La mode

French Manicure Kit

2012-02-02T23:54:00.000+03:00

نرجع مرة ثانية لهوسي بمنتجات التجميل، و محلات المكياج، قلت لكم إني أكثر من مرة إني أحب أدخل محلات المكياج و أحوس فيها و أكتشف الأشياء اللي "أظن" إنها جديدة.

لما وقفت عند ستاند ريفيلون شفت هذا الكيت لثلاثة مناكير، يسوى منها مناكير فرنسي ... زي ما تشوفون الكيت فيه أبيض، و شفاف و هذا اللون اللحمي ... عجبني فكرته (بعد تراني ما قد سويت مناكير فرنسي إلا مرة وحدة بحياتي)، لكن أعجبتني فكرته كهدية، ما أدري إذا قد قلت لكم هذا الشيء من قبل أو لا، بس أحب الهدايا (أكيد لما أحد يعطني إياها)، و بعد أحب أفكر بأشياء ممكن تصير هدايا، غير الأشياء اللي كل العالم تعطيها.

الكيت هذا غير المناكير الثلاثة هذي، يجي معاها شيء زي اللصق علشان تقدرين تسوين خط أبيض أعلى الظفر، هذا كله بـ 64 ريال، يعني تقدرون تحطونها تحت قائمة هدايا بأقل من 100 ريال، و بعد تقدرون تشترونها "تدلعون" فيها أنفسكم. ما أعرف ليه بس الفترة الأخيرة هذي أحس إني ودي أكون طول الوقت عايشة كأني بسبا، أقنعة ... مناكير، زيوت، مساج، أي شيء يحسسني إني بإجازة طويلة، حتى لو ما كنت بإجازة :).

Best Dressed: January '12

2012-01-31T15:05:00.000+03:00

السنة اللي فاتت 2011 قررت إني أسجل عندي أي لوك عجبني، علشان نهاية السنة أحط قائمة لأفضل الملابس و لا أنسى شيء ... بالآخر طلعت بمجموعة كبيرة مرة، و بطلت أكتب لأني عجزت أقلص القائمة.السنة هذي سويت نفس الشيء، لكن قبل يومين قررت بدل ما أجمعها كلها للأخير، و أبطل زي السنة اللي فاتت، قلت أحط استفتاء لكم كل شهر أنتم تقررون وش أحسن لبس لهذا الشهر، خصوصا يناير ما خلص.

إيل فانينق برودارتي:

فستان عباد الشمس كان عاجبني مرة من العرض، توقعت كريتسن دونست تلبسه، لكن إيل هي اللي لبسته، و طلعت بشعر مرة حلو، و وجه فريش.

كيري موليقان بلانفين:

للأسف ما فيه صور كثيرة لكيري بهذا الفستان، لكن فيه فيديو لها، يوريك قد إيش كان شكلها حلو، الفستان شكله غير الأشياء اللي بالعادة تلبسها كيري، أهم شيء عجبني كيف متموج.

روني مارا بفالنتينو:

تلكمت عن هذا اللوك قبل، بالنسبة لي ما زال أحسن لبس طلعت فيه روني، و هو أكثر لبس ملون لبسته لحد الآن.

رامولا قاراي بأليساندرا ريتش:

قلت قبل إن أليساندرا ريتش صايرة فساتينها مفضلة على الريد كاربيت. ما ألوم اللي يلبسها بأغلب الحالات طلعت أشكالهم حلوة، رامولا مو استثناء، لون لافستان مناسب لون بشرتها ... و شكله طالع حلو على جسمها.

تيلدا سوينتين بحيدر أكيرمان:
هذا اللوك بالنسبة لي كان من أحسن الأشياء اللي لبستها تيلدا سوينتين، لونه علي بشرتها مرة حلو، ذكرني بفستان من جان بول قوتييه تقريبا بنفس اللون لبسته كايت بلانشيت بعد لقولدين قلوب 2005.

كايت بوسورث بأنتطونيو بيراردي:
كل شيء بهذا اللوك يخليني أختاره، أولا الفستان، ثانيا الشعر (عجبني أنه مشدود على ورا)، أكثر شيء عجبني أنه كل شيء أحمر بهذا اللوك من الفستان للروج، و آخر شيء الجزم.

دايان كروقر بإرديم:
كثير أقول صعبة على ديان إنها تطلع بشكل مو حلو ... الفستان هذا من أكثر الأشياء اللي أعجبتني بعرض إرديم، لكن بالنسبة لي دايان حلته أكثر خصوصا مع شعرها، و كيف ماسك على جسمها.

روز بيرن بإيلي صعب:
تكلمت عن روز بالبوست اللي قبل هذا، عن أحسن ملابس جوائز ساق ... رجعت أكثر من مرة أشوف اللي جوا، و ما زلت أظن أنه روز كانت من أحسن من لبس بالجوائز، و بكل شهر يناير.

Best Dressed: SAG Awards 2012

2012-01-30T13:46:00.000+03:00

قلت لكم إن SAG كانت قبل أمس، و كنت مخطية ... طلعت أمس أو اليوم الفجر :) ... ما يهم أهم شيء إننا إلى الآن بيناير P: ... بالنسبة لي ساق كان أفضل بكثير من قولدين قلوب ... لكن أنجلينا جولي، اللي أعجبتني مرة بقولدين قلوب، كان شكلها "شوي" بايخ بساق. ما علينا راح أقول لكم مين أكثر وحدة عجبتني بالحفل.

مرة ثانية لبس بالأبيض و درجاته يعجبني، و مرة "عاشرة أو ألف" لبس لإيلي صعب يكون أحسن الملابس الموجودة على الريدكاربيت. روز بيرن بجمب سوت عاجية من مجموعة أوت كتور خريف 2009 لإيلي صعب. بالنسبة لي لوك روز اللي مثل ما قال ستايليست حقها أنه كأنه ميشيل فيفير بسكارفايس، هو الشيء اللي أحس من زمان ما شفته على الريد كاربيت "عنصر المفاجأة". روز بجمب سوت قدرت إنها تفجأني (أتكلم عن نفسي)، لأني ما توقعت جوائز زي كذا ممكن أحد يلبس لها جمب سويت ... لكن "لمسة" أيلي صعب، مع شعر و مكياج روز خلاها أحسن وحدة على الريد كاربيت بالنسبة لي أمس.

إن كنتوا شفتوا صور السلبريتي على الريد كاربيت لSAG أمس، مين عجبكم أكثر؟

Dress with Pockets

2012-01-28T13:45:00.002+03:00

بالمجموعات الأخيرة (بري فول و كتو ربيع 2012) شفت كثير فساتين بجيوب ... ما أعرف هذي بتكون موضة بتنتشر حتى عند محلات الهاي ستريت، أو ممكن نشوفها على الريدكاربيت، لكنها تستاهل إننا نتكلم عنها.

من مجموعة برابل قرونق بري فول (اللي بالمناسبة أتوقع بينلبس منها كثير على الريد كاربيت)، لعرض شانيل أوت كتو ربيع اللي كله فساتين بجيوب ... لعرض فالنتينو بعد أوت كتو ربيع 2012 و حتى مجموعة بري فول 2012 نمبر 21 كلها كان فيها فساتين فيها جيبوب ... بصراحة أنا ما أعرف إذا ممكن ألبس فستان لزواج مثلا بجيوب (إلا إذا كان شانيل طبعا :P) (الثاني من اليسار) ... لكن لحفلة يعني شيء زي فستان برابل قرونق (الأول من اليسار)، أعتقد إني ما راح أصلا أفكر بالجيب ...

بالعموم الفكرة مو خطيرة للدرجة هذي، يعني علشان أسأل سؤال مثل ممكن تلبسونه أو لا، لكن ما أعرف بالنسبة لي أحس إن جيوبي بتمتلي بمناديل، و يمكن جوالي و قراطيس من الشوكولاته اللي وزعوها بالزواج، و بالنهاية باطلع بفستان منفخ بشكل غريب (لي تجارب سيئة مع جيوب المريول، علشان كذا أحس إني من دون جيبوب أسلم :)

شرايكم بالجيوب بالفساتين؟

* بالمناسبة الليلية حفلة توزيع جوائز SAG أتمنى نشوف شيء حلو.

Oscars, who will win the red carpet?

2012-01-26T11:00:00.000+03:00

بدأ و خلص أسبوع الأوت كتو بصراحة ما قد شفت مجموعات أوت كتو كلها حلوة بالسنتين اللي فاتت يمكن ... لكن هذي المرة حتى ديور اللي وضعه متدهور بعد ما راج جوليانو طلعوا بعرض أعتقد كثير منه واح نشوفه على الويدكاربيت حتى لو مو بالأوسكار. حطيت هنا صور لفساتين من بعض المجموعات و اللي أتوقع إنها راح تنلبس مو شرط للأوسكا (مع إني أتمنى) لكن أعتقد راخ نشوفها بمناسبات مهمة.

فيرساتشي أتلييه أول مرة (على الأقل بالسنوات الأخيرة) يسوون عرض لملابس الأوت كتو حقتهم، العرض كان مرة حلوة، أنوقع كثير منه راح ينلبس بالسنة هذي، خصوصا مع قطع المعدن اللي موجودة بأماكن مختلفة، حتى قبل الأوسكار أتوقع واح ينلبس من المجموعة للقرامي.

قلت لكم عن ديور راجع بشكل حلو، صحيح بأشكال تشبه الأشياء اللي كان يسويها جوليانو، لكن هذا الشيء اللي كان ممشي الشركة، و مصمم ديور لحالي بيل قايتين كان مساعد لجوليانو لما كان مصمم ديور، أعتقد على الأقل فستان راح يكون من العرض موجود على الريدكاربيت.

جامبتيستا فالي هذي ثاني مجموعة له أوت كتو ... بالنسبة لي المجموعة هذي أحلى من الأولي، خصوصا الفساتين اللي داخل الشك علي القماش (ما أعرف كيف آصفه)، لكنها مجموعة مرة حلوة، و تستاهل ريدكاربيت.

شانيل هذي من أكثر المجوعات اللي شفتها، اللي تقول خذوني للأوسكار، أعتقد أنه هذي السنة على الأقل وحدة راح تلبس من شانيل للأوسكار، ببالي ميشيل وليمز، لكن نستنى شوي، لأني راح أحط إن شاء الله تخميني لوش راح تلبس الممثلات اللي بيجون للحفل.

لعرض أرماني برافيه جت جيسيكا شيستين، و هي مرشحة لأوسكار أفضل ممثلة مساعدة، إلى الآن جيسيكار ما لبست شيء لأرماني، لكن مجموعة أرماني برافيه الأخيرة، واضح أنه أرماني مصر هذي السنة يكون بالأوسكار. أظن آخر ظهور لفستان من تصميمه على الريد كاربيت حق الأوسكار كان اللي لبسته آن هاثوي بـ 2009.

بعرض إيلي صعب أوت كتو ربيع 2012 كان في مجموعة فساتين ببداية العرض مرة حلوة، و غير عن اللي يسويه إيلي بالعادة، لكن أتوقع إيلي راح يكون بالأوسكار (تقريبا زي كل سنة من عشر سنوات)، لكن بواحد من الفساتين المشكوكة هذي اللي تميز فيها بالسنوات الأخيرة.

جيفانشي هذي المجموعة طلع بفساتين تختلف عن الشيء اللي كان يسويه بالأربع مواسم الأخيرة، الكثير يعتقدون أنه روني مارا راح تلبس منه للأوسكار، صراحة مو متأكدة لحد الآن، لكن أتمنى لو تيلدا سوينتين كانت فيه، و تلبس الفستان اللي فوق.

مجموعة فالنتينو هذي، باحتصار مجموعة لإيل فانينق، (إلى الآن ما أعرف إيل راح تجي أو لا) أظن هذا الفستان بيكون حلو مرة عليها، لو مشيل وليمز بتلبس لفالنتينو، ما أتوقع هذا الشيء المناسب لها. باختصار فستان واحد (مو هذا) أعتقد ممكن يكون على ريدكاربيت الأوسكار هذي السنة.

آخر شيء غير الأسود و الأبيض، أتوقع فيه أحد راح يلبس رمادي / فضي، و أتمني إني أشوف ألوان مختلفة عن دايم. على أنه مجموعة فالنتينو كانت تقريبا كلها طبعات (هي الوحيدة اللي كأنها مو مهتمة بالأوسكار)، ما أظن بنشوف طبعات بالأوسكار هذي السنة، خصوصا بعد فستان ساره ميشيل قلير بمونيك لوليه بقولدين قلوب.

و لا ننسى غير مجموعات الأوت كتو فيه ماركيزا، و فيه مونيك لوليه و فيه ريم عكرا، كلهم ممكن يكونون موجودين على الريدكاربيت، أما وش راح تلبس ميريل ستريب اللي أتوقع إنها راح تفور بالأوسكار هذي السنة، هذا هو السؤال اللي ما أقدر حتى أخمن إجابته.

In Grieving

2012-01-23T01:35:00.000+03:00

شفت قبل يومين فيلم نادين لبكي الجديد "و هلأ لوين؟" ... ما يحتاج أقول إني حبيته، يكفي إن نادين هي اللي مسويته P:، بس بجد مع أنه لبس النساء بأفلام نادين مو شيء ممكن ألبسه، لكن فيها شيء يخلي الواحد يشتهي "يخلقن"زيهم :) ... المهم بالفيلم هذي المرة، المشهد الأول كان هذي الصورة.

قد كتبت أكثر من مرة عن ناس بجنازات، ما أعرف ليه صور النساء بالجنازات تثيرني، أتذكر من أول الصور اللي وعيت فيها إن الجنازات تعجبني، هي صورة لمغنية صربية بجنازة زوجها، أظن أنه واحد من جنرالات الجيش الصربي.

إلى الآن زي ما قلت لكم أحب هذي الصور، أحب أشكال النساء وهم "متكشخات" و لا هم متكشخات (صحيح أتنرفز لما أروح لعزاء أهله محولينه لزواج من كثر ما هم جالسين يستعرضون فيه. لكن للمرة المليون ما يمنع إني أحب أشوف الصور ... علشان كذا المشهد أعجبني ...

لأنه الأسود بهذا الصيف، كان تقريبا موجود بكل عرض، فكرت إني أدور على الملابس اللي ممكن تطلع حلوة، بجنازة، للمرة بعد المليون بجنازة أو عزاء "بالصور" :) ... بس هذا ما يعني إنه اللوك هذا ماراح ألبسه إلا لعزاء (لأني على الأغلب ما راح ألبسه لعزاء)، علشان كذا لو أحد شافني هذا الصيف مقررة إني أسوي نفسي ولو مرة كأني طالعة من عزاء بفيلم أو بصورة بجريدة، لا أحد يقول لي: ليه كأنك جاية من عزاء :)

بيعد عن سواليف العزاء و الموت (جالسة أناظر "ذا بيق سي" وشوي موضوع الموت مأثر فيني)، لو كنتوا ببلد فيه سينما، شيكوا على سينمات البلد، و روحوا ناظروا "و هلأ لوين؟" قلت لكم الفيلم يستاهل، لو كنتوا قراب من البحرين بهذي الإجازة، تراه يعرض بسينما الدانة.

آخر شيء، شرايكم بلوك "العزاء"؟ و قد عجبتكم صور الجنازات زيي؟

Matte

2012-01-20T12:59:00.000+03:00

بالعادة ما أحط مناكير، مو لأني ما أحبها زي أختي ... لكن لأني أشوف إن المناكير حقت "سعة صدر" و لما أكون رايحة لمناسبة، ما عندي وقت إني أحط مناكير، فالوقت الوحيد اللي مناسب إني أحط فيه مناكير هو بالسوق، لما أدخل محلات المكياج :).

أمس أكتشفت شيء جديد، ما أعرف إن كنتوا تعرفون عنه قبل، لكن لما ألقى أشياء زي كذا أنبسط، و أحس ودي أعلم أي أحد، حتى لو كانت "قديمة" :). و أنا عند إنقلوت INGLOT جالسة أجرب شيء عندهم "سحري" لما تحطونه فوق طبقة أصلية من المناكير، يسوي تأثير (على حسب اللون اللي أخترتوه) كأنه متشقق. مو هذا الشيء اللي عجبني، لكن و أنا أدور على ألوان، و سألت إن كان عندهم ألوان طافية، وروني شيء "سحري".

الشيء هذا اللي لونه أبيض شبه شفاف، لو حطيتوه فوق أي لون، من أي ماركة عندك يتحول المناكير للون طافي. ما عندي صورة ليدي قبل و بعد ... لكن صدق أول ما حطيته، ما كنت مقتنعة أنه ممكن يسوي هذا التأثير ... اللي خلاني أنبسط عليه، مو لأني أستخدم مناكير كثير، قلت لكم ما أستخدمه إلا بالمحلات تقريبا، لكن أعرف بنات كثير يدورون على مناكير ألوانها طافية بس ما يلقون بسهولة، و أعرف بنات يشترون من نفس اللون نوعين، واحد طافي و واحد بلمعة. الشيء هذا بيوفر على كثيرين، خصوصا أنه سعره معقول مرة، بـ 50 ريال بس.

كنتم تعرفون عن هذا الشيء قبل؟ عندكم؟ و وشرايكم فيه؟

In My Circle

2012-01-17T16:30:00.000+03:00

من يومين و أنا مفعلة حساب google + حقي، و قررت إني أحط فيه المواضيع اللي تعجبني عن الموضة، أو أي شيء ثاني أشوف أنه ظريف أو حلو و يستاهل إني أشارككم فيه ...

إلى الآن حطيت فيه ثلاث مواضيع من مواقع مختلفة، أعتقد إنها كلها ظريفة لو تبغون تشوفونها، أو تعلقون عليها.

أنتم بعد تقدرون تسوون لكم حساب، أو تفعلون حسابكم (اللي هو نفسه حساب قوقل، لو كان عندكم قوقل ميل)، إذا كنتم تعتقدون أنه شيء معقد، أبدا هو شيء يشبه فايس بوك، فإذا كنتوا مهتمين، تشوفون وش عندي، تقدرون تضيفوني، لأني مهتمة أعرف عن الأشياء اللي تهمكم، أي مواضيع أو مقاطع أو أي شيء تيغون تشاركون الناس الثانية فيه.

هذا حسابي هنا، ~~راح أحط إن شاء الله رابط ثابت على جمب~~، بس يصير عندي إتصال إنترنت أحسن من اللي الحين عندي، الموضوع بسيط، بس أدخلو على الرابط و باليسار بالأحمر مكتوب add to circle و خلصنا، و أن إن شاء الله باضيفكم على طول.

قلت لكم تقدرون تعلقون على الروابط اللي حطيتها، تقدرون تشاركونها مع ناس ثانيين، و تقدرون بعد تحطون روابط و مقاطع و أي شيء ثاني يعجبكم، زي ما قلت لكم و حتى تختارون من تبغون ينا.ظرها :).

تحديث:
الرابط موجود تحت عني

Headbands?

2012-01-16T12:26:00.000+03:00

من الأشياء اللي خلتني أتضايق شوي من ملابس بعض اللي جايات، هو الطوق اللي شفته على أكثر من وحدة. بشكل عام ما عندي مشكلة مع الأطواق، أو الربطات، لكن ما أعرف ليه ما أحبها مع ملابس السهرة (ما أدري رأيي بيتغير بعدين أو لا). لكن الحين أحس إني ممكن ما أحب لوك، علشانها.

ميشيل وليمز و شارليز ثيرون و بعد زوجة إيوان ماكروقر إيفا، كلهم كانوا لابسين ربطات أو أطواق. ما أعرف ليه إحس إنها ما تصلح على أحد فوق العشرين، خصوصا لما تكون مع ملابس سهرة، كذا شعور يجيني إن اللي حاطتها تسوي نفسها "بنوته" بالقوة. أو إنها شوي حركة سخيفة، بصراحة ما عندي سبب مقنع إني ما أحبها، لكنها ما تعجبني، و أعتقد إني ما حبيت أشكال بذات شارليز و ميشيل علشان الشيء اللي حاطينه على روسهم.

أنتم وش رأيكم؟

Best Dressed: Golden Globe 2012

2012-01-16T12:07:00.001+03:00

أمس أو الفجر كان حفل توزيع جوائز قولدين قلوب صحيح كنت متحمسة أشوف الحفل، و ما زلت، لكن الملابس اللي شفتها على الريد كاربيت ودي أقول إن أكثرها "يسد النفس"، ما أعرف ليه حسيت كل اللي جايات كأنه الحفلة كانت فجأة، بعض اللي جو صدق أشكالهم أي كلام. (حتى روني مارا ما لبست شيء من اللي كان ودي تلبسه :).

لقد لكم بشكل عام كانت أشكال اللي جايات "مطاريس" أو بأحسن الأحوال ما كأنهم جايين لثاني أكبر حفلة بالسنة ... و لأني كنت مشتهية أشوف ملابس صدق راقية، أظن الشخص الوحيد اللي ما خيب ظني، هي أنجلينا جولي.

قلت لكم إن أنجلينا جولي "بالنسبة لي" كانت هي الوحيدة قد الحفلة، بهذا الفستان من أتلييه فيرساتشي (خط الأوت كتو حق فيرساتشي)، الفستان مستحيل ألبسه، و لو شفته ما توقعت أنه راح يكون بهذا الشكل ... ألوانه شكله، كلها ما تحمسني إني أفكر أنه يطلع راقي بالشكل هذا، لكن أنجلينا عرفت كيف تخليه خلو، (أعتقد إن السبب، هو إن الفستان كأنه مخيط عليها).

بصراحة كل شيء أنجلينا سوته، أتوقع إني كنت راح أتجنبه، لكنها قدرت تسوي لوك قد الريدكاربيت صدق. (التطقيم) تعرفون إني ما أحبه، لكن ما أعرف كيف مشي مع أنجلينا (جزم بالضبط زي لون الفستان، روج و شنطة تقريبا زي السفطة الحمراء).

باختصار فستان ما كنت أتوقع يكون حلو، و إكسسوارات لو أحد قالي إنه بيختارها لهذا الفستان كان من الآخر قلت: يع. لكن أنجلينا طلعت بأحسن فستان شفته بحفل أمس.

مين عجبكم من القولدين قلوب؟

Rooney for the Golden Globe?

