقدرين تتفرجين زين لأنك مشغولة برجلوك اللي توجعك :). 

أقدر أعطيكم 100 سبب عن ليه السنيكرز تستاهل إنها تعامل بطريقة أفضل من اللي جالسين يعاملونها الناس فيه :) بس أكتفي اليوم بالأسباب اللي قلتها قبل، و بصورة صوفيا و هي واقفة مع إيما واتسون بموقع التصوير (مو شكلها رايق؟). المهم للي مهتم أنه يلبس أو يشتري سنيكرز لأنه و بسبب جديد السنيكرز تصلح للجامعة و تصلح للمدرسة، و إذا كنت مسافرة فهي أحسن شيء للتمشي طول اليوم. علشان كذا كل وقت من السنة، فيه سبب مقنع أنك تفكرين تشرتين لك سنيكرز :). 


قبل يومين قريت عن التعاون بين نايكي و ليبرتي لندن (للي ما يعرفون لبيرتي، هي ماركة بريطانية دائما عندهم أشياء عليها طبعات فلورال حلوة) عجبتني هذي الجزمة (الحمراء) من بين أكثر من شكل بهذي المجموعة اللي بين نايكي و لبيرتي، بس لأنه سعرها مو رخيص أبدا، رحت أشوف على جزم ثانية يكون سعرها معقول. 
أنا شخصيا ما قد شفت سنيكرز من الماركات الجيدة أرخص من 200 ريال، فلما لقيت هذي الجزم من بوما، إنبسطت عليها مرة، خصوصا إن شكلها بعد حلو. هنا تلقون بوما عند زابوس، و هنا نايكي X لبيرتي عند لبيرتي لندن. (لا تنسون تشيكون على باقي المجموعة من التعاون). 

شرايكم بالسنيكيرز ما راح أسألكم عندكم وحدة، لأني أعتقد أي إنسان عنده أكثر من جزمة، على الأقل وحدة لازم تكون سنيكرز، لكن تحبونها زيي و تلبسونها لكل مره تطلعون تتمشون؟