علشان نكون واضحين من البداية، أنا ما أحب لانا ديل ري، تصرفاتها، لبسها، كيف إنها ما تعرف تغني مباشر على المسرح (زي إليسا). و يمكن الشيء الأساسي أنه واضح إن وجهها مو طبيعي أبدا (عندي مشكلة مع عمليات التجميل، خصوصا لما تكون بكل مكان: شفايف، خدود، خشم)، لكن للحقيقة أحب أغنيتها Video Games.
ما علينا، أمس لانا كانت موجودة بشيء (مهرجان غنائي) ببرلين، كانت لابسة فستان من أرماني (معلومة جانبية)، المهم الفكرة إنها لابسة معاه جزم فلات. ما أعرف ليه ما قد جربت، بس ما قد لبست فستان سهرة مع فلاتز. أختي تقول إنها ما تفهم الكعب (بالمناسبة ما تطيق لانا ديل راي). بس أنا أعتقد أنه يعطي قوام مختلف (شيء أكثر رزة) طبعا قصدي الكعب، غير أنه بالنسبة لوحدة زيي مو طويلة (أو تعتبر قصيرة، علشان ما يطلع شكلي كأني جالسة أحسن الوضع :). أو يمكن اللي يخليني أحس إني لازم ألبس كعب، إني ما أبغى أفشل باختبار قدرة النساء على تحمل عذاب المشي بالكعب لساعات. ما أبغى الناس تقول عني فاشلة P: و بعدين يخرب مستقبلي.
أو يمكن السبب الأساسي إن الكعوب حلوة، صراحة قليل أشوف جزم فلات ممكن تخليني أتمنى بقوة إني أشتريها، لكن فيه كعوب كثيرة سهرتني P: و خلتني أدور عليها بكل موقع، أو أقلبها بكل بوتيك، و جواتي أدعي إن أحد يشوفني و أكسر له خاطره، و يجيبها لي هدية، أو صدقة، أو أي اسم يبغى يسميها :). المهم نترك موضوع ليه ماني مقتنعة بالكعب، و نرجع للانا و شكلها.
للحقيقة شكل لانا بالفلاتز أبدا مو سيء، و خلاني أفكر وش اللي يمنع أنه الوحدة تلبس فلاتز مع فستان سهرة، فتشت بالمواقع وليقت هذي الجزمتين اللي أعتقد لو كانوا عندي، كان جربت ألبسهم مع فستان سهرة. هنا تلقون الجزمة الحمراء، و هنا تلقون السوداء.
شرايكم ممكن تلبسون جزم فلات مع فستان سهرة، أو تفضلون الكعب؟
مستحيل عني انا !
ردحذفبس ممكن لو اشوف ناس معينين من الاساس مايلبسون كعوب ولايحبونها
لابسين فستان جميل مع فلات جميل بستسيغ الفكره عليهم