2012-01-11T17:05:00.000+03:00

قبل لليلتين كنت روني مارا بوحده من المناسبات، ما أعرف بريمير جديد لفيلمها الأخير "ذا قيرل ويذ ذا دراقون تاتو" أو شيء ثاني، بصراحة ما يهمني، لكن اللي لازم أقوله، أظن روني مارا هي السلبرتي الوحيدة بهذي الفترة اللي أنتظر كل مرة وش تلبس، ما أقول إنها ما قد عاجبتني بالشهر الأخير، لكن و لا مرة بالنسبة لي كان شكلها مو حلو، و الأهم إنها أكثر المرات شكلها فوق العادة.

بالمناسبة هذي اللي لسا ما أعرف وش هي، روني كانت لابسة من مجموعة فالنتينو الأخيرة ربيع 2012 ... بصراحة أنا مبهورة بشغل اللي يختار لها ملابسها، ما أعرف هو اختيار الملابس المثير، أو يمكن شعرها (لونه، و الغرة) هي اللي تعطي الملابس هذا الشكل المثير ...

روني على إنها لبست لون غير الألوان المعتادة اللي كانت تلبسها الفترة اللي فاتت (أسود و رمادي و أبيض و درجاتها)، و لون قوي زي الأحمر، لكن لون الفستان ما سيطر على اللوك قلت لكم الشعر، و يمكن الحواجب الثقيلة خلت صعب تلبس شيء، و ما يصير كل الإهتمام على وجهها، مو على أي شيء ثاني، حتى لو كان فستان أحمر من فالنتينو.

الخبر السعيد بالنسبة لي إنه حتى لو حلصت روني ترويج لفيلمها، هي جالسة الحين تصور فيلم جديد مع رايان قوزلينق، و الأهم بالنسبة لي شعرها إلى الآن أسود (أتمنى ما تغيره). لكن قبل ما ينزل أي فيلم جديد لها، روني مرشحة لقولدين قلوب، و أتمنى ترشح لأوسكار، مع إني لسا ما شفت تمثيلها، بس علشان أشوف وش راح تلبس. و لأنه ما بقى إلا 4 أيام على قولدين قلوب، و بعد ما شفت روني بهذا الفستان، انشغلت وش ممكن تلبس للحفل؟

من اليسار فستان من مجموعة فالنتينو أوت كتو خريف 2011، المجموعة بشكل عام أول ما شفتها أعجبتني، و لما جلست أدور فساتين لروني، على طول رحت أشوف المجموعة من جديد، مو بس لأن روني لبست لفالنتينو، لكن لأن هذي المجموعة أتوقع إنها راح تكون من أنجح مجموعات الأوت كتو لموسم الجوائز هذا، و أهم شيء لو لبسته قبل روني، لو تلبسه أتمني تختار روج غامق، علشان تحول هذا اللوك الناعم لقوثيك.

الفستان المخمل الأسود من عزالدين عاليا، الفستان بعد من مجموعة أوت كتو خريف 2012، من أكثر الأشياء اللي أعجبتني بالمجموعة، أتمنى أشوفه على أحد، ما كان ببالي أحد أول ما شفته، لكن الحين أظن أنه مناسب لروني.

الفستان الأبيض من مجموعة رالف لورين ربيع 2012 الأخيرة، المجموعة أعجبتني مرة، المجموعة بشكل عام مو ستايل روني، لكن هذا الفستان بالأشياء اللي على الكتف أتوقع بيطلع حلو عليها.

الفستان الأخير من مجموعة حيدر أكيرمان، أول ما شفت العرض أعجبني مرة حسيته يستاهل ريد كاربيت، لكن ما كنت أعرف روني أو على الأقل ما كنت أعرف ستايلها، لكن الحين أظنها هي الوحيدة اللي ممكن تلبس شيء زي كذا، و لا يطلع مبتذل عليها.

شرايكم بالإختيارات؟ و وش رأيكم بستايل روني مارا لو كنتوا متابعين؟

The Other Iron Lady

2012-01-07T00:31:00.000+03:00

الفترة هذي فيه الترويج لفيلم ميريل ستريب ذا آيرون لايدي عن مارقريت ثاتشر ... قبل فترة مو قصيرة سوت هاربار بازار إيدتوريال عن هذا الشيء كان مرة ظريف (راح أرفعه لكم، و أحط رابطه، بس الحين فيني شوي نوم، فأنتظروا بكرا إن شاء الله، شيكوا على الموضوع من جديد و بتلقون رابط لها :). هذا هو الإيديتوريال إن شاء الله يعجبكم.

ما راح أتكلم عن لبس مارقريبت ثاتشر، و لا عن ميريل ستريب اللي أحبها مرة، لكن عن مرأة ثانية بعد مهمة، لكن بس اليوم لما شفتها بالأخبار، جا ببالي، ليه ما عمري تكلمت عنها، مع إنها تعجبني مرة.

المرأة هذي هي زعيمة المعارضة بمينمار (بورما)، إسمها أون سن سو تشي، شكلها كيوت، لبسها دائما مرتب، ما أعرف كيف غابت عن بالي، بس ما علينا سويت لها سيت تعويض. (بالمناسبة ما زلت أستقبل حساباتكم على بوليفور لو بغيتوا تشاركون معاي بالمدونة).

The Other Iron Lady by dejavuar featuring j crew sandals

The Row slim fit shirt, $1,067
Jason Wu floral print skirt, $1,250
J.Crew j crew sandals, $198
Rodo leather clutch, $645
Gunmetal earrings, 50 AUD

دورت صور أحسن لها بس ما لقيت، لكن و أنا أدور على صور أكتشفت أنهم السنة هذي اللي خلصت طلع فيلم عنها تمثل دورها ميشيل يوه، لو بغيتوا تعرفون عنها أكثر، و تشوفون لبسها (تراني ما شفت الفيلم)، بس أحب بلبسها إنها دائما تلبس تننانير، كأنها لافتها عليها، و دائما مع بلوز قصيرة، يمكن أكثر شيء أحبه فيها، هي الزهور اللي تحطها على شعرها، و لأني ما أحب حركة الزهور تنحط على الطالعة و النازلة، قررت إني أختار بدل عنها هذي الحلقات اللي أعطتني شعور إنها زهور برية صغيرة، بس ذهبية. و تراي حبيت الصنادل كثير، بصراحة حابة اللوك كامل :).

لو كنتوا تعرفون أون سن سو تشي، وش رأيكم بلبسها؟ و لو ما تعرفون وش رأيكم بالسيت؟

Men's Swim Short

2012-01-01T20:06:00.000+03:00

قد تكلمت قبل من زماااان عن حبي لشورتات السباحة حقت الرجال، أتذكر سويت لوك لها، بعدين أقنعت أختي إنها تشتري (هي تحب هذي الأشياء) بعدين أكتشفت لما شفت سيكس آن ذا سيتي متأخر يمكن قبل سنتين إن كاري براد شو قد سوت الحركة، أظن بحفلة بالصيف كانت بهامبتونز.

بأسبوع الموضة بنيويورك الخريف اللي فات شفت هذي الصورة (يمين) لهاناه قابي و هي لابسة هذا الشورت، زي تقريبا كل لبس تلبسه هاناه يعجبني كيف أنه كل مرة أحس إنها صدق تنبسط و هي تختار لها ملابس.

شفت اليوم هذي الصورة لريانا و هي بإجازة أظن ببربادوس و هي لابسة هذا الشورت مع التي الأبيض هذا، أعجبني كيف مزينة ريانا اللبس (العقود)، يمكن أشوف الكعب شوي مبالغة، يعني بالنسبة لي بيكون شكله حلو مع جزم كونفيرس، أو يمكن شباشب. علشان كذا رحت أشوف مستر بورتيه، لأني أحب هذا الموقع، حتي لو ما كان يبيع إلا ملابس و أغراض رجال.

قلت لكم رحت لمستر بورتيه، و دورت بشورتات السباحة اللي عندهم، و لقيت أشياء كثيرة، لكن الشورتين هذولا اللي فوق، أكثر شيء عجبوني، بالذات الأزرق اللي على اليمين أتمنى لو ألبسه الحين، و زي ما سوت ريانا تي شيرت أبيض، سلاسل كبيرة ذهبية، و خلاص هذا كل شيء.
أسعارها مو رخيصة، بس لو بغيتوا تشيكون عليها، هنا تلقون السماوي، و هنا البيجي الفلورال.

شرايكم بشورتات السباحة الرجالية؟

Be My Guest

2011-12-31T16:16:00.000+03:00

من سويت هذي المدونة و أنا دايم أقول إنها مو لي، لو كانت لي لحالي، كان سويت لي دفتر يوميات و كتبت كل اللي أشتهيه بالفاشن. بجد أنبسط على تعليقاتكم، و على إيميلاتكم ... علشان كذا فكرت أنه للسنة الجاية هذي، مو بس تردون أو ترسلون إيميلات، أو تشاركون الرابط مع أحد، الشيء اللي أتمنى أنه يصير، إنكم تشاركون بالمدونة معاي.

من سنتين تقريبا سجلت بموقع بوليفور، و بمرات كثيرة شاركتكم بعض السيتز اللي سويتها على الموقع، و أكثرها زي ما كنت أوضح، تأثير من أشياء شفتها. الفكرة اللي جت ببالي، لو كان عندكم حساب بيليفور، أو ودكم تسون "لوكز" ترى الموقع سهل و حلو، و لا يحتاج فن أو معرفة بأي برنامج، علشان تسوين سيت حلو، بس يكفي إن عندك ذوق. المهم لو تبغون تشاركون بالستز حقاتكم بهذي المدونة، بس علقوا على الموضوع، حطوا فيها اليوزرنايم حقكم، أو ممكن ترسلونه على إيملي dejavu_ar[at]hotmail.com ... (طبعا كالعادة بدل كلمة at أكتبوا @). و راح أتبعكم على طول، و إن شاء الله كل شهر راح أحط أحسن الأشياء اللي شفتها، و لو قدرت راح أتواصل مع صاحبتها، لو بغت تكتب موضوع عن السيت، علشان ينحط معاه. حتى لو بغيتي تحطين بالموضوع حساب تويتر حقك، أو حساب تمبلر حقك، علشان الناس تشوف وش عندك و تتبعك، أكيد ما عندي مشاكل.

زي ما قلت لكم، بأكون مبسوطة لو شاركتوني بأشياءكم، لأني أعرف إني ما يمكن أرضي كل الأذواق، و لا يمكن أمثل كل الأذواق، حتى لو حاولت إني أكتب عن أشياء، ما ألبسها، أو أشوف إنها ما تناسبني، بالنهاية أنا أكتب عنها من وجهة نظري، مو من وجهة نظركم أنتم ... ودي أعرف أكثر عن أذواقكم، و يشوف الناس اللي يقرون هذي المدونة، شيء ثاني غير اللي دايم أتكلم عنه.

Soap & Glory Is Here

2011-12-30T12:05:00.003+03:00

بالصدفة يمكن على بداية هذا الصيف تعرفت على هذي الماركة البريطانية (تعرفت عليها نظريا)، يعني ما جربتها، و لا شفتها قدامي، كل اللي عرفته عنها بالنت. اللي خلاني أتمنى إني أجربها، هي طريقة تعليبها، أعترف إن عندي نقطة ضعف تجاه التعليب، ممكن أشتري شيء، بس لأن علبته حلوة :) آخرتها مرطب شفايف (اللي ما أعترف فيها، و أظن إن السعابيل أحسن مرطب شفايف بالعالم)، لكن علبته أغرتني بشراءه :).

قلت لكم أول مرة تعرفت على الماركة كان بالنت من موقع سيفورا، رحت لسيفورا اللي عندنا ما لقيتها، و لا لقيتها بسيفورات ثانية مثل البحرين و الإمارات، و لأنه ممنوع شحن السوائل للسعودية، قررت إني أبلع العافية، و أشوف لي مكان ثاني غير النت و سيفورا.

دخلت على موقعهم، و لقيت أنهم ببريطانيا يبيعونها بصيدليات بوتز. قررت إني أروح لبوتز عندنا، درت ما لقيت سألت الصيدلي اللي موجود فيها، و قال لي: راح تيجي إن شاء الله. هذا الكلام يمكن قبل ثلاثة شهور أو أكثر.

قبل أسبوع رحت لفرع ثاني لبوتز، و رغم إني ما شفت أي شيء للماركة معروض، أختي قالت لي أسأل الصيدلي، هذي المرة قال لي: المفروض إنها جاية، قريب، بس عندنا حاجة وحدة وصلت. الشيء اللي كان عنده هو جيل شاور، شميت ريحته و أعجبتني، حتى إنها تطول ما تروح عن الجسم.

ما أعرف متى راح تجي باقي الأغراض، بس تقدرون تشيكون عليها هنا بموقعهم. قلت لكم شميت ريحة واحد منهم و كان حلو، فازوا بجوائز كثيرة على مستوى العالم لمنتجات العناية بالبشرة، أسعارهم معقولة، و أهم شيء لأن تعليبهم حلو، يصلح تقدمينها هدية لشخص مثل أختك، خالتك صديقتك، حتي ممكن تقدمينها لي P:.

Wearing Collage

2011-12-25T17:09:00.002+03:00

بعروض الربيع اللي كانت بالخريف اللي فات، كالعادة كان بعرض كريستوفر كاين بلندن شيء مختلف، و هي ملابس شيفون أو أورقانزا، عليها ورود، مو مطبوعة عليها، كأنها مقصصة من قماش ثاني و محطوطة عليها. أكيد أعجبتني، لكن ما توقعت أنه بتكون بمكان ثاني غير بملابس كريستوفر كاين.

نهاية الإسبوع اللي فات طلع اللوك بوك لعروض بري فول 2012 إيرديم. العرض بالنسبة لي ما كان مميز، مثل دايم مليان طبعات ... لكن و أنا جالسة أتفرج تقريبا من آخر الأشياء اللي كانت باللوك بوك، هو هذي التنورة الرمادية اللي على اليمين. أعجبتني مرة التنورة، و تذكرت عرض كريستوفر كاين اللي قلت لكم عنه (على اليمين وحده من الملابس اللي كانت عليها ورود).

أعجبتني الفكرة بكل المرتين مرة، يمكن حبيت ألوان كريستوفر كاين أكثر، لكن عجبتني تنورة إيرديم. الشيء اللي أتمناه الحين، بعد ما شفنا أحد غير كاين مسوي هذا الشيء، هل ممكن نشوف هذي الأشياء إن شاء الله بمحلات الهاي ستريت؟ إن كان فيه محل راح يسويها أرشح توب شوب.

Inspiration 6: Messy Hair+ Green Accessory

2011-12-25T10:42:00.000+03:00

هذا اللوك ما من ليا سيدو ما تحملت تنتهي السنة و أنا ما تكلمت عنه، بالنسبة لي ليا هنا شكلها كان من أحلى الأشكال اللي شفتها هذي السنة على الريد كابيت. يمكن أبالغ، خصوصا إني من السنة اللي فاتت، قلت لكم إنها عاجبتني قوة، كل شيء فيها حلو (يمكن بتصير بالنسبة لي كيرستين دونست الثانية:).

أولا ما أعرف فستانها من وين، على الأغلب برادا، لكن مو أكيد (هذا تخميني)، الفستان ما يهمني هنا، أكثر شيء عجبني شعرها. على إنها لابسة فستان سهرات، ليا تركت شعرها بتسريحة جدا بسيطة (فوضوية)، و وجه من دون مايك اب كثير ... بعض الصور زي هذي، تخليني أتمني أنه الحين تجيني مناسبة كبيرة، علشان أسوي زيها.

الشيء الثاني اللي اللي أعجبني هو إنها أختارت شنطة خضراء مع فستان زي كذا كله ألوان كلاسيكية ... قولوا عني إني منحازة، لكن أحس إن اختيار الشنطة الخضراء مع ألوان "تعودناها" على الفساتين فكرة عبقرية :) ... هنا بتلقون صورة أوضح للشنطة.

شرايكم بتسريحة الشعر بالشكل هذا؟ و الشنطة الخضراء؟

Inspiration 5: Prints

2011-12-23T10:36:00.000+03:00

السنة كانت كلها تقريبا عن الطبعات، ورود، ألوان مربعات، فواكه خضار ... عدد لا نهائي من الطبعات على كل شيء، فساتين، تناننير، بناطيل، قمصان و ... و ..... يعني من الآخر، صعب أنك بهذي السنتين أبدا أبدا ما شريتي شيء بطبعات، و إن كان السبب اللي خلاك ما تشترين هو أنك ما تعرفين كيف تلبسينها، بالنسبة لي كانت أرورا سانسون المثال على كيف تلبس الطبعات صح.

أول ما شفت اللبس هذا على أرورا، كان بعروض الموضة بسبتمير، الصورة الأولى كانت بس الجزء العلوي، و تحمست إني أشوف الباقي، ما مر إلا وقت بسيط، و ألقى صورة لها كاملة. لما شفت الصورة أنجنيت أبغى أعرف من هذي المرأة، وقد إيش فاتني من ستايلها، صارت زي ما قلت لكم إسمها أرورا سانسون، إيطالية محررة بمجلة فوق اليابانية.

قلت لكم أعجبني الفستان من أكويليانو. ريموندي، أعجبني كيف مخلية الطبعات تتكلم عن نفسها، لابسة أقل قدر من الإكسسوار، جزمة أحتارت صنادل بألوان حيادية، و الإضافة الوحيدة هي الحلق الأخضر اللي على شكل نجمة بحر.

قلت لكم بالنسبة لي كذا لازم تلبس الطبعات أيا كانت، دائما مع أقل قدر من الإكسسوار، و الألوان، و اترك الطبعات تتكلم عن نفسه :)

شرايكم بموضة الطبعات؟

Designers' Like, 235 SR and Less

2011-12-22T22:38:00.001+03:00

جا وقت التخفيضات، و لأول مرة أسوي ويش ليست على نيت آي بورتيه، علشان أشوف كم تصير بالتخفيض، بس أحسن شيء أنهم ودهم يوفرون علي، و حتى بعد التخفيض أسعار الأشياء اللي عاجبتني مو رخيصة :). لو بغيتوا تشيكون تلقون تخفيضاتهم هنا.

و لأن أسعار نيت آي بورتيه، ما تتماشى مع ميزانيتي رحت أشوف تخفيضات أسوس :)، و أنا جالسة أدور بأسوس لقيت أشياء كثيرة تشبه ملابس مصممين (من اللي ما أقدر عليها عند نيت آي ورتيه:)، لكن هنا أخترت أكثر الأشياء اللي أعجبتني عند أسوس تشبه تصاميم مصممين.

الفستان هذا نسخة من فستان كان بعرض رودارتي خريف 2011، عجبني الفستان مرة (تعرفون إني أحب الفساتين الطويلة)، أحسه مع جاكيت جلد بيطلع مرة حلو، أو لو كنت تبغين تلبسينه بالصيف، أظن أنه بيكون حلو مرة، مع سلاسل ذهبية كثيرة، بأطوال مختلفة.

على اليسار صورة من عرض برين، بعد خريف 2011، لو تتذكرون كان هذا العرض عاجبني مرة، و بذات هذا اللوك، أنبسطت كثير لما شفت هذي النسخة من الجمبر حقتهم، شكلها حلو، طول أكمامها حلو، يمكن بس الألوان، أفضل ألوان برين عليها، لكنها حلوة مرة، حتى لو ما فيها ألوان برين. أعتقد إنها مع بنطلون جينز سكيني بتكون مرة حلوة.

القميص الشفاف هذا، نسخة من القميص اللي كان بعرض أليكساندير وانق خريف 2011، تعرفون إني أحب كثير القطع الشفافة، خصوصا لما تكون سوداء، فأكيد هذا القميص بيكون من قائمة الأشياء المنسوخة، اللي أعجبتني.

عرض بوتشي هذا (خريف 2011) من أحسن عروض بوتشي اللي شفتها الفترة الأخيرة، أعجبني فيه استخدام المخمل، صح النسخة اللي يبيعونها بأسوس مو مخمل، بس لما شغلت الفيديو حق العرض أعجبني كثير شكل الفستان. أعتقد أنه خيار جدا مناسب لحفلات، أو زواجات صغيرة.

شرايكم بالنسخ؟ أو تفضلون الأصليات منها، حتى لو كان سعرها فوق 2000 ريال؟

The Duchess

2011-12-20T16:34:00.001+03:00

كايت ميدلتون أمس كانت حاضرة مناسبة، ما أعرف وين، بس أهم شيء كان شكلها مرة حلو، لدرجة و أنا أدور صور زينة لها علشان أوريكم إياها، لما سويت بحث، و أول مرة من تزوجت بدل ما أدور بحث باسم كايت ميدلتون، من دون شعور، كتبت ببحثي دوقة كيمبرج :).

كايت بهذا العشاء، كانت لابسة فستان أسود مخمل من أليكساندير ماكوين (فستان أسود جديد يعجبني بهذي السنة)، لو ما كنتوا قريتوا موضوع الفساتين السوداء، هنا تلقونه. المهم زي ما قلت لكم، صدق أول مرة أحس إنها دوقة أو إنها شخصية ملكية، و أول مرة أصلا يعجبني شكلها من قبل ما تتزوج، و من بعد ما تزوجت، و حتى يوم زواجها ما عجبتني مرة (لو تتذكرون كتبت عنها). الفستان هذا واضح أنه نسخة مسوية لها لحالها، لكن عند نيت آي بورتيه، يبيعون واحد نفس الموديل، لكن الجزء السفلي فيه شفاف، يمكنه بالأساس نفس الفستان، لكن أكيد إن كايت ماراح تطلع بشيء شفاف زي كذا. عجبتني المجوهرات اللي لابستها، عجبني مكياجها (أول مرة أحبه)، بالعادة كحل عيونها سيء جدا، شعرها زي دايم حلو. يمكن لو فيه شيء وحيد ودي أغيره، هو الشنطة اللي شايلتها، ما عجبني كثير إنها سوداء مخمل (صراحة ما أعرف شعوري تجاهها، هي عاجبتني إنها مطقمتها مع الفستان أو لا :).

