أمس كانت جوائز الإيمي، صراحة ما كنت مهتمة كثير، لأنها جت وسط أسابيع الموضة، (دايم كذا؟) أحس هذي أول مرة تصير، المهم أكثر اللبس كان يا أسود يا أحمر، أغلب اللبس مو سيء، بس ما كان مميز، على الأقل بالنسبة لي، يمكن أكثر وحدة أعجبتني، وحدة ما أعرفها لكن شكلها عجبني اسمها لينا هيدي.
لينا كانت لابسة فستان من أليساندرا ريتش، المصممة هذي اكتشفتها بالصدفة و أنا أفتش بنيت أي بورتيه، بداية الصيف على ما أظن لبست لها ديان كروقر، قبل أسبوع تقريبا لبست لها ريتشيل إيفيان وود مرتين (الأسود)، (الأبيض) بمهرجان فينيسيا (مبسوطة أنه الناس بدت تقدرها)، فساتينها حلوة، فيها شيء مسرحي، مع شكل خاص ما أعرف كيف بس يميز المصممة. (هنا تلقون بوتيكها بنيت آي بورتيه، و فيه الفستان اللي على لينا، و الأسود اللي على إيفيان).
لينا كانت لابسة كعبات فوشيا (ما طلعت بهذي الصورة). شعرها كان حلو، و شنطتها كانت حلوة، أهم شيء إنها ما لبست عقد، بس لبست حلقات، و لا غطت على فتحة الفستان من فوق.
للحفل كان جاي بعد الممثل بمسلسل ذا قود وايف، الآن كومينق، كان لابس لابس ما أعتقد أنه غيره أحد ممكن يلبسه، بس حبيت شكله.
الآن كان لابس من جان بول قوتييه (زي ما هو قال بحسابه على تويتر)، بعد بحسابة قال أستعدوا يا فاشن بوليس (البرنامج اللي يجي على قناة E إذا كنتوا تابعونه)، أعرف أنه البرنامج راح يسبه، و ممكن كثير منكم ما راح يعجبه لكن أعجبني كيف لابس جاكيت توكسيدو مع بنطلون حرير كأنه بيجاما، قلت لكم عجبني مرة و أظن إني ودي أجرب هذا الستايل :).
إن كنتوا تابعتوا الجوائز، وش رأيكم؟
ليست هناك تعليقات:
إرسال تعليق