شرايكم بستايل كايت ميديلتون؟ وش أكثر لوك لها عجبكم هذي السنة؟

Inspiration 4: Red Jewelry

2011-12-17T15:04:00.001+03:00

السنة هذي (اللي بتخلص) أعدت اكتشاف بيانكا بالتي، طبعا إعادة الاكتشاف هذي جت على مستوى شخصي، هي انقطعت فترة بعد ما أنجبت، بعدين لما رجعت مرة ثانية اكتشفت إنها جميلة، و إني ما أعرف كيف كانت حاسة البصر تشتغل عندي :)، ما علينا من شكل بيانكا، لكنها بعد فترة قصيرة من عرض مجموعات خريف 2011 ألبست هذا اللوك من No. 21.

اللوك تقريبا بالضبط زي اللي كان على الكاتووك، يمكن بس الجزمة، بيانكا إختارت كعب ثاني من المجموعة (هنا اللبس بالعرض). زي ما قلت لكم اللبس تقريبا نفسه، بس لأني أحب سمار بيانكا، و عيونها الزرق أخترت اللبس عليها :). ما يهم للمرة الثانية، نرجع للشيء اللي أعجبني باللبس. أكثر شيء حبيته، و ظليت فترة أفكر بجدية فيه، هو المجوهرات أو الإكسسوارت الحمراء، أعجبتني مرة، لدرجة أنه كنت ودي أشتري الإكسسوار الأحمر اللي طلع مع تعاون H&M مع لانفين، الشتاء اللي فات، لكن كل مره أشيك على أسعارها بـ eBay ألقاها مو معقولة، أحب فيها إنها كأنها لعبة، أحس إنها تدخل اللبهجة على اللبس.

شرايكم بالمجوهرات الحمراء؟ أو أي شيء غير عن الألوان اللي تعودنها (ذهبي/أصفر، فضي، ذهبي/وردي)؟

Inspiration 3: Lingerie + Heavy Accessories

2011-12-16T17:55:00.000+03:00

كنت قبل فترة كنت أدور على قمصان نوم، كان ودي ألبسها كفستان، طبعا اللي ببالي مو قميص نوم من هذولي الشيفونات و الدانتيل، بس شيء يشبه اللي بالأفلام القديمة، المهم ما حصلت اللي أبغاه، و بعدين بالصيف شفت ماريانا لينشوك (إذا كان هذا النطق الصحيح لإسمها) بزواج صديقتها (العارضة الثانية) آنيا ريبوك. و هي لابسة "شلحة" للزواج.

ماريانا ما لبست اللبس بالشكل اللي كان ببالي، لكنها لبسته بشكل حلو مرة، لبس الشلح مع إكسسوارت كثيرة و ثقيلة. بداية من الأبوات اللي أظنها لوبتين. مع شنطة مودموزيل شانيل، تشوفون يدها مليانة مجوهرات (خواتم و أسوار)، و زيادة على كذا لابسة هذا العقد الكولار هذا. بالنسبة لماريانا الإكسسوار ما وقف على كذا، أضافت معها هذي المهفة.

شرايكم بشكل ماريانا؟ و هل ممكن تلبسون شيء زي كذا (شلحة، أو قميص نوم) كفستان، أو لبس لبرا؟

Comic, Comic and Comic

2011-12-16T12:21:00.000+03:00

من كنت صغيرة و أنا أحب مجلة ماجد، و ميكي، صح أهلي كانوا مانعيني من ميكي، يقولون موب مفيدة، بس ألقاها بعض المرات عند خوالي :). إلى الآن أحب الكوميك (القصص المصورة)، و لو تتركون عندي مجلات كوميك، يمكن أنسى نفسي من كثر التقليب. وش أسوي أحب الرسمات هذي تفرحني :).

أمس طلعت مجموعة فليب ليم بري فول 2012، أول ما شفت أول صورة بالعرض، دخل السرور إلى قلبي، لأني حسيت فيه ريحة كوميك بالمجموعة، و لا خاب ظني.

إن كنتوا مفكرين بكوميك، كوميك، يعني رسوم، لا الملابس ما فيها هذا الشيء، بس فيها زي ما أنتم تشوفون الحروف و الألوان اللي على الشنطة، و الكنزة، و الكارديقان اللي بالعادة تجي مع الكوميك إيقاعات مثل "بووووووم"، "طرررررراخ" "دوووووف"، أشياء زي كذا، و أنا مسختها، بس بخاطري أكتب كلمات بخروف مكرره، فهذي هي فرصتي P:. من الثلاثة أشياء، الكنزة هي المفضلة عندي، و أكيد لو سوت محلات الهاي فاشن أشياء تشبه لها، راح أشتريها.

اللوك الثاني من اليمين دخلته و هو ما فيه أي شيء كوميك، مو لأنه أعجبني، لكن أعجبتني مرة الشنطة اللي شايلتها العارضة، قبل فترة شفت شنطة بركين إيرميس إصدار محدود كذا شفافة (طبعا شفتها بصور ستريت ستايل)، و عجبتني مرة، لكن أنا شناطي ممكن تكون كل شيء، غرف نوم، صيدلية، تسريحة، و بعد زبالة، لأني ممكن أحط فيها بقايا الأشياء اللي أكلتها، أو استخدمتها، و لا حوالي زبالة :)، فشنطة مو شفافة مرة، بتكون خيار أحسن من بركين إيرميس الشفافة :).

Effected

2011-12-15T15:34:00.001+03:00

ما كنت أؤمن أنه ممكن ممثلة يتأثر شكلها بدور هي مثلته، مع إني ما زلت أردد إن آن هاثواي ما تعدل لبسها إلا بعد "ذا ديفيلز وير برادا". لكن بعد ما شفت كيف روني مارا تغيرت بعد تمثيلها فيم "ذا قيرل ويذ ذا دراقون تاتو" عرفت كيف الدور ممكن يأثر على حياة ممثله.

من اليسار روني قبل ما تصور الفيلم، و من اليمين صورة لروني قبل شهر بوحدة من المناسبات، (شوفوا هنا شكل روني بالفيلم). بالنسبة لي أنا حابة التغيير اللي سوته، عاجبني القوثيك عليها، الشعر الأسود، مع الحواجب و الغره القصيرة، مناسبة مرة عظام وجهها، و بالنسبة لي أتمنى تبقى على هذا الشكل.

لما شفت الصباح هذي الصورة لروني و هي تروج للفيلم حقها (نفسه)، بالسويد، و لابسة هذا الفستان الأسود من برابل قرونق، تأكدت أنه روني المفروض ما ترجع لشكلها الأول، مو لأنها مو حلوة فيه، لكن لأنه بهذا الشكل مستحيل أحد يشوفها و ينساها، لكن يوم بشكلها الأول شفتها أكثر من مرة، و كل مره أنسى كيف شكلها، لما أقرى عنها شيء.

شرايكم باللوك القوثيك؟ و بأي شكل عجبتكم روني أكثر؟

Inspiration 2: Sweater+ Pleated Skirt

2011-12-14T12:23:00.000+03:00

بالعادة، يعني بشكل عام تايلور سويفت ما تعجبني (ما أعرف أغانيها) بس قصدي ستايلها، يمكن الموضوع راجع لشعرها اللي قليل ما أشوفه بشكل مختلف، لكن المرة الوحيدة اللي شفته فيها مستشور، ما عجبني.

قبل فترة بعد شفت لها صورة و هي تمشي بالشارع، ما أعرف رايحة لوين أو جاية من وين، بس شكلها أعجبني مرة، و هذي من المرات يمكن النادرة اللي أحب شكلها فيه، لكني كل مرة أشوف الصورة، أحس بتأنيب ضمير إني ما كتبت عنها.

التنورة المكسرة، من فترة و هي عاجبتني، ما أعرف إن كنت ما شفتها موظفة بشكل حلو من قبل، أو إني ما شفت تنورة مكسرة لحد الآن تعجبني.

تعرفون من زمان إني أحب هذا اللون الأصفر الماسترد (خردل)، و يمكني بعض المرات انحاز له، حتى لو ما كان يستاهل، لكن هذي المرة شكل تايلور، بالتنورة المكسرة هذي و الكنزة الكحلية مرة حلو. أعجبني شكل شعرها، أعجبني لون الروج الأحمر حقها و الجزم الفلات اللي تقريبا نفس اللون، و حتى الحلقات اللؤلؤ اللي هي لابستها معاه. بالنسبة لي و خصوصا أنه الوقت مناسب، أعتقد أنه هذا اللوك بيكون مره حلو لمناسبة بسيطة بالوقت هذا من السنة (الفترة القصيرة هذي اللي نقدر نلبس فيها ملابس ثقيلة).

باختصار اللي تسأل و تقول وش ممكن بنت عمرها 21 تلبس، أظن أنه هذا لبس مناسب لشريحة كبيرة من البنات بالعشرينات، و بعد بالطعشات :).

شرايكم بشكل تايلور سويفت هنا؟ ممكن تلبسون زيها؟

The Military Effect

2011-12-13T21:44:00.000+03:00

من فترة و أختي تدور على جاكيت جيش، آخر شيء اضطرت إنها تخيط واحد. أنا و أختي أذواقنا مختلفة، لكن هذي المرة مارست عليها دكتاتورية، وقلت لها إنه لما يطلع الجاكيت بنطرز عليه ورود، لأني أحب خلط أشياء بأشياء، يعني أعرف أنه تقريبا ما فيه علاقة بين الورود و الجيش، لكن حبيت الفكرة.
أمس أو قبل أمس طلعت مجموعة تاكون أديشين بري فول 2012، أعجبتني المجموعة مرة، خصوصا أنه تأثير الجيش واضح فيها، هذي أكثر قطع عاجبتني فيها.

قلت لكم أعجبني تأثير الجيشي بالمجموعة، اللون الزيتي، و شكل الجاكيتات أعجبتني مره، اللبس اللي بالوسط، الجاكيت اللي فيه حسيت أنه هذا الجاكيت اللي ودي لو دريت عنه قبل، إني أغصب أختي عليه، لكن ما علينا إن شاء الله بأكمل معها مشروع التطريز، أو نشتري آيرون آون عليها ورود و أشكال ثانية و نحطها، على الجاكيت، بعدين الفقرة الأخيرة ألبسه أنا :).

شرايكم بتأثير الجيش على الملابس؟

The Great Kirsten Dunst

2011-12-12T22:08:00.001+03:00

تعرفون إني أحب كيرستين دونست، و أحب ستايلها. السنة هذي كيرستين كان عندها أكثر من فيلم، فكانت موجودة بمناسبات كثيرة، و لأني أعرف إني ما أكتب بس لنفسي، رحمتكم، و لا كتبت عن كل لوك طلعت فيه، لكن ما أظن أقدر أتحمل تخلص السنة، و أنا ما تكلمت عن كثير من ملابسها اللي أعجبتني.

المجموعة الأولى من الملابس هي لكيرستين بالشارع، أحب عندها اختيار الألوان (دائما محايدة و قليلة، و بسيطة)، و نفس الكلام ينطبق على القطع اللي تلبسها.

من اليسار كيرستين لابسة شورت وردي من إيزابيل مارون و سويتر رمادي (قلت لكم أكثر من مرة إني خاطري بسويتر رمادي)، باللوك اللي على اليمين عاجبني أنه ألوان الأشياء تقريبا كلها بتصير بيضاء، تنورة جينز فاتح، قميص وردي فاتح و شنطة نود. الفستان الثاني اللي من اليمين أعجبني نقشاته (كبروا الصورة علشان تشوفون أوضح)، أعجبتني الجزم الكلوي اللي لابستها.

زي ما قلت لكم كيرستين على الريد كاربيت و بالشارع كانت حلوة مره. و لما قلت لكم عن "الثانية"، اللي كانت لابسة من دولتشي آن قابانا مجموعة ربيع 2012، اللي عليها خضار لما تتكلمت عن فليستي جونز هي كيرستين دونست. فستان الطماط هذا سرق لي قلبي :). اللبس اللي بعده التنورة من شانيل، و التوب من برادا كلهم ريزورت 2012، صحيح الشكل مره كلاسيكي لكن مع المايك آب حقها طالع حلو. آخر فستان من ديريك ليم، غير إني أحب الفساتين البسيطة، عجبني كيف أضافت كيريستين لها هذي الشنطة اللي عليها مجوهرات ثقيلة.

Inspiration 1: Maxi Skirt + Statement Earrings

2011-12-11T11:56:00.001+03:00

تجيني أسأله كثيرة عن التنورة الطويلة، و كيف تلبس أو وش يصلح معاها أو ناس مو عاجبتهم ... للي وده يلبس تنورة طويلة، أو للي تلبس تنورة طويلة غصب عليها (لأسباب اجتماعية، أو بعضهم يصنفها دينية)، الشيء الجيد، أنه التنورة الطويلة، و الفساتين الطويلة (حتى لغير فساتين السهرة)، صارت بكل مكان، بأشكال و ألوان مختلفة.

و لأني من فترة بغيت أحط عن بعض "اللوكز" اللي أعجبتني طول السنة هذي اللي بتخلص، بس ما أمداني أكتب عنها لأسباب مختلفة، إني أحطها هنا، كجزء من إجابة عن أسئلة هذولا اللي يسألون، و بعد علشان أوريكم، وشي هي الأشياء اللي تعطيني أفكار، لملابسي :).

أول ما شفت الصورة هذي قبل فترة، تمنيت إني الحين أطلع لزواج، روكساندا إلينتشش، مو بس شكلها لطيف، لكنها تصمم ملابس مره حلوة، و أعتقد إنها مع مجموعة مصممين ثانين، سنة 2011 كانت سنتها. ملابسها لبسوها مشاهير كثير، و أغلب المرات كانت أشكالهم فيها، حلوة.

بالصورة روكساندا لابسة قطعتين (تنورة طويلة، و توب) من مجموعتها ريزورت 2012 ... أعتقد إن روكساندا هنا تعطي دوس كيف الواحد يلبس التورة طويلة، (أقل قطع ممكن من الملابس) يعني تنورة طويلة و تي شيرت أو قميص سادة بيكون مره حلو، و لو بغيتي تحولين اللبس للبس سهرة أو حفلة، أظن روج أحمر، و حلق كبير زي اللي روكسانا لابسته، مع تسريحة بسيطة يكفي علشان يطلع شكلك حلو :).

بالنسبة لي هذا لوك لازم يتسوى، ما أعرف عنكم أنتم، وش رأيكم؟ وش رأيكم بموضة تنانير الطويلة؟

Not Tight, Tight

2011-12-09T09:13:00.001+03:00

تعرفون لما كنا أطفال، لما كنا نستخدم عبارة "حلمي إني أسوي ....."، أمس و أنا جالسة أقلب بمجموعة تيسكينز ثيروي بري فول 2012، قلت لأختي من دون شعور ... حلمي إني ألبس من تيسكينز ثيروي :).

ملابسه كووول، لو كان ممكن أحد بالعالم يحتكرني، كان أخترته هو، لأني أحس لو ما لبست إلا منه، ما مليت، و لا صار لبسي ممل. المهم خلوني أتكلم لكم عن شيء عجبني بالمجموعة، ما أعرف عنكم أنتم.

بالعرض العارضة كانت لابسة شيء كأنه بنطلون شفاف مشكوك، أو تايت بس مو ضيق، ما أعرف وشو لكن أعجبني شكله، و أعجبني كيف جمعه مع باقي اللبس ... أعجبني الأسود بالذات، مع الشورت و مع الفستان. أكيد ودي أجربه، لو لقيت نسخة أرخص منه، أو لو أوليفييه تيسكينر، تكرم علي و أرسل لي واحد هدية، أو لو أرسل لي أي أحد هذي الأشياء هدية :)

باقي المجموعة مرة حلوة، أعجبني الفستانين البيض اللي بالأخير، شوفوا أنتك المجموعة كاملة هنا.

شرايكم بالتايت الواسع، أو بهذا البنطلون الشفاف تحت الملابس؟ أو وش أعبكم من المجموعة؟

Rising Star

2011-12-08T11:02:00.001+03:00

قبل فترة مو قصيرة تكلمت لكم عن إيما واتسون، و إنه لبسها طالع حلو مرة، و قليل مرات بالنسبة لي ما يعجبني لبسها فيه. اليوم راح اتكلم عن وحدة ثانية، بعد هذي السنة كان لبسها فيه مره حلو، و تستاهل أنه أحد يتابع ستايلها، أكيد لو استمرت بهذا الشكل.

للحق أنا ما أعرف فليستي جونز ليه هذي السنة متواجدة بكثرة، أعرف إنها ممثلة بريطانية، شفت لها فيلم، كان دورها مو كبير فيه، بس وش جالسة تسوي الحين على المستوى المهني، ما أعرف :) كل اللي أعرفه إنها جالسة تلبس لبس حلو :).

من بداية السنة يمكن بفبراير طلعت فاليستي بهذا الفستان المخمل الكحلي (أكيد على اليسار)، أعجبني كيف مسوية شعرها، و أعجبتني الشنطة اللي شايلتها معاها، أعطت شكل مختلف للفستان اللي بسيط جدا. اللبس اللي بالوسط هو فستان من بروينزا سكولير مجموعة صيف 2012، فليستي مو أول وحده تلبس من المجموعة اللي ما نزلت للأسواق إلى الآن، لكن أعجبني أختيار اللون، الصندل حلو، و أكثر شيء عجبني بطانة الفستان المنقشة (بعد لبست لوك ثاني من المجموعة). آخر شيء على اليمين، فستان أزرق من كالفن كلاين ... يعجبني فيها كيف تلبس فساتين لون واحد، مع أقل التفاصيل، و تطلع حلوه مره فيه.

المجموعة الثانية التفاصيل بالفساتين أكثر شوي (من اليسار) من الفساتين القليلة اللي لبستها فليستي و عليها طبعات أكثر من لون، إن كنتوا منتبهين هو واحد من مجموعة الخضار اللي صمموها دولتشي آن قابانا بعد لصيف 2012، عجبني مره فستان الباذنجان عليها، و بعد مو هي الوحيدة اللي لبست من هذي المجموعة قبل لا تنزل (لو حصل لي راح أكتب عن "الوحده الثانية" :). الفستان الذهبي اللي بالوسط من كلوي، عاجبني لونه، و أكثر شيء عاجبني اختيار الجزم معاه، لونها مره حلو ... آخر فستان من بوربري، الفستان مو هو الوحيد الأسود اللي لبسته فليستي، يمكن لبست 3 غيره هذي السنة، لكن حبيت فيه زي كل اختيارات فليستي بساطة الشكل، و كيف إنها بمايك آب بسيط و تسريحة بعد بسيطة تطلع حلوه.

أظن لو أنت بنت، و ما تعرفين كيف بالضبط تختارين ستايل، أعتقد إن ستايل فليستي، يناسب كل بنت، و لا هو صعب، و فيه كثير من أشكال الملابس اللي تلبسه، موجود بمحلات الهاي ستريت، يعني حتى مو مكلف :)

Mastering Silver

2011-12-06T19:58:00.001+03:00

علاقتي بأوسكار دي لا رينتا مرت بمراحل، أتذكر أول ما عرفته شوي لأعبده من كثر ما كانت ملابسه عاجتني ... تدهورت العلاقة بعد فترة، يمكن من كثر الفساتين اللي من تصميمه ما عجبتني على الريدكاربيت ... الشيء اللي لاحظته كل موسم، أنه كل القطع الفضية اللي يصممها أحبه، إلى اليوم و أنا عاجبني الفستان الفضي اللي من مجموعته لبري فول 2011.

مجموعة بري فول أوسكار دي لا رينتا للسنة الجاية 2012 إنعرضت أمس ما عجبتني المجموعة مره، يمكنها بشكل عام من أضعف مجموعاته بالسنتين الأخيرات، بس زي كل مرة، أوسكار سوى قطع فضية حلوة مره.

القصة بدأت معاي من السويتر اللي على اليسار ... من فترة مو قصيرة و أنا ببالي سويتير أو تي شيرت حلو رمادي، لكن ما لقيت شيء يعجبني، أو أسعارها مبالغ فيها، هذا ما يعني أنه أوسكار دي لا رينتا رخيص (أغلى ماركة أمريكية)، لكن مجرد إني أشوف شيء حلو زي كذا وسع صدري.

الفستانين اللي بالوسط و اللي على اليمين أظن أنهم يستاهلون يكونون على الريد كاربيت (خصوصا اللي بالوسط)، ما أتذكر شفت فستان فضي حلو زي كذا، من دون مبالغة أول ما شفته شوي لأشهق بصوت عالي.

Sasha

2011-12-05T15:09:00.001+03:00

أظن موضوع التعاونات ما راح ينتهي أبدا، اليوم و أنا أدور بأخبار الموضة ... شفت يمكن أغرب تعاون، شيء ما توقعته. هو تعاون بين العارضة الروسي ساشا بيفاروفا و قاب.

قبل فترة طويلة، شفت هذي الصورة لساشا بتمبلر، ما أعرف أنا شفت الصورة أول، أو عرفت إنها تعرف ترسم أول، لكن لما شفت كيف رسمها حلو، استغربت من إنها عارضة، يعني علشان نصير صادقين مع بعض ما أظن الواحد لازم يكون موهوب علشان يعرض ملابس، يكفي تصير الوحده طويلة و نحيفة و خلاص.

التعاون اللي بين قاب و ساشا مو زي كل التعاونات، أحد يصمم لأحد، ساشا قدمت مجموعة ملابس داخلية (تلقون بعض منها هنا) عليها رسمات هي اللي راسمتها. ما أظن هذا تعاون خاص بأمريكا، أو بالإنترنت أو بقطع محدودة، لكن ما عندي فكرة لو تنباع القطع بفروع قاب اللي عندنا، و علشان أكون صريحة معاكم، ما أعرف إذا قاب يبيع ملابس داخلية عندنا أو لا :).

الخبر الحلو، فيه كلام أنه ساشا عندها تعاون جاي مع كارل لاقرفيلد (ما أعرف إذا لشانيل أو لشيء ثاني)، و مع ميوتشا برادا (بعد ما أعرف إذا لبرادا أو ميوميو، أو شيء ثالث).

آخر شيء ما أعرف إذا ساشا بتظل تعرض، و تسوي إيديتوريالز، أو بتتحول للمعارض الفنية، أو ببتحول لسيدة أعمال، و تسوي لها خط خاص ملابس عليه رسوماتها؟!!.

Heathers

2011-12-01T16:46:00.001+03:00

من زماااان ما كتبت عن ملابس فيلم معين، أحس الأفلام ما عادت تحط ملابس حلوه، كلها مكرره ... بس قبل فترة مو قصيرة شفت فيلم قديم من الثمانينات مره حلو اسمه Heathers لو ما كنتوا تعرفونه أو ما شفتوه، الفيلم يستاهل.

مو بس قصة الفيلم حلوه، لبس أبطال الفيلم بعد كان مره حلو، أحس كل السيت كان أنيق، (طبعا كل واحد بذوقه)، بس من دون مبالغة زي، و كالعادة أجيب أسوء مثال عندي قوسيب قيرل :).

كالعادة، ما راح أتكلم بالتفصيل عن ملابسهم، لأنه أنتم جالسين تناظرون، فما يحتاج أشرح شيء تناظرونه، بس لو كان فيه تعليق، راح أعلق.
باحط الصور على حسب أصحابها ... و أول وحده أكيد بتكون الشخصية الأساسية للفيلم: وينونا رايدر "فيرونيكا".

عجبني هذا الفستان الأسود، أعرف أنه مو واضح مره هنا، لكن لو شفتوها تتحرك، قصته مره حلوه، عريض عند الاكتاف، بعدين بعد الحوض فيه زم كبير ... عاجبني أنه أسود كامل.

ما أدري لو قد قلت لكم قبل أو لا، بس كثير أحب الملابس أوفر سايز ... صحيح الأوفر سايز بعض المرات يكون صعب، خصوصا لو كان عندك "كرفز" لأنه ممكن يخلي هذا الجزء أكبر مما هو عليه أصلا، و كثير بشكل مو حلو.

الروب هذا أول ما شفته ابتسمت ... تذكرت لما كنت السنة اللي فاتت، أنا و أختي جالسين ندور على شيء زي كذا (قبل ما أشوف الفيلم)، بس ما لقينا ... و الحين ما أدخل محل، إلا و ألقى، آخر مره لقيت شيء يشبه هذا تقريبا (نفس الألوان و ورود) عند توب شوب، للي تبغى، بس ما أعرف كم سعره :).

هيذير 1 و 2 و 3:

الفيلم فيه ثلاثة بنات أسمهم هيذير، و كلهم لبسهم حلو كل وخده، بشكل مختلف عن الثاني.

بعد يمكن مو واضح هنا من رداءة السكرين كاب ... لكن اللي حبيته بهذا اللوك إن وحده من الهيذيرز، لابسه إكسسوارات صفراء مع الفستان الأسود، قايلة لكم، إني صايره أحب هذي الأشياء الملونة، و الغريبة، لكن يمكن اللي عاجبني أكثر، هي إنها لابسة هذا الإكسسوار بجنازة :).

آخر شيء، هذي صوره لاثنين من الأولاد اللي بالفيلم، صحيح أنه اللي لابسها أولاد، لكن من فترة بعد و أنا بخاطري هذي الجاكيتات المنتفخة اللي يسمونها بومبير. أحس إني أحتاج واحد بأي شكل :).

Elie Saab Takes Over the Red Carpet

2011-11-29T18:08:00.001+03:00

ما أعرف ليه هذي السنة أحس بفخر بإيلي صعب، صحيح أنه لبناني و مالي شغل فيه، بس جالسة أتذكر كيف قبل أكثر من عشر سنوات لما كنت أقلب كتالوقات الأزياء مع خالاتي، علشان زواج وحده منهم ... أتذكر كيف كانت تصاميمه، و كيف الحين صار.

أتذكر بعد صدمتي الأولى لما كنت أتابع الأوسكار 2001 و اللي فازت فيه هالي بيري، أنه فستانها من تصميم إيلي صعب... ذاك اليوم ما كنت مصدقة أنه مصمم عربي فيه أحد يعرفه، طبعا ما كنت أعرف عاليا، لكن الفرق بينه و بين عليه، إن أيلي صعب بدأ بلبنان بعدين طلع لباريس، لكن عليه أعتقد حتى ما رسم رسمه بتونس.

المهم السنة هذي أعتقد ما فيه مناسبة صارت، إلا و كان على الأقل واحده من الحاضرين لابسة لإيلي ... ما أعرف لازم يشكر الناس اللي تشتغل بالعلاقات العامة معاه، أو يشكر إيلي على فساتينه اللي إذا ما كانت حلوه، على الأقل ما قد صار أي فستان على أي أحد شين :).

زي ما قلت لكم قبل، السنة هذي قررت إني أجمع الفساتين اللي أعجبتني من بداية السنة، علشان ما أنساها لما تجي نهاية السنة، لو بغيت أكتب عن أحسن الفساتين بالسنة اللي بتخلص ... المهم، بعد فترة لما شيكت على قائمتي اكتشفت إن القائمة مليانة فساتين من إيلي صعب، ففكرت إني أشارككم، باللي أشوف إنها أحسن، و أشوف تصوتون على أحسن واحد بالنسبة لكم ... من المجموعة اللي قدامي، بالنسبة لي الفستان اللي على اليمين من مجموعة أوت كتو خريف 2011 اللي لابسته كيرا نايتلي، أعجبني مرة، أعترف إني يمكن حتى ما انتهبت له لما كنت أقلب المجموعة، لكن لما لبسته كيرا عجبني مرة، خصوصا أكمامه.

قلت لكم قائمتي كانت طويلة، حتى أطول من هذي الثمانية فساتين، لكن قلصت المجموعة بمساعدة خواتي :) ... المجموعة هذي أعجبني فيها الفستان الأخضر اللي على زوي سالدانا من مجموعة ربيع 2012، للحق ما شفت المجمعة زين، لأني عجازة، لكن بشكل عام قلبتها، عجبتني الألوان القوية فيها (فيها أخضر و أزرق نيلي، و أصفر) لأنها ألوان ما أتذكر إن إيلي قد استخدمها (بهذي القوة)، لما شفته زي ما قلت لكم على زوي، عجبني خصوصا مع لون بشرتها. لكن المفضل عندي من هذي المجموعة (مو كفستان) كشكل عام هو ليا سيدو (يسار) بالفستان الأوت كتو ربيع 2011، ما أحس إني من فترة طويلة اهتميت كيف جسم أي وحده، مادامها تلبس لبس يناسبة و يطلعه حلو، لكن أظن جسم ليا هو اللي أعطى شكل للفستان، أحب كيف إنها مليانه برشاقة (ما أعرف كيف آصفه)، لكنه يعطي الملابس شكل مختلف.

The Backpack

2011-11-26T20:28:00.001+03:00

الشنطة اللي ما تخونك بأي مكان (إلا الحفلات :) هي الباك باك ... ما عندي وحده، بس أختي تحبها كثير، و أما أفكر فيها بجدية، الشيء الوحيد اللي يخليني أتراجع عن الفكرة هي إني ما أنزل الشنطة مني طول ما أنا لابستها، بجامعة، أو بسفر، فصعبة شوي إن أجلس و على ظهري باك باك، إلا لو أخترعوا كراسي محدبة :)

من قبل ما أفكر بباك باك، هذا الصيف ذا رو إذا تتذكرون نزلوا خط الشنط حقهم، ذا رو ما يمزحون أبدا، أول ما شفت الشنطة هذي (السوداء اللي على اليسار) على وحده من الأولسينز عجبتني على طول، لكن يوم شفت كم سعرها، كالعادة كأنه فيه أحد أعطاني كف ... لكن على الأقل هذي بـ 14 ألف، مو اللي جلد تمساح اللي سعرها تقريبا بـ 122 ألف ريال!!!.
الشنطة الثانية من مادويل تلقونها هنا.

الصف الثاني يمكن فيها أكثر ثنتين حبيتهم ... الأولي (السوداء) من مارك باي مارك جايكوب، حبيت هذي الشنطة اللي موجودة عند ساكس، بالسعر اللي تشوفونه، عجبتني مرة، أحسها ظريفة :)

الثانية يمكن صورتها هنا مو حلوة مرة، لكن شوفوها هنا عند بلومينق ديلز، عجبني لونها، و أهم شيء أحس إنها تضف أشياء كثيرة، فلو كانت عندي ممكن يوم من الأيام ألقى البيت كله فيها، خصوصا و إن الشنطة عندي مستودع، اللي يدخل فيها ما يطلع.

إذا أنتم ملاحظين، ترتيب الشنط على حسب سعرها، طبعا لو كان الوضع طبيعي، كان ذا رو صارت بتدوينة لحالها، (مو لأنها حلوة، لأنه سعرها غير طبيعي). الشنطتين الأخيرات، أشكالها حلوة، و رخيصة، و تصلح كثير للجامعة.
اللي على اليسار من مودكلوثز، و اللي على اليمين من أوربان أوتفيتير، فيه منها ألوان كثيرة حلوة.

شرايكم بالباك باك، و إذا عندكم وحده مفضلة وش هي؟

Cool Girls

2011-11-23T18:44:00.001+03:00

من أكثر العارضات اللي يعجبوني دري هامنقوي، ما أعرف بس أحس إنها "كووول"، دايم مايك آب خفيف، ملابس بسيطة ... مرة تعجبني. الشيء الثاني اللي صاير يعجبني الفترة هذي نوعية من اللبس ما أعرف وش هي، بس كذا بعد أحسها "كووول" (أعرف إني كأني توي متعرفة على الكلمة، بس أحسها هي اللي تعبر عن بالي.

بأسابيع الموضة اللي كانت قبل شهرين، أظن بعرض فالنتينو كانت أليكسا شونق جاية، لعرض فالنتينو، اللي يعرفني قبل يعرف إني ما أحب لا أليكسا، و لا ستايلها كثير (طبعا هي تعتبر إن ستايلها ولادي)، لكن بذاك العرض كان شكلها بالنسبة لي غير.

أول مره شفت الصورة، كانت الجزء العلوي بس، مع أنه هذا شكل أليكسا بالعادة، يعني ما تسوي شيء غريب بشعرها، لكن أعجبني أختيارها للنظارة هذي مع فستان الفالنتينو الأحمر هذا ... حبيت كيف خلته فستان كاجوال مره، يمكن لأني شفته قبل على ريتشيل وايسز، و كانت مخليته فستان فخم مع تسريحة شعرها، و المجوهرات اللي لابستها معاه.

مو ما عجبني على ريتشيل، لكن حبيته مره على أليكسا ... بعد فترة شفت الصورة كاملة و حبيت شكلها زيادة، خصوصا إنها لابسة معاه سلبيرز حقات مارك باي مارك جايكوبز، السليبرز كانت عاجبتني من الموسم اللي فات، بس لما جت التخفيضات حقت نيت أي بورتيه، لقيتها مخلصة، فلما شفتها على أليكسا انبسطت أنه أحد لبسها بشكل حلو.

المهم نرجع للوك اللي سويته اليوم ... مع كل التعاونات اللي بين المصممين و بعض الماركات آخرها فيرساتشي لـ H&M زي ما تعرفون (ترى جزء من المجموعة كان بفرع المملكة، لو لحقتوا عليه و شريتوا منه شيء قولوا لي :).

أمس (على ما أظن) كان فيه حفل لتعاون بين كريستوفر كاين، و جي براند للجنوز، و كان جاي بعض هذولا الناس اللي يجون الحفلات :) و كانت من بينهم دري هامنقوي، طبعا اللي جايين كانوا لابسين قطع من هذي الجنوز. الشيء اللي أحبه بكريستوفر كين هو أنه يعرف يسوي ألوان نيون تشهي، يخلك كل مرة تحسين إن دولابك فاضي لأن ما فيه قطعة نيون.

Cool by alorwa featuring cutler and gross sunglasses

MTWTFSS Weekday jumper shirt, €7,50
Mulberry low jeans, $310
Keds suede shoes, $45
Proenza schouler bag, $2,804
Cutler and gross sunglasses, $495قلت لكم هذي محاولة أجمع فيها كل الأشياء اللي أحس إنها بتخليني كول، سويتير نيون ... سنيكيرز و شنطة بروينزا سكولير .. دري بالصورة لابسة واحد من بناطيل المجموعة برتقالي نيون (واضح :) و قميص يلمع (قصديري) أعتقد أنه كريستوفر كين ريزورت 2012 ... لو بغيتوا تشوفون المجموعة، أو تشترون منها تلقونها هنا.

lem·on [lem-uhn]

2011-11-20T22:57:00.001+03:00

سببين يخليني أحط هذي الصورة لهذا الإيديتوريال القديم، (مو قديم مرة، يعني السنة اللي فاتت، بس بالنسبة للمجلات قديمة :). السبب الأول إني كنت حابته مره، أحسه كان أحسن إيدتوريال شفته السنة اللي فاتت، و أحسن إيديتوريال شفت فيه طبعات الحمضيات هذي اللي من ستيلا.

السبب الثاني إني أحب الليمون، و الأسبوع هذا صار فيه سبب جديد إني أحبه، فلما كنت أفكر أكتب عن هذا السبب، و جلست أدور صوره حلوة لليمون، تذكرت هذي الصورة، فقررت إني أحطها، مع إنه مالها معنى بالموضوع :).

من عرفت نفسي، و أنا أعرف إن فروة راسي تغطيها طبقة لا بأس بها من القشرة، ما عرفت أبدا أحلها، مرة وحدة تخلصت منها بشامبو مرة غالي، بس مو معقولة إني أشتري كل شهر هذا الشامبو ... فقررت إني أتعايش مع قشرتي. طبعا ما أحاول أغطي راسي كثير، بالذات وهو رطب ... صرت أغسل رأسي بموية باردة، حتى بالشتاء، و مع ذلك ما شفت شيء تغير.

الأسبوع اللي فات قالت لي صديقتي لما تتروشين بعد ما تغسلينه من الشامبو حطي خل، و بعدين غسلي الخل. و لأني ما أحب ريحة الخل، حتى وهي تطير بسرعة، رحت أتأكد من فعالية هذي الطريقة بالنت، لقيت واحد من الحلول يقترح عصير ليمونة، بدل الخل. أعرف يمكن هذا الشيء قديم بالنسبة لكثير منكم، بس للي زيي ما كانوا يعرفون الطريقة، الطريقة بسيطة:

عصير ليمونة أو ليمونتين (على حسب كثر عصير الليمونة).
حطيه أو حطه بعد ما تغسل شعرك من الشامبو، بعدين سوي مساج لرأسك (يعني فرك/ أو فركي رأسك بأطراف أصابعك)
غسل/غسلي رأسك، بعدين و لاااا (شعرك تقريبا ما فيه قشرة :).

إن شاء الله الحركة أعجبتكم، و لو كنتوا عارفينها قبل، أو ما تهمكم لأن رأسكم ما فيه قشرة، أظن إن الصورة حلوة، و تستاهل إني أطلع أي كلام علشان أكتب عنها :).

Bad Week for Marc Jacobs

2011-11-17T12:48:00.001+03:00

الصورة هذي لمارك جايكوبز مالها شغل باللي راح أكتبه، صحيح شكله مبهذل، حتى وهو جمبه شنطته الإيرميس بركين :) و الشيء الثاني إنها من أكثر من سنة. لكني حسيت لو أحد بيصور مارك اليوم، بيكون شكله زي كذا.

الإسبوع اللي فات منع إعلان عطر مارك جايكوب أوه لولا اللي وجهه داكوتا فانينق من بريطانيا، لأنه زي ما تقول الجهة اللي منعته أنه فيه "جنسنة" للأطفال، تبرير منع الإعلان كان طويل، تكلموا عن جلسة داكوتا، طول فستانها، و وجهها اللي شكله طفل، و أهم شيء وضعية القارورة (هنا الإعلان أنتم شوفوا كيف).

الأخبار الشينة، ما وقفت هنا بالنسبة لمارك، أمس طلع خبر أنه مجموعة الربيع 2012 اللي عرضت قبل شهرين بنيويورك، سرقت كاملة بباريس :) خواتي مبسوطات، يقولون أنه شيء "يونس"، أنا مبسوطة و أقول أنه يستاهل، مو لأني ودي أسرق شيء زي كذا، بس أحس المصممين يستاهلون هم و ملابسهم اللي أسعارها مو معقولة.

إذا كان صحيح المجموعة انسرقت، مو هم اللي طلعوا الخبر (يعني كجزء من الدعاية، لأنه قبل أسبوع طلعت صور لبوتيك سلين بباريس بعد و فيه واحد باخ عليه بالوردي، عن أنه واحد زعلان من أنهم استخدموا القرافيتي بحملتهم الدعائية لخريف 2011، صراحة ما صدقتهم، و أحس إنها دعاية) لكن ما أعرف عن مارك جاكوبز، و لو كان الكلام حقيقي، أعتقد أنه راح تنباع القطع المسروقة على الإنترنت قبل لا تنزل للأسواق بفبراير.

A Good Year for Black

2011-11-13T22:00:00.001+03:00

السنة هذي قررت إني أجمع أحسن الفساتين أول ما أشوفها، ما أنتظر إلى ديسمبر علشان أفتش و أقعد أتذكر، توفير للوقت و الجهد D:. الشيء اللي لاحظته أنه السنة هذي حبيت فساتين سوداء كثير، مع إني بالعادة ما تعجبني ... مو لأنها بايخة، لأني أشوف الفستان الأسود من أسهل الفساتين لبس، يعني اللي ما عنده أدنى حس بالموضة، يكفيه يلبس فستان أسود مرتب، و يزين شعره زين، و أكيد مايك آب نظيف، و يطلع شكله حلو.

لكن الفساتين هذي السنة، ما كانت بس سوداء زي العادة، كان حتى شكلها حلو.

من أول الفساتين اللي حبيتها هذي السنة و كانت سوداء، هو الفستان اللانفين اللي على شارلوت كاسيراقي، شارلوت دايم تلبس أسود، لكن هذا الفستان المخمل كان بالنسبة لي شيء ما أحس إني شفت برقيه و أناقته أي فستان ثاني.

فستان أنقارو اللي على جيزيل، من الفساتين القليلة اللي خلتني أشوف إن جيزيل مرأة حلوة، شكله حلو، قصته حلوه، و أهم شيء شكل القماش حلو مرة (مع إني ما لمسته) P:.

آمبير هيرد السنة هذي من الأوجه الجديدة اللي طلعت، لبسها كثير أنيق (مو اللي يعجبني شخصيا)، لكن بهذي المناسبة، ما أعرف السبب آمبير، أو لون الفستان هو اللي خلاني للمرة الأولى (بعد :)، أحب فستان فيفيان ويستوود بالتصميم التقليدي هذا.

قلت لكم قبل إني حابة ستايل إيما ستون هذي السنة، الفستان الأتزارو هذا بيكون عادي بالنسبة لي، لكن مع السلسلة الذهبية، اللي عليها كريستالات طالع شكل الفستان حكاية ثانية.

السنة هذي فيه ناس طلعوا بستايل حلو زي إيما ستون، و فيه مصممين طلعوا بفساتين حلوة، و صار ينلبس لهم كثير على الريد كاربيت، و لو كانت هذي السنة سنة مصمم معين، أظن إنها سنة إليساندرا ريتش. الفستان هذا اللي على إيل ماكفيرسون، هو اللي خلاني أصمم على كتابة موضوع عن الفساتين السوداء.

بس قبل ما أفكر، متى راح أكتب الموضوع، و جالسة أجمع ببالي مين عجبني بفستان أسود، شفت هذي الصورة لقوين ستيفاني من قالا أمس و هي لابسة فستان "أكيد" أسود من كارفين، من فترة طويلة ما عجبني شكل قوين، زي هذي المرة بالفستان الأسود هذا.

ما أعرف مين أحدد أحسن لوك بالنسبة لي، بس لو كنت أبغى فستان من هذي الستة فساتين، راح أختار أليساندرا ريتش. أنتم مين أعجبكم أكثر من هذولي الستة نساء؟

The New Ladylike

2011-11-05T16:49:00.001+03:00

من الموضات اللي طلعت تقريبا قبل موسمين كانت لايدي لايك ... بصراحة ما أحب هذي النوعية من اللبس كثير (لبس الخمسينات)، تقريبا زي ملابس بيتي درابر (جانواري جونز)، بماد مين. أحسه شوي "كستومي"، يعني شوي خارج الزمان. بس أكثر شيء يمكن ينرفزني فيه أسمه، يعني اللي ما تلبس هذا اللبس ما تكون "كأنها آنسة"؟ و بعدين فكرة البنت لازم تصير دلوعة و تلبس نفاشات تنرفزني. ما علينا ..

قبل أمس كيرستين دونست كانت عند جايمي فالون. و كانت لابسة فستان مقلم أزرق و أبيض من مجموعة ميو ميو ريزورت 2012. ما أعرف اللوك بوك حق المجموعة هو اللي ما وضح قد إيش الفستان حلو، أو أنه طلع حلو على كيرستين ؟!!!

فيه تعليق قريته بواحد من المواقع، أنه لو كان الفستان أطول شوي كان بيكون لوك مناسب لبيتي درابر ... أعتقد أنه هنا الفكرة المختلفة، اللي خلتني أحب هذا الفستان من بين كل الفساتين اللي من هذا الشكل، أنه قصير أحس أعطى اللوك نفس شاب، (أحب هذي الأشياء الصغيرة، اللي تغير بلوك كامل).

حبيت بعد كعبها الأبيض (بالعادة ما أحب الجزم البيضاء) لكن أظن هذا مناسب مرة للبس ...

شرايكم بكيرستين؟ و وشرايكم بستايل لايدي لايك؟

Not so serious!

2011-11-04T23:31:00.002+03:00

من فترة و أنا أدور على مجوهرات مميزة، بنفس الوقت أبغى شيء يفرح، ما أعرف كيف آصف لكم، بس كنت أبغى شيء فيه حياة، لما أشوفه أبتسم من دون ما أحس. ما لقيت شيء طول الفترة اللي فاتت، حتى إني فوّت عرضين جوني من مواقع تعطيني خصم لأني "زبونة مخلصة" بس ما لقيت شيء يفتح نفسي، و لا بغيت أبذر و انتهت العروض :).

بالصدفة المحضة اكتشفت هذي الماركة الفرنسية اسمها N2، شفت زي ما قلت لكم عندهم مجوهرات على شكل أكل و حبيتهم على طول، لما قلبت أكثر لقيت عندهم أشياء أكثر إثارة و غرابة، و أظن إنها بتعجب كثار. أهم شيء إن أسعارها لحد كبير معقولة، شيكوا عليها من هنا.

وش رأيكم فيها؟ و وشوا قطعة المجوهرات اللي تعجبكم أكثر شيء (من N2 أو من غيره)؟.

Tintin

2011-10-30T15:02:00.000+03:00

الفترة هذي بدأ الترويج لفيلم تين تين، علشان أكون صريحة ما قد قريت أي وحده من مغامراته، و لا أظن إني شفت بأي مرحلة من حياتي فيلم الكرتون حقه. لكن هذا ما يمنع إني أحبه، لأني أحب الكوميك بشكل عام، و أحب رسومه مره، أحس إنها نظيفة قوة.

اليوم قررت إني أسوي لوك من وحيه، رغم إن تين تين طلع ببداية الثلاثينيات، بس ما أعرف ليه أحس لبسه شيء ستينيات أو سبعينيات ... أو يمكن تأثير الفيلم بوتيش لكاترين دينوف اللي شفته اليوم.

Tintin by alorwa featuring genuine leather handbags

Carven short sleeve top, $560

Bally long sleeve top, $495Surface To Air high waisted cropped pants, $79Camel boots, £28Genuine leather handbag, €70Leather sunglasses, $410

الشيء اللي حابته هذي الفترة هي الهاي نيك، أو الرقبة، أو الاسم الجديد اللي اكتشفته لها ترتل نيك. مع إني ما كنت أحبها، خصوصا بالمدرسة، لما كنا نغصب على لبسها تحت المريول، و لفترة طويلة مو هي خياري الأول للملابس، بس الحين لسبب ما أعرفه عاجبتني، ودي ألبسها بشكل مختلف. شيء ثاني ما أحبه، و يمكن إلى الآن ما أحبه، بس أحسه بيطلع حلو مع بعض و هو شيء كمه قصير تحته شيء كمه طويل. بس يمكن الموضوع مختلف هنا، لأن كم السوتير وسيع، و الهاي نيك ضيقة.

Crown Yourself

2011-10-26T18:14:00.000+03:00

زي دايم، لو كنتوا متابعيني من زمان، قد تكلمت عن تافي، و لو ما كنتوا متابعيني من قبل بس تعرفونها، اسمحوا لي أقول باختصار إنها بنت كانت تكتب عن الفاشن تقريبا و عمرها 11. المهم تافي أكيد كبرت زينا كلنا، و الحين عمرها أظن 14، المهم إن تافي تقريبا بطلت تتكلم عن الفاشن، بس سوت مجلة تتكلم فيها عن كل شيء يهم المراهقين.

أحب تافي لأني أحس إنها بنت عاقلة، و تعرف تتصرف، يعني وحده اشتهرت بعمرها كان ممكن تسحب على الدراسة، و تطير بين باريس و لندن و ميلانو، لكن البنت إلى الآن تدرس، و تكتب بمواضيع تهم البنات الصغيرات.

اللي عجبني و خلاني أكتب عنها من جديد، تافي مع وحده اسمها بيترا جالسين يسوون بالفيديو اللي تحت راح أحطه تيجان تشبه كثير تاجات شفتها قبل سنة تقريبا بعرض ميديم كيرتشوف.

Crown of Love from Rookie on Vimeo.

فكرة التاجات حلوة لو كان ببالكم ثيم معين للهالوين (لو تسوون حفلات تنكرية)، أو حتى حلوة لو تسوينها لو عندك بنات صغيرات بالعائلة، أختك، بنت أختك، بنت أخوك، أو حتى لو تدرسين بنات صغيرات، أكيد بينبسطون فيها، إذا أنا انبسطت بس من الفيديو، أكيد البنات الصغيرات بيفرحون فيها مرة.

إذا تبغون شيكوا هنا على الموضوع الأصلي، و على كل المجلة (طبعا المجلة كلها بالإنجليزي) :).

Suggestions for Pregnant Beyonce

2011-10-21T17:16:00.001+03:00

قبل أسابيع الموضة لموسم ربيع 2012، كان فيه موضوع ببالي، وهو عن وش ممكن تلبس بيونسيه لحملها. بس قررت أأجله لبعد عروض ربيع و صيف 2012.

اليوم قررت إني أكتب عن هذا الموضوع مو لأنه طلع إشاعات أنه بيونسيه مو حامل، و حاطة شيء ببطنها علشان تسوي نفسها حامل، أصلا ما نيب مهتمة لحمل بيونسية، و لا للإشاعات، بس لما طلعت بالفستان اللي من لانفان انبسطت، و توقعت إننا بنشوف ستايل حمل حلو، لكن للأسف لا :S

قلت لكم ما يهمني إن كانت بيونسيه حامل أو طالعة بحمل كذبي، لكن كل اللي أفكر فيه، خصوصا أنه بعض الناس قالوا بعد ما طلعت حكاية حملها، أنه حملها راح يغير الموضة.

اللي أشوفه لحد الآن، هو بيونسيه قاعدة تتهيبل بصراحة، يعني لبس ما أعرف مين قالها أنه يمكن يمشي على حامل، أعرف أنه بيونسه حلوه، و كثير يحبونها، و يحبون لبسها و جسمها، بس هذا ما يعني أنه الواحد يصدق نفسه، و يعتقد أنه ما فيه مشكلة يلبس اللي يبغى. خصوصا إذا أنت مفكر إن شكلك حلو، مو أنه مو فارقة معاك كيف يطلع شكلك.

قلت لكم لبس بيونسيه بعد الفستان اللانفان من جرفة لدحديرة. ملابس ضيقة بشكل ما أعرف كيف. فتحات صدر مرة واسعة، فساتين نفاشة، و فساتين مفتوحة من الجوانب!! يعني من الآخر كل شيء المفروض الحامل ما تسويه، بيونسيه سوته، و كأنها تقول: أنا غير كل العالم، أنا أحلى وحدة، و أقدر أسوي كل شيء و كل شيء بيطلع حلو علي. يعني الفكرة النهائية، اللي راح آصل لها، وضع بيونسيه مو زين، لأنه يا إنها مو مستوعبة وش الحامل تسوي، أو أنها واثقة بنفسها بشكل غير صحي (و هذا لازم يتغير). و زي ما قلت لكم ما يهمني حملها صدق أو كذب، المهم إنها داخلة دور الحمل، فعلى الأقل تحاول تطلع بشكل حلو.

مقابلات و لقاءات صحفية:

(الملابس من اليمين لليسار: روبيرتو كفالي، ماثيو ويليمسون، يونيك فور توب شوب)

شفتوا مثال من لبس "المشاوير" و اللقاءات الصباحية اللي صايره بيونسية تلبسه و هي حامل فوق بأول التدوينة. صراحة ما أعرف وش آصف لبسها فيه غير أنه مستفز، يعني تقدر تكون حلوة و أنيقة من دون ما تلبس أشياء زي كذا. حتى تقدر تلبس ألوان أحلى من الألوان اللي جالسة تلبسها.

حفلات، و حفلات توزيع جوائز:

(الفساتين من اليمين لليسار: دولتشي آن قابانا، أنتطونيو بيراردي، مايكل كورس)

زي ما قلت لكم من بعد MTV VMA ما شفت شيء يفتح النفس على بيونسيه، حتى إني شفتها بفستان من مايكل كوس كان أقل ما يقال عنه أنه كارثة.

شرايكم ببيونسه و موضوع حملها؟ و إن كنتوا متابعين أحد معين، مين أكثر سلبرتي أعجبكم ستايل الحمل حقها؟

Versace for H&M x Polyvore

2011-10-13T23:54:00.000+03:00

أعتقد أنه كثير منكم يعرف أنه H&M سنويا تسوي تعاون مع مصمم كبير علشان يصمم لهم مجموعة بالعادة يحطونها بالسوق بشهر نوفمبر.

المجموعات هذي ما تجينا، لأنها ما تنباع بمحلات H&M كلها، بس تنباع بفروع محددة، و زي ما قلت لكم ما تجي عندنا. المهم التعاون الجاي راح يكون مع فيرساتشي (لو كنتوا ما تعرفون إلى الآن)، طبعا زي دايم فيه eBay، صح الأسعار تصير "شوي" مو معقولة، مقارنة مع أسعارها الأصلية، بس لو كانت عاجبتكم مرة يمكن تتجاهلون الحقيقة هذي :).

المهم بغض النظر عن إنها تنباع أو ما تنباع، أساسا هي لسا ما نزلت، و حتى اللوك بوك حقها ما طلع، لكن فيه مسابقة أظن إنها مفتوحة لكل العالم، على بوليفور.

كيفية المشاركة:

لدخول المسابقة اصنع و انشر تصميمك للاحتفال بأفضل ما لدى مجموعة فيرساتشي لـ H&M. في نهاية الاسبوع دونتيلا ستختار التصميم المفضل لديها للفوز بثلاثة مظاهر كاملة من المجموعة. كل يوم سيتم اختيار 10 أفضل تصاميم للفوز بوشاح حصري من فيرساتشي لـ H&M.
بعد أن تنتهي انشرها على فايس بوك.

دخلت بوليفور و لا لقيت شيء إلى الآن للمجموعة، لكن قبل فترة طلعت صور متفرقة من المجموعة، بشكل عام أنا مو من الناس اللي يحبون فيرساتشي، لكن أعتقد أنه فيه كثير يحبونه، لكن لحد الآن من الصور اللي طلعت قطعتي المفضلة هي جاكيت بايس بول من ملابس الرجال.

وش رايكم بالصور اللي طلعت من المجموعة لحد الآن، لو كنتوا شفتوها؟ و متحمسين تحصلون على شيء من المجموعة هذي، أو ما تهمكم؟

New in My Make-Up Bag

2011-10-11T21:43:00.000+03:00

أكيد تعرفون الحين إن هوايتي الجديدة هي اكتشاف مايك آب جديد و ماركات جديدة، أشياء أرخص، أشياء أكثر طبيعية، أشياء أكثر ابتكار، تقريبا أدور على أي شيء و كل شيء.

من أكثر الأشياء اللي انتبهت لها بالموسم اللي فات، و بهذا الموسم بعد، إن المايك آب متجه تجاه الطبيعية أكثر.

يمكن بعد تعرفون إني أحب المايك آب اللي ما كأنه موجود أصلا، علشان كذا صرت أحب التدوير عن كل شيء جديد. زي ما قلت لكم أنه أكثر العروض كانت العارضات فيه بشكل طبيعي مرة، و لما يكون هذا مايك آب العروض، نعرف أنه بتكون هذي هي الألوان اللي بنلقها بمحلات المكياج.

دايم كان فيه نقاش بيني و بين صديقتي لما كنا ناقش وشو الجمال المثالي، و كلنا كنا نعتقد أنه لون البشرة، أو حجم العيون أو شكل اللأنف مو هو اللي يحدد إذا الشخص جميل أو لا، و اتفقنا أنه السر هي البشرة، عندك بشرة حلوة، قطعتي نص الطريق للجمال P:.

زي ما قلت لكم أنه صاير عندي هواية التدوير بمحلات المايك آب، و أنا أدور على بعض الأشياء اللي خلصت من المايك آب حقي، علشان اشتريها من جديد، انتبهت لشيء زي القلم عند ستاند مايك آب فوريفير.

كل مرة أقرأ عن مايك آب أو أشوف فيديو، و أشوفهم كيف يقدرون الكونسيلر ما أفهم ليه، خصوصا إني شريت من أكثر من ماركة، و لما أستعملهم خصوصا تحت العين، يا تعطي شكل غريب لمحجر عيني، أو تكون فاتحة بزيادة عن لون بشرتي الأصلي، حتى لو خلطت جزء منه مع الأساس، ما يطلع معاي شيء جيد. أصلا تركيبته ما تساعد بأغلب الأحيان أنه ينتشر بشكل مناسب.

القلم هذا لقيته بألوان كثيرة مرة، يعني ماراح يكون فيه شيء فاتح عليك، مهما كانت بشرتك غامقة، نفس الشيء راسه مره حلو، ما يطلع لك كمية كبيرة و يتكبكب، و تتورطين فيه، ببساطة تلفينه من تحت، و يطلع لك شيء بسيط منه، حطيه على الأماكن اللي تبغين تختفي (أكيد بقع صغيرة، مو مساحات كبيرة)، و خلاص هذا هو.

زي ما قلت لكم سهل مرة، تأثيره مرة حلو، و مره طبيعي، يعني بيكون "صديقك" بمايك آب السنة هذي :)

زي ما قلت لكم الكونسيلر هذا يجي بدرجات مرة كثيرة، من درجة جدا فاتحة، للون غامق جدا ... و حتى فيه أشياء مايلة للأحمر و ألوان مايلة للأصفر على حسب لون بشرتك.

جربوه، و علموني رأيكم، و إن كنتوا جربتوه وش رأيكم فيه؟

Prada vs Miu Miu

2011-10-06T10:47:00.001+03:00

ما أعرف إذا تعرفون إن برادا و ميو ميو صاحبتهم وحدة، اللي هي ميوتشا برادا. لهذا السبب و ما أعرف ليه أحس أنه لا شعوريا أقارن بين الماركتين، يمكن أكثر شيء دائما أفكر فيه أي وحدة بتغلب الثانية على الريد كاربيت (لأنه بالنسبة لي هو المقياس على شعبية أي مجموعة، أو مصمم).

قبل أمس كان آخر يوم من أيام أسبوع باريس للموضة، و كان فيه عرض ميو ميو (عرض ميو ميو بباريس و برادا بميلانو). للحق أول ما شفت صور المجموعة حسيت إنها تشبه كثير برادا، بس يمكن السبب الشعر اللاصق، لكن بعد ما ناظرتها زين كانت مختلفة (مو بشكل كبير)، لكن مختلفة (أحس الألوان متشابه، لحد ما).

علشان كذا (موضوع إني أحس أنه فيه "حرب" بين الماركتين) سويت هذي المقارانات، لشعبية المجموعات اللي فاتت، كلها مبنية على مزاجي، يعني لا دراسة، و لا نتائج مبيعات، و لا تواصلت مع الماركتين، و لا قريت بأي مكان :)

المجموعة هذي لميو ميو هي اللي اللي طيحتني بحب الماركة، ما أعرف وين كنت قبل، لكن ما أتذكر إني شفت ملابس شكلها حلو (بتصاميم جديدة)، طبعات حلوة، و أحس فيها شباب. مجموعة برادا ما شفتها كثير، خصوصا القطع اللي مطبوع عليها الشاطيء، ما شفته إلا على كيري مولقان، أما أكثر ما لبس منها هي الفساتين الكرستال.

موسم خريف 2010 تهاوشت أنا و أختي عليه، هي تقول أنه ميو ميو لبس أكثر، و أنا أقول برادا أكثر، مع إنها مدونتي لكن تصرفت كأخت كبيرة و خليته تعادل، مع ذلك ما رضت ؟!!!

أعتقد موسم ربيع 2011 ما فيه كلام كان موسم برادا بالموز و التقليمات الملونة، ميو ميو كان موجود بألوانه الفاقعة، لكن أظن لو أحد بيتذكر الموسم أنه الصيف اللي فات كان صيف الألوان الفاقعة، بيتذكر مجموعة جيل ساندر و كريستوفر كاين مو ميو ميو.

الشتاء هذا، هو عكس الصيف اللي فات هذا موسم ميو ميو، كل العالم تبغى تلبس منه، مع الفساتين اللي من الأربعينات و الجزم اللماعة أصلا أصنفه من أشهر المجموعات للشتاء هذا، و لا أظن ترتر برادا و تقليمات الستينات ممكن تغطي عليه بباقي الموسم.

ما أعرف إذا ميوتشا تتعمد تخلي مجموعة أحسن أو أشهر من مجموعة، لكن هذا اللي يحصل أغلب الوقت. مع إني أنا من فريق ميو ميو بالعادة، لكن للموسم هذا أعتقد أنه برادا راح يغلب.

أنتم وش تتوقعون، وش رأيكم ببرادا و ميو ميو، مين تحبون أكثر؟

Pink Eyelashes for Breast Cancer

2011-10-04T22:10:00.002+03:00

شهر أكتوبر هو شهر حملات الدعم و التوعية بمرض سرطان الثدي، بالوقت نفسه، إسبوع باريس للموضة، إلي هو الأسبوع الأخير من أسابيع الموضة الكبيرة، إلى الآن ما خلص. قبل يومين كان فيه عرض فيكتور آن رولف، علشان أكون صريحة ما شيكت بتمعن على المجموعة، بس شفت صور متفرقة من الباكستايج، و بعض العرض، و شفت هذي الصورتين لإنيكو و ليو.

يمكن تعبتوا من كثر ما أقول إني أحب الشعر الوردي، و بس تكفيني صور، ما يحتاج أنا أصبغ شعري، بس ما قد فكرت أبدا، أبدا، أبدا برموش وردية، لكن من اللي أشوفه بالصورة، تبين لي أنه مو بس الشعر الوردي حلو، بعد حتى الرموش.

أكيد اللون هذا مو صبغة، بعد و لا مسكرة، بس رموش صناعية و أوولاااا شكلك طالع حلو مو معتاد، خصوصا مع مايك آب زي اللي بالعرض طبيعي مرة.

بالمناسبة هذي يوم 28 أكتوبر ما أعرف مين عينه، بس أنه راح يكون يوم لبس الوردي لدعم مرضى سرطان الثدي، أظن إنها قضية مهمة، ولبسك للوردي بيكون لفته بسيطة، و لا راح تضر، خصوصا أنه الوردي من الألوان اللي لها رجعة بالموسمين الأخيرات.

آخر شيء، لو حصل و كنتي بمكان فيه ستاند لجمعية زهرة لسرطان الثدي (تراني ما أعرف أحد بالجمعية، ولا قد اشتغلت فيها)، تراهم يبيعون أشياء لطيفة، ريعها يروح لأبحاث سرطان الثدي.

What I want to Wear

2011-10-02T21:31:00.002+03:00

من بدأت أسابيع الموضة، و أنا تعجبني أشياء معينة بتقريبا أي مجموعة، لكن ما أعتقد أنه فيه مجموعة أعجبتني شخصيا (يعني تناسب الطريقة اللي أرتاح ألبس فيها)، زي مجموعة أليكسي ميبل. ما أعرف آصف ستايلي، لكن أقدر أقول إني أحب كل شيء خفيف، مع أقل تعقيدات.

زي ما قلت لكم من أول ما شفت صور للعرض على تمبلر (خصوصا إني مو مهتمه فيه، لأني ما أتذكر إلا عروض الأوت كتو حقته)، رحت أدور على العرض كامل، و لما شفته على طول طحت بحب تقريبا كل شيء بالمجموعة.

المجموعة كان فيها كثير أشياء من موضات الصيف الجاي، أول شيء اللون الأزرق. ما أعرف إذا قلت لكم هذا الكلام قبل أو لا، لكن الأزرق من عروض نيويورك، وهو موجود تقريبا بكل عرض.

الشيء الثاني اللي موجود، و اللي من فترة و أنا حابته (لو تتذكرون الموضوع اللي كتبته عن ريان قوسلينق، بمهرجان كان)، اللي هو: "بيجاما شيك". عاجبتني الموضة هذي مرة، أعرف إنها ممكن ما تعجب كثير من الناس، لكن زي ما قلت لكم أحب الأشياء السهلة، و ما فيه أسهل من البيجاما :). المجموعة هنا كاملة.

شرايكم بالمجموعة؟ وشو الستايل اللي ترتاحون فيه أكثر، أو كيف تاصفون ستايلكم؟

Night Lights

2011-09-29T17:00:00.000+03:00

واضح جدا إن الصيف الجاي بيكون كل طبعات من كل الأشكال: خضار، ورود، سلاسل و أشكال غريبة. لكن الشيء اللي كنت أنتظره حتى من قبل ما أشوف أي عرض، و أناظر إن الطبعات بكل مكان، كنت أنتظر طبعات دريس فان نوتين، مو لأني ذكية و أعرف إن دريس راح يسوي طبعات، لأن الطبعات هي موضة ربيع 2012، لكن لأن هذا الشيء اللي متخصص فيه دريس " الطبعات".

على الرغم من إني أحب دريس فان نوتين، بس فيه أشياء من كثر ما هي حلوة، ما أتمنى أشوفها، لأني ما أبغى أتنكد إني ما أقدر أجيبها :).

و أنا جالسة أقلب بالمجموعة لهذا الصيف شفت الفستان الأول من اليسار و لما شفته من فوق و النقط الصفراء، قلت يا رب الطبعات مو قصده إنها مدينة بالليل، مو لأنه شيء بايخ، لأنه الفكرة بالنسبة لي عبقرية، و لا ودي أدري أنه فيه مصمم سوا شيء حلو زي كذا، و موب سهل آصل للأشياء اللي يسويها.

ربي ما استجاب لدعائي، و لما قلبت باقي الصور، تأكدت أنه النقط الصفراء مو غلط، لا دريس كان قاصد أنه يسوي طبعات لمدينة بالليل. (الجاكيت و الفستان اللي على اليمين، يقتلون).

الفستان اللي بالوسط عجبتني طبعاته، صح ماله شغل بصور مدينة بالليل، بس ذكرني بمقلمة شفتها مع بنت عليها مارشملو أبيض و وردي، و قلت لها: مقلمتك حلوة، قالت لي: أدري ودي أكلها D:، أحس أني ودي آكل هذا اللوك حتى لو كان زهور مو مارشملو :).

Bra

2011-09-28T11:46:00.000+03:00

بأسبوع نيويورك انتبهت للوك من عرض بروينزا سكولير، عجبني شكل اللوك، حسيت فيه جو كاريبي كثير، وصلت لحظة شك ممكن أحد يطلع بلوك يشبه كذا؟

أمس كنت أتصفح مواقع القوسيب زي العادة، و شفت هذي الصورة لريانا و هي تصور فيديو كليب ببلفاست.

للوهلة الأولآ أعنقد إن اللي منكم يعرف ريانا من قبل و يعرف كيف تلبس، ما يشوف أي غرابة بهذا اللبس (مع إني المفروض أكون وحده من هذولا اللي مو مستغربين)، إلا إني حسيت بشيء مختلف هذي المرة، و أحس إن اللوك اللي شفته عن بروينزا سكولير، و عند أكثر من ماركة منهم دولتشي آن قابانا و برادا (لحد الآن)، بيكون منشر هذي السنة، أعتقد بنشوفه على أكثر من سلبرتي (غير ريانا)، و حتى من الناس العادية بصور ستريت ستايل

اللبس زي ما أنتم شايفين تنورة و برا، ما فوقها شيء، و لا تحتها شيء ... للحق الشكل حلو، خصوصا لما يكون عندك بطن مشدود، لكن بغض النظر عن موضوع الجسم، بالنسبة ما أعتقد أسويها أبدا، أرجع و أقولكم شكلها حلو، بس عندي حساسية من تطليع البطن بشكل عام، كانت برا أو كروبد تي أو شيرت.

زي ما قلت لكم اللوك هذا كان ببرادا، كان ببروينزا سكولير، و بدولتشي آن قابانا، و بعروض ثانية كثيرة.

هذي صورة لبعض الأشكال اللي كانت بعروض مختلفة من نيويورك و ميلانو. من اليسار: (باند أوف أوتسايدرز، بروينزا سكولير، نمبر 21، فيرسانشي، و إيميليو بوتشي). العروض ما كانت بس برا، كان فيه كروبد توب. زي ما قلت لكم أعجبتني، أحس إنها حلوه، شيك، و صيفية، ما عندي فكرة إلى الآن كيف يمكن يسوى هذا اللوك من دون ما أحس إني مطلعة "لحم" كثير :)، أعتقد كل ما صغرت المساحة اللي بين التنورة و البرا، كل ما صار اللوك قابل أكثر للتطبيق :).

Another Summer in the Farm

2011-09-26T20:45:00.001+03:00

قبل أمس ما أعرف أمس كان فيه عرض دولتشي آن قابانا ... حبيت أكتب عن العرض لعدة أسباب، بأقولها بعدين، لكن السبب الأول هو لأن عرض دي آن جي اللي كان على ما أظن باليوم الثاني من إسبوع ميلانو هو آخر مجموعة راح يصممونها لهذا الخط D&G مو Dolce & Gabbana. ما عرفت عن هذي المعلومة إلا بعد يومين أو أكثر من العرض، و لا بغيت أكتب عنه قلت أستنى عرض دولتشي آن قابانا.

قلت لكم فيه أكثر من سبب إني أكتب عن هذا الموضوع و أهمها موضوع نهاية دي آن جي. للحق آنا مو مهووسة أو معجبة بالماركتين، قصدي دي آن جي و دولتشي آن قابانا، و ألقى دولتشي آن قابانا أقرب لذوقي، صح دي آن جي أرخص، بس أصلا ماهيب فارقة معي كثير، خصوصا إني زي ما قلت لكم مو من معجبين الماركة، تعجبني بعض الأشياء، أو بعض المجموعات، بس ما أحس إني "ودي" أشتريها، الجانب الإيجابي بالموضوع، أنه ما عاد أسمع بياع عندنا لا ببوتيك دي آن جي، و لا بساكس أسأله عن دي آن جي يطلع لي دولتشي آن قابانا أو العكس، و لما أقول لا أنا أبغى ذيك، يقول لي بحقرة يعني أنك ما تفهمين: "هن واحد"، و أنا أعيد نفس السيناريو أعطيه نفس نبرة الاحتقار، و أقول : "لا موب واحد"، و أطلع و أنا أشتم بالبياعين اللي يحسبونا أغبياء، و لا نفهم :)

الشيء الثاني اللي يهم بهذا الموضوع، أنه مجموعة ربيع 2011 اللي كلنت تقريبا كلها أبيض، و مجموعة خريف 2011 اللي كانت كلها نجوم، تقريبا اكتسحوا أغلفة المجلات و الريد كاربيت، فما أستبعد أنه هذي المجموعة اللي كلها خضار بتكون بكل مكان الصيف الجاي.

آخر شيء الصيف اللي فات ستيلا مكارتني طلعت بمجموعة عليها فواكة، بالأخص حمضيات، و تقريبا كانت المجموعة هذي بكل مكان، حتى محلات الهاي ستريت سوت نسخ منها، السؤال هنا مين راح يغلب الثاني الفواكه أو الخضار، أنا بالحياة أعتقد زي أكثر العالم أميل لفريق الفواكه، لكن أظن بالملابس راح يفوز فريق الخضار، ننتظر و نشوف :).

أنتم وش رأيكم؟

If I Were a Boy

2011-09-23T17:56:00.002+03:00

من فترة و أنا صايرة أحب الأشياء الكرتونيه، ما أعرف متى بدأ هذا الحب، بس قبل فترة شفت صورة لواحد لابس ساعة رولوكس المينا حقتها مرسوم عليها ميكي ماوس.

الرولوكس مو أول شيء فخم يسوى فيه كذا، قبل موسمين أو أكثر دي آن جي كانت ملابسهم مطبوع عليها ميني ماوس، و مجموعة الصيف اللي فات كان عندهم تي مطبوع عليه سنو وايت ...

عرض برادا أمس كان فيه سيارات ؟!!

ما أظن فيه بنت بالعالم، ما تمنت لو يوم إنها تكون ولد، بس ما أعتقد أنه فيه كثير بنات عندهم هوس بالسيارات، على الأقل و هم صغار. عرض برادا كان فيه سيارات بكل مكان، على ملابس، على الجزم لمبات و لهب (و بعد فيه لهب على الملابس)، و حتى على الشنط!!.

قلت لكم أنه صايرة تعجبني الطبعات الكرتونية (سيارات، كوميك، أبطال ديزني) أي شيء رخيص :)، ملابس برادا كانت كأنها بجامات ولد صغير. قلت لكم ما أعرف وش علاقة البنات بالسيارات، لكن أظن إن برادا بتعطي النساء بالسعودية فرصة أنهم "يلبسون" و "يشيلون" سيارت معاهم مادامهم ما يقدرون يسوقون (بس أخاف حتى التشكيلة هذي يمنعونها عندنا :).

من أكثر الأشياء اللي أعجبتني بالعرض هي الشنطة (الوسط)، حبيتها مرة، و زي دايم لو كان عندي فلوس كان شريتها :) برادا مو أول وحدة تدخل رسمات غريبة على الشنط، لوي فيتون قد سووها قبل لو تتذكرون بشنطة عليها كرزات، و بعدها كان فيه تعاون مع فنان ياباني طلعوا شناط مع طبعة لوي فيتون المعروفة، كان فيه شخصيات غريبة راسمها هذا الفنان.

شرايكم بعرض برادا؟ و بفكرة الرسوم الكرتونية على الأشياء الفخمة؟

The few pieces aren't for the duchess

2011-09-22T14:33:00.001+03:00

توقعت إمي ماراح أكتب عن لندن، بس توي أشيك على مجموعة إيرديم، خصوصا إني إلى الآن ما شفت شيء مميز من ميلانو، بصراحة المجموعة مو سيئة، لكن أعتقد لو إيرديم كان مصمم كايت ميدلتون كنت راح أحبها، لكنه مصمم يشتري له كل الناس، فما أعرف على أي أساس يصمم مجموعة كاملة، تقريبا كل القطع مسوية علشان تلبسها كايت.

كايت لبست لإيرديم مرتين كلها بكندا لما راحت لها بالصيف، لكن هذا ما يعني أنه إيرديم صار لكايت ميديلتون، صحيح أنا توقعت أنه راح تطلع ملابس تصلح لكايت خصوصا من إيسا لأنها لبست لها كثير، واحد منهم فستان الخطوبة الأزرق، لكن مو من إيرديم.

صراحة ما أفهم طيران الناس بكايت ميديلتون، يعني لما كانت بنت عادية تتزوج أمير فهمنا الموضوع، لكن أنه يجلسون الناس يقولون لي أنه لبسها رهيب، مانيب مقتنعة، ممكن يعجب أذواق، لكن بالنسبة لي لبسها ممل جدا، و لا أنتظر منها إنها تونسني، فيه ناس كثير بالعالم يقومون بهذا الدور، و بعد ما أنتظر منها إنها تصير ديانا ثانية، علشان كذا أعتقد أنه "يغصب" الناس على أنهم يحبون ذوقها موضوع سخيف جدا.

قلت لكم العرض مو سيء، بس رغم إني ما ألبس من إيرديم (لأن ما عندي فلوس:)، ما أبغس أشتري شيء فوق 800 جنيه علشان أطلع زي كايت، أروح أشتري من زارا أو مانقو أوي أي شيء ثاني لو بغيت أكون زيها، علشان كذا أظن أنه القطع اللي صدق كانت حلوة (من وجهة نظري) هي القطع القليلة اللي أعتقد أنه مستحيل كايت ميدلتون تلبسها. (هنا باقي المجموعة).

شرايكم بالمجموعة؟ و ستايل كايت ميدلتون، تعجبكم، أو تطفشون منها زيي؟

Meadham Kichhoff: Back to School

2011-09-21T16:48:00.000+03:00

اليوم خلص إسبوعين من الدراسة، و أمس خلص إسبوع لندن للموضة، قبل أمس كان فيه عرض لماركة أحبها مرة، صح غريبة مرة، لكن هذا ما يعطي تبرير أنه الناس ما تعطيها وجه :).

قبل أمس كان عرض ميديم كيرشوف مع مجموعة ثانية من المصممين البريطانيين. أكثر شيء أحبه ببريطانيا أنه المصممين حقينها أشوفهم أكثر مصممين ما عندهم حدود تحدهم، أي شيء يجي على بالهم يسوونه.

اللي أحبه بميديم كيرشوف إنهم حوسة، يسوون كل شيء بالطريقة اللي تعجبهم، بالشكل اللي يعجبهم، و الأهم أنه يسوونه بشكل طفولي. العرض أول ماشفته صور انتبهت للقسم الأخير من املابس، اللي أنا حاطة صور منه، عجبتني هذي القطع اللي فيها من الميدإيفل، حسيت بشيء يشبه فيلم ماري إنتطوانيت (لو ما شفتوا الفيلم شوفوه يفرح)، بعدين شفت العرض كامل، بعدين شفت فيديو للعرض. الشيء اللي حسيته كأنه عرض مدرسة، حوسة، الديكور أي كلام (بلونات، و زينات تلمع) حتى العرض منفصلين قسمين، تقسمهم فقرات كأنها فقرات مدرسية (أول شيء نساء يرقصون بقمصان ستان، ثم بنات صغيرات يرقصون باليه).

الشيء اللي يعطني إحساس أكبر إن مصممين ميديم كيرشوف كانوا يفكرون بالمدرسة فيه كرديقان بالجزء الأول من العرض، مفتوح فتحتين عند الصدر، شفت هذي الصورة بتمبلر، وحده حاطة صورة الكارديقان، و لقطة لريتشيل ماك آدمز بمين قيرلز (دايم يجي على mbc 4) :).

عروض ميلانو بدأت اليوم مع قوتشي، أحس بتكون العروض آلة زمن بين العشرينات و الستينات و السبعينات و الخمسينات ... :)

The Devil is in the details

2011-09-20T23:13:00.003+03:00

فيه مثل يقول: "الشيطان يكمن في التفاصيل"، هذي حالتي مع الفاشن، يعني يعجبني العرض بس مو للدرجة اللي تخليني أنهبل فيه، لكن لما أشوف صور التفاصيل حقات العرض خلاص أنهبل بالشيء اللي أشوفه. بس علشان ما تحملوني المسؤولية، المثل هذا ما يستخدم على الشيء اللي أنا قلته، بس من زمان ودي أقوله بهذا الموقف :).

قلت لكم قبل أمس أنه كان فيه عرض يونيك من توب شوب، و قلت لكم إني أتوقع أنه حلو، ودي أعترف لكم إني غشيت شوي، يعني لما قلت لكم أنه حلو، بنيت توقعي بعد ما شفت بطاقة الدعوة حقت العرض و كانت عليها صورة إليزبيث تايلور و هي تمثل دور كليوبترا ... العرض مثل ما كانوا هم حاطين على بطاقة الدعوة مستوحى من الفراعنة، حبيت العرض مرة مرة مرة (هنا تلقونه)، ودي آخذ تقريبا كل شيء فيه، عجبني أنهم أخذوا فكرة قديمة مرة، و عادوا صياغتها بشكل جديد و حلو، الأقمشة كانت جديدة (جينز و نايلون)، الخطوط كانت جديدة، طبعات (فيه سويتر عليها صورة إبيزبيث تايلور وهي تمثل دور كليوبترا)، و حتى استخدامهم للون زي الوردي أعطى حياة جديدة لثيم الفراعنة.

زي ما قلت لكم حبيت كثير أشياء بالعرض، بس التفاصيل كانت قاتله، مثل هذي الكلتش اللي عليها كتابة هيروقليفية، أو حتى الكورسيت و العقد.

آخر شيء ودي أقولكم عليه، هنا صورة للأظافر بتشوفون حتى الأظافر مسوينها بشكل مرة حلو، مع الرموز الهيروقليفية، و الألوان. أحب توب شوب، و أحب يونيك من توب شوب، أحس أنهم دخلوا جو جديد أكثر شبابية و أكثر تحرر على الموضة.

Emmy Awards Best Dressed

2011-09-19T17:33:00.000+03:00

أمس كانت جوائز الإيمي، صراحة ما كنت مهتمة كثير، لأنها جت وسط أسابيع الموضة، (دايم كذا؟) أحس هذي أول مرة تصير، المهم أكثر اللبس كان يا أسود يا أحمر، أغلب اللبس مو سيء، بس ما كان مميز، على الأقل بالنسبة لي، يمكن أكثر وحدة أعجبتني، وحدة ما أعرفها لكن شكلها عجبني اسمها لينا هيدي.

لينا كانت لابسة فستان من أليساندرا ريتش، المصممة هذي اكتشفتها بالصدفة و أنا أفتش بنيت أي بورتيه، بداية الصيف على ما أظن لبست لها ديان كروقر، قبل أسبوع تقريبا لبست لها ريتشيل إيفيان وود مرتين (الأسود)، (الأبيض) بمهرجان فينيسيا (مبسوطة أنه الناس بدت تقدرها)، فساتينها حلوة، فيها شيء مسرحي، مع شكل خاص ما أعرف كيف بس يميز المصممة. (هنا تلقون بوتيكها بنيت آي بورتيه، و فيه الفستان اللي على لينا، و الأسود اللي على إيفيان).

لينا كانت لابسة كعبات فوشيا (ما طلعت بهذي الصورة). شعرها كان حلو، و شنطتها كانت حلوة، أهم شيء إنها ما لبست عقد، بس لبست حلقات، و لا غطت على فتحة الفستان من فوق.

للحفل كان جاي بعد الممثل بمسلسل ذا قود وايف، الآن كومينق، كان لابس لابس ما أعتقد أنه غيره أحد ممكن يلبسه، بس حبيت شكله.

الآن كان لابس من جان بول قوتييه (زي ما هو قال بحسابه على تويتر)، بعد بحسابة قال أستعدوا يا فاشن بوليس (البرنامج اللي يجي على قناة E إذا كنتوا تابعونه)، أعرف أنه البرنامج راح يسبه، و ممكن كثير منكم ما راح يعجبه لكن أعجبني كيف لابس جاكيت توكسيدو مع بنطلون حرير كأنه بيجاما، قلت لكم عجبني مرة و أظن إني ودي أجرب هذا الستايل :).

إن كنتوا تابعتوا الجوائز، وش رأيكم؟

What Girls Want

2011-09-18T19:12:00.003+03:00

و أنا جالسة على كمبيوتري، ما أسوي شي بس أشوف الصور، يعني لا أتلبس، و لا أحضر عروض، و لا أتمكيج، و لا أشارك بتنظيم أي شيء، يعني كل اللس أسويه مختلف عن دايم، إني أحاول أشيك على أكبر قدر من العروض، مع ذلك تعبت، ما أعرف كيف هذي الناس ما تتعب.

قلت لكم عروض لندن بدأت، عندي شعور إن عرض توب شوب يونيك بيطلع حلو اليوم، فيه كانت عروض حلوة أمس و قبل أمس مثل ساس آن برايد و جونثان ساندرز، لكن فكرتي هذي السنة إني أدور على الأشياء الجديدة.

قلت لكم إني أحاول أعرف ناس جدد بهذا الموسم، شفت هذا العرض لماركة إسمها آشيش، بالنسبة لي لو ما كان من العرض إلا إنه طلع زهور من الأبوات كان كفاهم :) لكنهم سووا أشياء ثانية أحبها، ألوان تفرح، ترتر ورود بكل مكان و قطع غريبة. خاطري بهذا الجينز بقوة، صحيح أحس أنه ماراح يطلع "كووول" زي ما هو على العرض، بس ما يمنع الواحد يجربه، مع تانك أبيض و كعب صندل أسود و شنطة كروس بودي، خلاص يكفي :)

Taxi ..

2011-09-16T15:31:00.000+03:00

خلص أسبوع الموضة بنيويورك أمس، و اليوم بدأ أسبوع الموضة بلندن، ألوان و أشكال كثيرة كانت بنيويورك، أهم شيء الطبعات، و درجات الأزرق، لكن الشيء اللي أنتبهت له أكثر شيء هو اللون الأصفر تقريبا بكل عرض.

الشيء اللي خلاني أكتب عن هذا اللون بالذات من بين كل الألوان اللي كانت بالعروض، زي ما قلت لكم أنه كان موجود تقريبا بكل العروض، يا قطعة ملابس، أو شنطة، أو جزمة، مشجر و سادة، بكل الدرجات. كان موجود بكل مكان.

الشيء الثاني إني أحب لون تكسي نيويورك، يمكنه أشهر شيء فيها بعد الناطحات السحاب (و لأني حابة الصورة اللي أخترتها لنيويورك، يوم كانت الكابريس سيارة لكل شيء:).

السبب الأخير، أنه ببداية الصيف رحت لزواج، و شفت ثنتين لابسات فستان أصفر، و لما رجعت لخواتي، قلت لهم أنه اسوء لون يكون فستان اللون الأصفر، ما أعرف كان السبب البنتين نفسهم لأنه المايك آب كان شوية كارثي، أو الفستان أو ما أعرف وش السبب، لكن اللي شفته بالعروض كان شيء مختلف، و أعتقد أنه كان فيه خيارات كثيرة، أظن هدف مصممين نيويورك كانوا يحاولن يثبتون لي إن الأصفر مو سيء، يمكن مشكلته أنه ما قد حصل فرصته من قبل، أو يمكن يكون بالنسبة لي الأخضر الجديد (أول كنت أعتقد إن اللون الأخضر هو أقبح لون للملابس، بس الحين أظن أنه من أفضل الألوان، لو الناس لبسوا درجة من الأخضر حلوة، مو أخضر علم السعودية، لأنه رخيص مرة، خصوصا اللي بلمعة.

من اليسار لليمين (بيتر سوم، جيل ستيوارت، و برين). كل الثلاثة أعجبوني أحس تي أبيض مع التنورة اللي من بيتر سوم و جاكيت بوي فريند أي لون بيطلع حلو.

اللبس اللي بالوسط من جيل ستيوارت ما أعجب خواتي، بس أعجبني أنه أصفر على أصفر، خصوصا إن درجة الأصفر فيه (ليموني). آخر فستان من برين بعد عاجبني، حبيت خلط الألولن فيه، أحسه كأنه غرفة أطفال، حبيت شكله، حبيت قصاته، حبيت إن الألوان فيه كذا سادة من دون أي نقش.

المجموعة هذي مجموعة الملابس اللي يسمونها "سمارت"، باختصار يعني ملابس الشغل. من اليسار لليمين (راق آن بون، تومي هيلفقير، و آركز). أعجبني الجاكيت حق راق آن بون، و الجمب سوت اللي من تومي، بس أكثر شيء أعجبني، هي البرا الصفراء مع الفستان الأبسض اللي عارضينه آركز، أعرف أنه بالمواقع ما راح يصير لبس عمل بس حبيته قوة.

المجموعة الأخيرة ما أعرف وش أصنفها، بس يمكن الملابس الرومانسية، من اليسار لليمين (تيبي، أوسكار دي لا رينتا، رالف لورين)، بالنسبة لي فستان تيبي الأصفر فستان مريح، سهل لبسهة، من الملابس اللي بسهولة تتحول من فساتين طلعات عادية لفساتين سهرات، بس زيدي إكسسوار أو إلبسي معاها شيء مختلف، و يختلف شكلها تماما. الجمبر اللي من رالف لورين أعرف إن شكلها عادي، بس عجبني كيف نسقوها بالعرض، أما فستان أوسكار دي لا رينتا، فعاجبني مرة، أعرف أنه صعب يكون حلو، لكنه عاجبني أحسه كأنه طالع من فيلم تاريخي، و لو يتحول الأصفر لعاجي، و الأبيض لذهبي أو فضي، بسهولة يتحول لفستان عروس مررررررة حلو.

شرايكم بالأصفر للملابس؟

Men's Talk

2011-09-15T15:50:00.000+03:00

أسابيع الموضة اللي بدأت من نيويورك طبيعي أنها تكون عن ملابس المرأة، لكن بعض العروض مثل عرض مايكل كورس يدخل فيها ملابس رجال.

زي كل عرض أشوف صوره أحط ببالي إني راح أتكلم عن الملابس "النسائية" فيه، لكن لما شفت الصورة هذي (الأولى من اليسار) قررت إني أتكلم عن ملابس الرجال هذي المرة.

أعرف إني قليل ما أتكلم عن ملابس الرجال، لأني زي ما قلت أكثر من مرة أنه ما يهموني كثير، لما أحس إني أبغى أتكلم، أتكلم عن شيء حتى أنا ممكن ألبسه أو أسويه، و بالنسبة لي من أكثر الأشياء اللي أحبها بالفاشن الآن، أنه فيه أشياء كثيرة صارت تصلح للجنسين، لأني ما أعرف ليه بعض الأشياء يقرر الناس إنها خاصة بالرجال، أو خاصة بالنساء (مثل التنورة أو الوزرة) يعني فيه ناس كثيرة يلبس فيها الرجال وزرة، أو مثل حالتنا ثوب (أخو الفستان)، أو تنورة زي الإسكتلنديين، مع ذلك ما نشوف شيء زي كذا بمحلات و أقسام ملابس الرجال.

يمكن العكس أقل، من زمان و الجاكيتات و البدلات الرسمية (مثلا) داخلة من زمان على ملابس النساء. أرجع فيكم للعرض، زي ما قلت لكم أعجبني اللبس الأول من اليسار ألوانه حلوة، كيف إن شكله "مكروف" عجبني كثير، أظن أنه حلو للرجال (أعرف قليل راح يلبسونه)، بس لو بنت قررت تلبسه أظن إنها بس تحتاج تلبس معاه إكسسوار ذهبي (سلاسل مثلا) و بيطلع لبس مرة حلو، خصوصا لطلعة بسيطة.

الشناط من أكثر الأشياء اللي يمكن تنلبس من الجنسين، حبيت شكلها، و إنها واقفة، ذكرتني شوي بشنطة ذا رو، اللي ما زقدر عليها، بس بأقل آناقة.

آخر شيء الجاكيت الجلد، تمويجه عجبني مرة، أحسه شوي كبير (على مرأة)، بس يمكن مع قميص حرير أوف وايت خفيف، و شورت جينز بيطلع مرة حلو (على مرأة).

Give Me that Hair ... Now

2011-09-14T18:01:00.000+03:00

مرة ثانية للشعر، بعروض نيويورك بعد، أمس كان من العروض عرض أوسكار دي لا رينتا، علشان أكون صريحة معاكم عجزت أركز على الملابس، لأني ما قدرت أشيل عيني عن شعور العارضات.

ما عمري حبيت الشعر الكورلي بهذا الشكل، صح إن أترك شعري يتموج على كيفه، بس شعر زي كذا ما قد شفت، و لا بعد أتذكر إني قد شفت تسريحة، و كان ودي الحين (تماما) الحين إني ألقي زواج أروح له، و أسوي شعري زي كذا.

ما أعرف وش الشيء اللي سحرني بهذي التسريحة، يمكن الدراما اللي أحس أنه طالعة من أشكال العارضات فيها، ما عندي فكرة كيف سرحوهم أصلا (بس على الأغلب أنه مو شيء صعب ينعرف، أو يتسوى) و سهولة و أريحية هذي التسريحة (الشعر طاير، من دون تنظيم) يمكن هي اللي حببتني فيها.

ما أنكر إني أحب كثير الحياة بالأفلام (أكيد السعيدة منها)، إيه كبيرة، و أعرف أنها مو صدقية، بس ما يعني إني إذا شفت شيء كأنه فيلم، بالخصوص فيلم تاريخي رومانسي (ما أحب هذي النوعية من الأفلام، بس أشكالهم دائما حلوة)، إني أتمنى إني أطلع حلوة زيهم.

شرايكم بالشعر بأوسكار دي لا رينتا، أو أي شيء ثاني عجبكم بالعرض؟.

It's a Gallery!

2011-09-14T16:47:00.000+03:00

من فترة طويلة ما شفت أسبوع نيويورك بالشكل هذا، لدرجة بديت أحس بصداع، ما أعرف وش بتكون حالتي بعد لندن، ثم ميلانو و باريس. أظن نيويورك هذا الموسم صعبت على الباقين شغلهم، بالموسمين اللي فاتوا ما كان يهمني أو ممكن يبهرني من نيويورك إلا مارك جايكوب رودارتي، و بعض المرات أليكساندير وانق، هذي المرة ما أعرف مين أختار أو مين أتمنى ملابسه :)؟!!!

الشيء اللي انتبهت له قبل أمس بعرض برين، أنه الطبعات فيه ذكرتني بالفوتوشوب و شغلات البيكسيل، أتذكر لما كنت أصمم، و كانت هذي الشغلات مهمة مرة، وقفت أصمم أو ألعب بالفوتوشوب، لآنه ما صار عندي أصلا، صح بعض المرات أشتاق إني أسوي مايك آب فيه، بس عرض برين خلاني أتمنى لو أحوس فيه من جديد.

الألوان حلوة، تصميم الطبعات حلو، كل شيء كان حلو بالنسبة لي، قلت لكم نيويورك هذي السنة بتكون مسؤولة عن تدهور صحتي النفسية.

بالمقابل أمس بعرض رودارتي أول ما شفت عباد الشمس على طول جا ببالي فان قوخ، صحيح مانيب فنانة، و فقيرة يعني ما أقدر أجمع فن، بس لو كان عندي فلوس و فسقت لدرجة ما أدري وش أسوي فيها، راح أشتري لوحة له، أحب رسمه، يمكن أقدر أقول أنه "فناني المفضل"، مع إني ما أحب العبارة هذي.

قلت لكم أول ما شفت عباد الشمس حسيت بفان قوخ، بس بعد ما شفت الفستان الأزرق تأكدت أنه رودارتي كانوا ببالهم فان قوخ لما صمموا المجموعة. على فكرة ترى مو بس رودارتي من عروض نيويورك للي متأثرين بأعمال فنان معين، برابل قرونق يمجموعة كانت مستوحاة من أعمال مصور ياباني، ما أعرف وش أسمه :).

وش عجبكم أكثر، البيكسيلز أو فان قوخ؟

Rainbow

2011-09-13T17:33:00.000+03:00

قلت لكم أمس، أنه عرض جيل ساندير نايفي مو أحسن عرض أمس (على الأقل بالنسبة لي)، إذا كان فيه عرض من عروض قبل أمس لازم يفوز بأحسن عرض، هو عرض تكوون، كثييير من القطع كانت حلوة، التشجير أعجبني مرة، الألوان أعجبتني، الجزم أعجبتني مرة، و يمكن من أكثر الأشياء اللي أعجبتني بالعرض هو الشعر، من أمس و أنا أبغى أتكلم عنه، بس كنت أنتظر صورة حلوة.

تعرفون إني أحب الشعر الملون، ما أعرف ليه بس أحس فيها شيء كرتوني، مع إني ما عشت طفولتي و أنا محاطة بأفلام كرتون كثيرة، زي كثير من الناس اللي أعرفهم.

الشعر بعرض تكوون كان ملون، مو بصبغة، و لا ببواريك، و لا توصيلات، كان ملون ببودرة يستخدمونها بالهند لتلوين الشعر بمناسبات معينة (ما أبغى أتفلسف، و أقعد أعطيكم قصص عن الشيء هذا، و بعدين يطلع شكلي بايخ، و جاهل :).

أول مرة شفت شعر ملون بالبودرة كان بعرض لإيتام بباريس أظن أنه السنة اللي فاتت، حبيت أشكالهم مرة، كان ودي لو أعرف كيف سوو هذا الشيء علشان لو مرة سويت حفلة ألون شعري (أعرف أني أتكلم عن الحفلات كثير، و كأني ما أوقف حفلات، و العكس هو الصحيح، يمكن ما أحضر أكثر من 3 بالسنة :).

زي ما قلت لكم حاولت أعرف كيف يلون الشعر بذاك الوقت بس ما قدرت، كنت أحسب فيه بودرة أو بخاخ مضغوط خاص للتلوين بس ما حصلت شيء زي كذا. قبل فترة قالت لي أختي إنها لقت فيديو لكوافير إستورالي يوري كيف يسوي شعر ملون بالبودرة (طلعت هذي البودرة أي شيء ممكن حتى شدو قديم). أو حتى ممكن تلقون بودرة ملونة (ألوان كثيرة) بمحلات المكياج زي مايك آب فورإيفير، أو ماك أو إنقلوت.

هنا باقي العرض، لو تيغون تشوفون، ولو حبيتوا الشعر زي ما أنا حبيته، شوفوا الفيديو تحت، تراه شوي طويل، و بالإنجليزي، بس أظن الفكرة واضحة.

آخر شيء تذكروا أنه بودرة، يعني يمكن يوسخكم، ألبسوا ملابسكم قبل، حطوا عليكم سفرة أو كيس أو الروب أو أي شيء، تأكدو إن الشعر ماراح يلمس الملابس، أو على الأقل أنه نشف، و لا راح يوسخ ملابسكم، جربوها قبل على ملابس مو مهتمين فيها كثير، لأنه ما أبغى أكون سبب لخراب لبس تحبينه، بعدين تقولين أنا السبب D:.

A Collection for Hipsters

2011-09-12T19:30:00.000+03:00

أمس نفس قبل أمس كان يوم مزحوم بجدول عروض نيويورك، أكثر عرض أعجبني مو جيل ساندير نايفي (أول مرة أشوف عرض لهم، أو لوك بوك)، لكن حسيت فيه شيء جديد و شاب، شيء مع إني أكره المدارس، و الدراسة، بس شيء فيه روح أو إذا ممكن أسميه أناقة مدرسة.

يمكن هبيستير شيك أو سكول شيك مو الستايل اللي أحبه، ما يعني أني ما أقدره أو أكرهه، لكن مو الشيء اللي أرتاح له، و لا أحسه أصلا مريح، لكن مع هذا العرض عجبني مرة، عجبني كيف دخلت الألوان الميتاليك (المعدنية)، على ملابس بألوان باهتة، القصات حلوة خصوصا بالقميص الأول (الصف الأول من اليسار)، أكثر شيء حبيته كيف دخل القميص على الفستان الأخير (الصف الثاني يمين). من الأشياء اللي حبيتها بعد، الشنطة الجلد الصغيرة (كأنها شنطة كاميرا) بالصف الأول يمين.

فيه شيء أعجبكم من العرض؟ تحبون ستايل الهبيستير، أو تكرهونه أو ما تفرق معاكم؟

The New Star in NYFW

2011-09-11T12:51:00.000+03:00

أمس كان فيه تخمة عروض، إلى الآن ما شيكت إلا على برابل قرونق. من موسمين (الخريف 2011 و ريزورت 2012) و أنا صايرة أحب كثير من ملابسة، علشان كذا كنت حاطه ببالي أن عرضه الموسم هذا بيكون من العروض اللي أهتم أشوفها بنيويورك (مو يعني أروح له صدق)، بس أنتظره، و لا أمر على صور العرض مرور الكرام.

العرض ما خيب ظني كان حلو مرة، كله طبعات، حسيت فيه خيال علمي، ألوانه تتدرج من البنفسجي للأزرق المخضر (تيفاني) (الأزرق بكل درجاته، بيكون لون مهم بملابس الصيف). كثير فساتين و قطع أعجبتني، أخترت منها كثير و دخلته قائمتي للملابس اللي أتوقع إنها تلبس (أدري للمرة المليون أقول لكم لو بغيتوا تشوفونها تلقونها على القائمة اللي على جنب) (هنا تلقون العرض كامل).

المفاجأة بالنسبة لي كانت لما شيكت على إيميلي و لقيت هذا الإيميل من موقع مودا أوبراندي، اللي قلت لكم عنه قبل، يبيع الملابس قبل لا تعرض بالسوق، يعني بأقل من 24 ساعة كان فيه بعض القطع معروضة للبيع، بأسعار أصلا ما اجرأ أنطقها P: يعني واحد من الفساتين اللي دخلته القائمة، لقيتهم يبيعونه بـ 6600 دولار، تقريبا بـ 24,000 ريال ؟!!.

The Olsen Impact

2011-09-10T21:48:00.000+03:00

كان أمس عرض ماركة ذا رو حقت بنات أولسين، ما أعجبتني قوة زي مجموعة الخريف. لكن بعرض ماركة ثانية "ريبكا تايلور" لاحظت شيء بالعرض، و تذكرت قبل يمكن شهر أو شهرين، شفت هذي صورة لآشلي أولسين بالمطار.

غير النظارت البرادا، و الشنطة اللي من ماركتهم "ذا رو" ما فيه شيء مميز باللبس، أسودXأسود. لكن انتبهت للعقد اللي لابسته آشلي. هذي مو أول مرة تلبس هذا العقد اللولو، لكن أول مرة أشوفها لابسته بالطريقة هذي (كروس بودي). أعجبتني الحركة مرة، صحيح ما عندي عقد لولو طويل، و لا أفكر أشتري بس علشاني شفت هذي الصورة، لكن لو شفت قدامي عقد لولو أو أي عقد بأي فصوص أو حتى تكون يليلته واضحة و طويل، أكيد راح أجرب إني ألبسه بالطريقة هذي، خصوصا لو كنت لابسة ملابس سادة ما فيها، و لا عليها أي شيء.

زي ما قلت لكم ما أعجبني عرض The Row مرة، هذي المرة، لكن بعرض ريبكا تايلور، و اللي كان عادي بالنسبة لي (أساسا ما أنتظرت شيء مميز منهم :) كانوا بعض العارضات لابسين العقد بنفس الطريقة اللي لابستها آشلي (قولوا لي لو كنت مخطئة) بس ما قد شفت أحد لابس العقد بالشكل هذا قبل، فأقدر أقول أنه شيء أخترعته آشلي :).

زي ما قلت لكم أول ما شفت العقود بعرض ريبكا تايلور، تذكرت آشلي أولسين، و لما شفتها بالعرض ما قل إعجابي بالفكرة، بالعكس حبيت إنا أعطت شكل للملابس خصوصا الأولين من اليسار، أحسها أفضل لما ما يكون في نقشات و خرابيط كثيرة على الملابس.

أنتم شرايكم بالحركة؟

تحديث:
جاني هذا الرد بتمبلر، فأتراجع عن أنه آشلي هي اللي أخترعته :)، يمكن آشلي ذكرت ريبكا تايلور، بس زي ما قالت indooo إنها كانت تشوف هذا الشيء كثير :)

NRCL Updates

2011-09-10T13:02:00.000+03:00

قبل فترة مع عروض الأوت كتو، سويت قائمة للملابس اللي أتوقع إنها تنلبس من عروض الأوت كتو خريف 2011، زي ما قلت لكم وقتها، هذا الشيء أسويه كل سنة، بس ما كنت أوريه أحد، و علشان لما يلبس أحد فستان، و أقول لكم كن متوقعة ما أطلع كذابة P:.

المهم تقريبا إلى حد الآن انلبس 10 بالمية من الفساتين اللي بالقائمة حقتي، و المريح (لي طبعا) أنه أساسا ما أنلبس كثير من عروض الأوت كتو لحد الآن.

هذي صورة للقائمة و الفساتين اللي انلبست لحد الآن، (تقدرون تشيكون على القائمة، و تشوفون مين لبسها وصورهم بتعليق تحت الفساتين اللي انلبست هنا، أو من القائمة الجانبية). راح أترك صور الفساتين اللي انلبست يومين، ثم إن شاء الله باحذفها، علشان ما يكون الألبوم كبير مرة، خصوصا أن جاية ملابس عروض ربيع 2012.

زي ما قلت لكم تقدرون تناظرون ملابس أوت كتو خريف 2011 و بعد ملابس ربيع 2012 فلا تنسون تشيكون كل يوم، لأنه كل يوم راح أضيف إن شاء الله.

Unending Wedding Season

2011-09-09T14:11:00.000+03:00

السنة هذي من الربيع إلى قبل أسبوع و العالم زواج ورا زواج، ما أقصد الناس العادية اللي أعرفهم، لكن المشاهير، من نيكول ريتشي، ريس ويذيرسبون و ليم و كايت (أعرف طفشتوا منهم) إلى كايت موس. القائمة طويلة، لكن اختصرتهم بهذولا، لأنه مو هذي هي الفكرة. زي ما قلت لكم بدأ أسبوع الموضة بنيويورك، و الشيء اللي أحبه بنيويورك، أنه تقريبا كل سنة أشوف اسم جديد طالع، و هذي المرة قبل لا يبدون الكبار يعرضون، شفت هذا العرض، لماركة أول مرة أسمع فيها اسمها: إميتاشين أوف كرايست.

العرض كان على شكل زواج، أو هو زواج خلته المصممة عرض، ما أعرف بس أرجح الفكرة الأولى، أنه العرض على شكل زواج، المهم العرض أو الزواج كان كله ملابس من العشرينات فترة الجاز و فساتين الفلابير، كثير فساتين حبيتها من العرض، بس أكثر شيء حبيته، أنه الفساتين اللي كانت بالعرض، مو بس تصميمها قديم، هي كأنها فينتاج، شيء تبغين تسرقينه على طول، لو شفتيه قدامك.

الزواج بطابع قديم كان شكله الموضة هذا الصيف من زواج ليلي آلين، و زواج وحدة إسبانية اكتشفتها بالصدفة (شكلها بالزواج مرة حلو) و آخر شيء كايت موس، تلقون صورها هنا عد فوق.

زي ما قلت لكم العرض/الزواج كان كله فلابير، مو شيء جديد، بس فيه أناقة، و حس قديم مرة حلو، أعجبتني فساتين كثيرة، لكن أكثر واحد حبيته، و هو اللي بيخليني مجرمة و أسرق الفستان الثاني من اليسار، الموجود بالصورة الأولى من اليسار (هم عارضتين وحدة سوداء، و وحدة بيضاء، اللي على البيضاء هو اللي عاجبني.

هنا شيكوا على باقي المجموعة، و قولوا لي رايكم بالعرض، و بهذي النوعية من الفساتين (اللي شكلها فينتاج)؟.

A perfume commercial or a tribute to John Galliano?

2011-09-08T16:21:00.002+03:00

أولا، لازم أقول لكم أنه تقريبا كل الأشياء لديور جدور يخليني ما أهتم بإعلاناته، و أنا أحب كثير أشوف إعلانات الفاشن، و خصوصا العطورات، لأنها بالنسبة لي كأنها فيلم، مو بس دعاية. طبعا ليه ما أحب دعايات جدور، لأني ما أحب ريحته، و لا أحب شارليز ثيرون (اللي هي وجه للعطر). لكن قبل يومين شفت هذا الإعلان الجديد للعطر، و بصراحة أنا ما شفت شيء له علاقة بالعطر، كل اللي شفته إن ديور واضح أنه داقينها ندامه على فصل جون قوليانو :)

بالإعلان ما أعرف كيف (الله يخلي التقنية) دخلوا قريس كيللي، مارلينه ديتريش و مارلين مونرو للإعلان، لكن الأكثر إثارة، أنهم لبسوهم ملابس من تصميم ديور جون قوليانو (كلهم ماتوا قبل قوليانو).

مو بس هذولي الثلاثة لابسات من جون قوليانو، كل السيت تقريبا، يعني كل العارضات اللي مشاركات بالإعلان.

قبل فترة كنا نتناقش أنا و أختي بخصوص ديور اللي إلى الآن عجزوا يلقون لهم مصمم يجي بدال قوليانو اللي فصلوه بعد ما قال أنه يحب هتلر، عرضوا الوظيفة علي تاسشي (مصمم جيفنشي) و على عز الدين عاليا، و فيه كلام أنه عرضت على مارك جايكوب، بس إلى الآن ما أعلنوا مين بيكون مصمم ديور الجديد (ما بقى إلا إسبوعين تقريبا على أسبوع الموضة بباريس). أرجع لكم لنقاشي أنا و أختي عن الموضوع، صحيح كلام قوليانو تافه، و هتلر مجرم، بس أظن أنه كان المفروض بس يخلونه يعتذر على العلن، و تنتهي المشكلة، بدل ما يجلسون كذا متورطين.

المهم جلست يومين أدور على كل الفساتين من أي مجموعة، بس بقى فيستان قرايس كيللي و شارليز إلى الآن ما حصلتهم، (لو تعرفون قولوا لي).

مجموعة أوت كتو خريف 2008

الفستان الأصفر يطلع على عارضة بمنتصف الإعلان، الجاكيت هذا، هو اللي لابسته مارلينه ديتريش و هي جالسة على الكرسي، و تناظر تشارليز ثيرون.

باللوك نفسه مارلينه لابسة شيء لماع من العرض نفسه و قبعة زي اللي بعرض أوت كتو ربيع 2010، من دون الشبكة.

مجموعة أوت كتو خريف 2009

كل الخمسة فساتين أو بحالة الصورة الأولى اللي من اليسار، كلها لبستها عارضات بمقاطع مختلفة من الإعلان، أول واحد فيهم، هو الأول من اليمين، اللي أول ما تدخل شارليز للباكستايج.

الفستان الأخير، من من مجموعة أوت كتو، كان فستان من مجموعة بري فول (قبل الخريف) 2010، الفستان هو اللي تطلع لابسته مارلين مونرو لما تشوف العطر.

الشيء اللي ودي أقوله، صح ما قد كنت معجبة بديور، أو بفساتين ديور (يمكن كنت أحب تصماميم قوليانو لماركته جون قوليانو أكثر)، لكن بعد اللي شفته بعرض خريف 2011 أوت كتو، يخليني لازم أعترف أن جون، حتى لو ما كنت أحبه، و لا يعجبني عبقري، على الأقل كان قادر يطلع مجموعات، مو أجلس ساعة أشوف صورها أحاول أطلع فيها شيء محترم، أو مثير، أو ممكن أتخيله ينلبس. يعني من الآخر، يا عالم رجعوا جون لديور.

Last Days of Summer

2011-09-08T13:21:00.000+03:00

بدأت أسابيع الموضة لربيع و صيف 2012، زي دايم نيويورك، لندن، ميلانو و باريس ... إن شاء الله راح يكون فيه كلام كثير عن العروض، و أشياء ثانية تجي دايم مع العروض، يعني حفلات، أو سرتيت ستايل للي حاضرين للعروض، أو حتى أي شيء مهم ماله علاقة بالعروض. قبل ما ندخل للعروض، شفت هذي الصورة لداكوتا فانينق قبل يومين و حبيت شكلها فيه، بغض النظر عن تعابير وجهها بهذي الصورة، بالنسبة لي هذي أحسن صورة تطلع اللوك حقها كامل.

Heavy Accessorizing by alorwa featuring a gold plated necklace

Acne cap sleeve t shirt, $120
Skirt, ¥21,000
Marc by Marc Jacobs lace up booties, $350
Cath Kidston flower handbag, $124
Yves Saint Laurent gold plated necklace, $1,595
Yves saint laurent sunglasses, $275

زي دايم كل الأشياء موجودة تحت الصورة، لو أعجبكم شيء منها، لما شفت الشنطة/ الكيسة الفلورال اللي مع داكوتا خلتني أحب اللوك على طول، ما توقعت إلى الآن باحب الفلورال، بس يمكن أكثر شيء عجبني، أنه ملابسها (التنورة و التي) كلها سادة، بعدين أختارت شنطة فلورال.

باللوك الأصلي داكوتا لابسة عقد بسلسال طويل، و تعليقة مو كبيرة مرة، لكن أنا بغيت شيء أكبر ، و أوضح، و اخترتهذا العقد من إيف سان لوغان، اللي على شكل سلسلة، خصوصا و إني حابة هذي الفترة المجوهرات اللي على شكل سلسلة (أساور و عقود).

نفس الشيء النظارات هذي اللي شكلها "عيون البسة" (كذا يسمونها، طبعا بعد الترجمة:) كانت عاجبتني من فترة طويلة، و لقيتها فرصة إني أدخلها للوك، خوصا و إني أحس إن التصميم هذا فيه رقي، ما أعرف ليه بس كذا دائما أحسه.

آخر شيء أخترت هذا البوت، لأنه بخاطري من زمان شيء بناتي مرة، أدخل عليه بوت بدبابيس، و حبال.

وش رايكم بداكوتا و باللوك الثاني اللي سويته؟

Nude Gowns

2011-09-05T12:21:00.000+03:00

الجمعة اللي فاتت بدأ مهرجان فانيسيا (البندقية) السينمائي، من زمااان أحب هذا المهرجان، و لما كنت أحب كل شيء إيطالي كنت مقهورة أنه الناس تهتم بكان، مع أنه مهرجان فانيسيا أقدم منه أو حتى أقدم مهرجان سينمائي موجود بالعالم :). المهم المهرجان بدأ، و يمكن أكثر شيء فرحني أنه بدأت فساتين من قائمتي للفساتين اللي توقعت إنها تنلبس من عروض أوت كتو خريف 2011 يشخط عليها من القائمة، لأنه أنلبست صدق :) (شيكوا على القائمة هنا).

أهم شيء أنتبهت له أنه الفساتين النود، لحد الآن هي المسيطرة على المهرجان، و أغلبها حلوة مرة.

أول من بدأ لبس الفساتين النود أو اللحمي بالمهرجان هي ديان كروقر بفستان من إيلي صعب (شوفوه بالقائمة اللي توقعتها) لكن ما عجبني التعديل اللي عدلته على الفستان.

بعد يومين طلعت كيرا نايتلي بعد بفستان توقعت أنه يلبس من فالنتينو، عجبني الفستان كثير، صحيح فيه كثير ما أعجبهم، بس أنا أعجبني كثير من العرض، و السبب اللي خلى هذولا الناس ما يحبون الفستان، هو السبب اللي خلاني أحبه، يقولون أنه محافظ بزيادة (لأنه طويل و أكمامه طويلة)، لكن أنا من زمان تعجبني هذي النوعية من الفساتين، و الأهم أنه مغطي جسم كيرا (ما أحب نحفها الزياد، ينرفزني).

اليوم اللي بعده جت قوينث بالترو بفستان من برادا، الفستان كان مرة حلو، كثير حسبوه فالنتينو، لكن طلع برادا، اللي عجبني بالثنتين (كيرا و قوينث) أنهم مطقمين الإكسسوار مع الفستان (الجزم، و الكلتش) ما أعرف كيف طلعت معاهم حلوة و راقية مو شغل بربسة، بس أعجبني (ما أتوقع أسويه، بس حلو).

أمس بالمهرجان طلعت جيسيكا تشاستين بشكل مرة حلو، بعد بفستان نود من مجموعة إيلي صعب أوت كتو الأخيرة، الفستان كان حلو، المجموهرات اللي لابستهم معاه حلوات (حتى قوينث)، مكياجها، تقريبا كل شيء أعجبني باللوك حقها، و لأني حبيته مره، و لأن إيلي صعب يستاهل أنه يمدح على شغله (اللي ما عمره أبدا صار شين على أي أحد) كان لازم تشوفونه من زوايا مختلفة (تلقون صور ثانية هنا).

شرايكم بالفساتين (اللحمية/النود)؟

Cheap

2011-08-30T16:18:00.003+03:00

أعرف أنه على الأغلب ماراح تقرون هذي التدوينة، لأنكم منشغلين بالعزايم اليوم، أو أنكم نايمين :) لكن اليوم شفت هذا الاقتباس بتمبلر لكارل لاقرفيلد (مصمم شانيل). و على طول ربطته بصورة لمدونة إمريكية شفتها قبل أيام.

Never use the word “cheap”. Today everybody can look chic in inexpensive clothes (the rich buy them too). There is good clothing design on every level today.
- Karl Lagerfeld

لا تقولون أبدا عن شيء أنه "رخيص". الوقت هذا كل الناس تقدر تكون أنيقة بملابس مو غالية (حتى الأغنياء يشترونها). فيه تصاميم حلوة بكل الأسعار.

زي ما قلت لكم أول ما قريت الكلام فكرت بهانلي موستابارتا (إذا كان كذا إسمها ينطق :)، البنت هذي أول مرة شفتها بـ lookbook.nu بعد فترة صرت أشوفها بأمكان كثيرة و حتى مواقع الأزياء، بس البنت تستاهل و تلبس لبس مرة حلو، هنا مدونتها، و هنا اللوك بوك حقها.

هانلي (زي ما قلت لكم مو متأكدة كذا ينطق اسمها) مصورة بالمالديف على البحر (المحيط) طالع شكلها مرة حلو، هانلي لابسة من ماركات كلها متوسطة، أو اللي يسمونها (هاي ستريت)، يمكن أغلى شيء نظاراتها، و النظارات مو مشكلة، أكثر ما حط ربي بهذا العالم هي النظارات.

هانلي لابسة جمب سوت بيضاء (زي كثير من ملابس الصيف هذي السنة) من H&M. و معها شنطة كأنها خيش مو متأكدة مقلمة أزرق و أبيض (تعرفون إني أحس هذي اللونين لون البحر)، من مانقو، و بعدين مدخلة ألوان بأساورها النيون من توب شوب.

كل شيء بهذا اللوك عاجبني، و أهم شيء عاجبني أنه أكيد ما فيه شيء راح يتعدى 500 ريال (على الأغلب).

آخر شيء إن شاء الله تكونون مبسوطين، و كل عام و أنتم بخير و راضين عن أشكالكم، و ملابسكم و شخصياتكم :)

MTV VMAs: Best Dressed

2011-08-29T16:49:00.000+03:00

أمس أو اليوم الفجر، كانت فيه وحدة من ملايين حفلات توزيع الجوائز، اللي تصير بأمريكا، اختصارا لكل رأيي بالموضوع، سلينا قوميز لبست من جوليان ماكدونالد و ضيقت صدري، لأنه لو تتذكرون كنت حابة الكوليكشين هذا مرة، و من الآخر، الملابس فيه ما تنفع لها، عي مصنوعة لوحدة أكثر "كلاسية" منها :). كاتي بيري طلعت بشعرها الوردي و أعجبني مرة، ما أعرف ليه بس أحس إنها حلاوة أو عروسة.

بالنسبة لي أحسن من لبس كان بيونسية، حتى لو كان لبسها أكثر آناقة أو فخامة من الحفلة نفسه. بشكل عام أحب لما أشوف وحده حامل عارفة وش تلبس و طالعة حلوة. بيونسية كانت لابسة برتقالي من لانفان مجموعة الخريف 2011. أعجبتني المجوهرات اللي لابستهم معاه، الحلق الطويل، و الخاتم الأخضر، أضافوا للبس كثير، شعرها و هي مسرحته على جنب بعد كان مناسب مع شكل الفستان، و أهم شيء إنها حاطة شعرها على الجنب الثاني، مو على الجنب اللي طالع فيه الكتف (ما أفهم ليه بعض الناس يلبسون "ون شولدير" و يغطون أكتافهم بالشعر)، يعني من الأساس لا تلبسين شيء يكشف الكتف.

Girls Join the Army

2011-08-25T14:26:00.003+03:00

ما أعرف إذا قد تكلمت عن هذا الموقع، أو لا (أشك إني تكلمت قبل)، بس أختي تحبه مره، Urban Outfitter عنده ملابس نسائية و رجالية و أشياء غير الملابس حلوة، و كثير مرات يكون سعرها معقول.

أخواتي بشكل عام عندهم سلوك، أنا ما أسويه، هو التسوق الوهمي. يدخلون الموقع، و يحطون أشياء بالعربية حقت الموقع، و هم ما راح يشترون شيء، بس كذا، يمكنه نوع من إدخال البهجة و السرور. المهم ورتني أختي أشياء من سلتها أو عربيتها عندهم، و شفت هذا الجاكيت الجيشي.

أول شيء خطر ببالي: آه هذا هو الجاكيت اللي كانت لابسته هانا قابي قبل فترة، اللي خلاني أفكر كذا، إنها مصورة معاهم حملة الخريف (ممكن تلقون صورها بالموقع). (بس ما صار هو) :) هذا الشيء ما منعني أني أسوي سيت عن اللوك حقها.

Army by alorwa featuring spiked shoes

Madewell wrap top, $68
Zoe karssen scoop neck t shirt, $105
Halston Heritage georgette skirt, $370
Christian Louboutin spiked shoes, $1,195

ما راح أتكلم عن اللوك كثير، لأن كل شيء قدامكم. بس قبل لازم أتكلم عن هانا و ستريت ستايل، هانا من أكثر العارضات اللي أحب أشوف ستريت ستايل حقها، صحيح أنا أحب أشوف ستريت ستايل لكل العالم، لأنه شيء مختلف عن المجلات و العروض، لأنه ناس طبيعية، زي و زيك هم اللي أختاروا ملابسهم. قلت لكم أحب أشوف هانا، تحب تلعب بالقطع كثير، تغير كثير، يعني مالها ستايل معين، لكن دائما بتشوفون عندها شيء حلو.

أرجع للبس من جديد، ما بغيت أنسخ لبس هانا بالضبط (مع أنه حلو) بس بغيت آخذ الفكرة (خصوصا الجاكيت)، و أخترت له ألوان فاقعة أكثر، هانا واضح أنه كانت تبغى تحول اللوك من جيش لرومانس، مع هذي الألوان، لكني بغيت بس أخليه بناتي، و الألوان فيها حياة أكثر، فأخترت التنورة اللي من هولستون، الجزمة عليها دبابيس من كريستيان لوبتين و التي عليه هذا الهايكل العظمي (بس شكله لطيف:) فعاطي شوي "لمسة" روك على اللوك، بغيت لون ثاني قوي غير الفوشيا فدخلت هذا الكارديقان اللأخضر النيون من مادويل، و فكرتي أنه بس يلبس تحت الجاكيت من دون ما يسكر، يعني يطلع منه شوي من تحت الجاكيت، ما أعرف كيف آصفه بس يخلي فيه شوي علاقة بين الجاكيت الجيشي و باقي اللوك، و بنفس الوقت، ينعشه.

PP: Printed Pants

2011-08-23T21:24:00.000+03:00

من أهم موضات الخريف الجاي، اللي انتبهت لها كانت البناطيل المنقشة، الشيء هذا كان عاجبني من فترة، حتى أنه زارا كان عندهم بنطلون حرير مطبع عليه، فيه منه برتقالي و أخضر، كان عاجبني مرة، دورت بكل فرع أقدر أروح له علشان ألقى مقاسي، و يوم أخيرا لقيته و شريته ما أعجبني شكله علي، و رجعته، بس إلى الآن عاجبتني الفكرة.

زي ما قلت لكم البناطيل المنقش عليها أو المطبع عليها كانت بعروض كثيرة، علشان كذا سويت من نفسي تقسيمات لها، على حسب شكل النقشات اللي عليها.

(يسار: دولتشي آن قابانا، بروينزا سكولير، فيرسيس). أعتقد أنه النجوم مع مجموعة دولتشي آن قابانا للخريف هذا، صارت بكل مكان، حتى كان فيه أكثر من محل هاي ستريت (زارا مثال) كان عندهم شيء عليه نجمات. بروينزا سكولير عرضهم كان مليان بالنقشات الهندية الحمراء، و اللي كلها أشكال هندسية، و هذا البنطلون واحد من بناطيل كثيرة بالعرض كان عليه هذي النفشات. بنطلون فيرسيس (يمين) عاجبني مرة، يمكن من زكثر الأنواع اللي عجبتني من هذي البناطيل هي البناطيل اللي قماشها واقف (كأنه تافتا)، و فيه أشياء تلمع.

المجموعة هذي هي مجموعة البناطيل بنقشات الورود (يسار: جيل ساندير، ماري كاترنتزو و روشا). بالنسبة لي أشوف أنه الورود بكل وقت تفتح النفس، مو لازم تكون ملابس الربيع أو الصيف، أعجبتني الورود مع الألوان الغامقة (جيل ساندير و روشا)، بعد أعجبني مرة البنطلون اللي من ماري كاترنتزو على أنه ألوانه فاتحة، لكن لون الورود و قماشة، تمشي مرة مع ألوان الشتاء.

المجموعة الأخيرة ما أعرف نقشاتها تدخل تحت أي تصنيف، علشان كذا حطيتها بمجموعة وحدة :). (اليسار: إيرديم، روبيرتو كافلالي و جان بول قوتييه).

ما عندي تعليق على المجموعة هذي بشكل خاص، بس حلو إننا نشوف بناطيل منقشة، بكل الألوان، بكل النقشات، و الأهم أنه قصات و موديلات البناطيل تختلف كثير، يعني اللي ما يصلح لها أو ما تحب قصة بنطلون أو نوعية بنطلون معينة، بتلقى خيارات ثانية، لو كانت تدور على بنطلون منقش.

لا تنسون، دائما، تقدرون تضغظون على الصور، و تشوفونها بحجم أكبر، و أهم شيء أي تعليق، أكيد أنا مهتمة إني أسمعه، زي دايم وش رايكم بالبناطيل المنقشة، فكرتوا فيها أو عندكم، أو الحين تفكرون فيها؟

Think Pink, and Other Colors

2011-08-19T09:56:00.001+03:00

أعرف ما أمداني تكلمت عن الشعر الوردي يمكن بداية رمضان، لما طلعت صورة لكاتي بيري بشعر وردي (ولا طلعت لها صورة بعدها). من بداية هذا الشهر رمضان / أغسطس و أكثر من وحدة من السلبرتي طلعوا بشعر ملون. كايت بوسورث بأطراف زرقاء و بعدين دايانا أقرون (حقت قلي) بشعر وردي بعد. كل الثنتين قالوا الناس عنهم إنهم صبغوا علشان أدوار راح يمثلونها بالفترة الجاية، ما يهمني إن كانوا صبغوا علشان شيء راح يمثلونه أو لا، لأني أحب الشعر الملون و أشوف أنه يدخل البهجة على قلبي :).

بهذي المناسبة تذكرت إيدتوريال مو جديد، بس حبيته، و كنت أدور له مناسبة علشان أكتب عنه و أحطه لكم، الإيدتوريال من مجلة جيليس و العارضة فيه هي شارلوت فري.

شارلوت عارضة أمريكية (تقريبا جديدة)، بس أهم شيء فيها إنها صابغة شعرها وردي، يعني من طلعت هذي السنة و شعرها وردي، بالمعروض و بكل مكان، يعني مو بس لهذا الإيد.

اللي كان عاجبني بهذا الإيدتوريال أنهم أستخدموا شعرها علشان يخدم الصور، عاجبني فيه جو السيرك (قبعة كبيرة، بناطيل مقلمة) و أهم شيء شعر شارلوت الوردي.

من ناحية الملابس و تنسيقها بالنسبة لي ما فيه شيء مميز مرة، بس تعرفون الصور بهذا الإيديتوريال من نوعية الصور اللي البنات يحبون يحطونها بأي مكان يستخدمونه (بي بي، ماسنجير، فايس بوك، تمبلر، تويتر) فيعني إذا ما عجبتكم فكرة الشعر الملون، على الأقل تقدرون تسخدمون الصور لأغراض أخرى :)

و علشان تتفرجون على باقي الإيدتوريال، وزي ما قلت لكم إذا ما عجبكم شكل شعرها، تقدرون تستخدمون الصور لشيء ثاني، بس لو حتى الصور ما أعجبتكم، ما عندي لكم حل للمشكلة هذي :)

اللي خلاني أكتب عن هذا الموضوع من جديد، غير أنه زي ما قلت لكم شفت أكثر من سلبرتي صابغة شعرها، لكن بعد لأني شفت بكليرز هذي الخصل الملونة، (إيه أروح لكليرز صح إن عمري أكبر من 15 بس إلى الآن عندهم أحسن ربطات للشعر بألوان كثيرة :).

المهم أنا صراحة ما أعرف كيف ملمس الشيء هذا يعني شعر طبيعي أو لا، شعر إنسان و إلا من وين جاي، بس شكله حلو، و عجبتني ألوانه، و أهم شيء يعطيك فرصة تلونين شعرك، من دون ما تغامرين و تلونينه صدق. خصوصا أنه (على الأقل من وجهة نظري) الشعر الملون صعب يطلع حلو بالمناسبات الرسمية (يعني زواجات، ملكة زوارة) أو ما شابه، لكنها بتطلع حلوة مرة لحفلات ثانية (خصوصا العيد جاي).

آخر شيء بس بغيت أعلمكم عن سعرها، سعر الخصلة الوحدة بـ 33 ريال أو ما يعادلها من العملات الأخرى :).

شرايكم بالإيديتوريال؟ و ممكن تستخدمون هذي الخصل من كليرز، و إن كنتوا استخدمتوها كيف لقيتوها؟

Celebration

2011-08-11T13:27:00.005+03:00

ودي أحتفل معاكم بلحظة مهمة لي و لهذي المدونة. تقريبا من حوالي سنة، و أكثر كلمات البحث اللي تجيني كانت تدور على صور رانيا العبدالله بالمايوه أو البكيني. الحقيقة إني ما شفت الصورة، و لا أعرف إذا هي موجودة أو لا أصلا، و أصلا لا يهمني إني أشوف رانيا العبدالله بمايوه أو بأي شيء ثاني لأنه ما يهمني ستايلها من الأساس. لو كنت راح أختار وحدة من زوجات حكام العرب علشان أتابع ستايلها بتكون موزة المسند، موزة تلبس بشكل جدا جدا جدا أنيق، جدا لائق و الأهم أنه جدا غالي P: و بالمناسبة ترى موزة المسند ما جت لزواج وليم وكايت للي يدورن على صورها، و إن كان قصدكم الصورة اللي يلبسها حمد الجزمة، هذي الصورة كانت بإسبانيا قبل أسبوع من الزواج تقريبا، فيعني لا تدورن على صورها بالزواج. (و ترى رانيا بعد ما جت).

المهم أقولكم أنه سنة و الناس تدور على صور رانيا بالمايوه، و أقدر أقول إني متأكدة أنهم مالقوا أي شيء له علاقة بالموضوع بهذي المدونة، للحق الموضوع كان يضايقني، تعرفون لما أختك أو أي أحد يجي يسألك مثلا عن تي شيرت وينه عشر مرات، و كل مرة يوضح لهم أنه مو عندك، كذا كنت أحس، خصوصا أنه ما عندي نية، لا أدور على الصورة (إن كانت موجودة)، و أكيد ما راح أحطها عندي. اليوم لما شيكت على كلمات البحث اللي تآصلني، و أخيرا نزل مايوه رانيا العبدالله، و صار مكانه شيء أكثر أهمية و هو الجاكيت الرسمي.

ما راح أحط لكم هنا جاكيت رسمي علشان نحتفل، لكن راح أحط بيكيني عاجبني مرة :)

ما أعرف ليه البيكيني أو المايوه بأي شكل له، من أكثر الأشياء اللي كنت أدور عليها بالنت من عرفت شيء أسمه شراء من النيت، و مع ذلك إلى الآن ما شريت شيء، كل مرة يتغير رأيي بوشو الشيء اللي أبغاه، أو أأجل الفكرة علشان ببالي شيء ثاني أشوف أنه أهم من بيكيني أو مايوه.

من فترة مره قريبة عرفت هذي الماركة We Are Handsome شفت أغراضهم على نيت أي بورتيه و حبيت أشيائهم اللي مطبوع عليها، خصوصا مع شكلها هذا تصلح تنلبس مع أي شيء مو لازم للبحر أو للمسبح أو جاكوزي. قبل أسبوع تقريبا ريانا لبست منهم واحد مطبوع عليه صورة بوب مارلي (مصمم خصيصا لها) و قبل بعد ريانا و ديان كروقر لبسوا منهم نفس المايوه أسود و عليه وجه جاقوار.

وي آر هاندسوم مو بس يسوون ملابس بحر، يسوون تقريبا كل شيء ضيق، ليقنقز، بودي سويت و توبز كلها مطبع عليها، بس نيت أي بورتيه ما يبيع الآن إلا ملابس البحر.

لو تبغون تهدونها لي علشان أحتفل صدق، ترى ما عندي مانع، و لا تحسبون أنكم ملزومين بس باللي أخترته فوق، أي شيء يجي منكم بيكون حلو P:

Actresses Love Express Striped Dress

2011-08-10T14:10:00.001+03:00

بعض الملابس ما أقدر أقول أمها داعية لها، لأنها مالها أم، بس تلقى حظ كبير خصوصا بين السلبرتيز. قبل أسبوع أو أكثر شفت فستان مقلم أحمر و أزرق على جانواري جونز. ما همني الفستان، مع إني أحب الملابس المقلمة خصوصا في الصيف، بس ما عجبتني قوة ألوانه، بهذا الأسبوع شفت الفستان نفسه على 3 ممثلات غير جانواري حونز.

الفستان عرفت بعدين أنه من إكسبريس تقريبا بـ 187 ريال، ما أعرف موجود بمحلات إكسبريس عندنا أو لا، بس لما دخلت الموقع لقيت منه أسود و أبيض (ما أنتبهت إذا فيه أحد لبس اللون هذا أو لا).

المهم زي ما قلت لكم بعد ما شفته على جانواري جونز (الحامل)، شفته على أماندا سيفيرد، زوي سالدانا و إيمي روسم. من بين الأربعة أعجبني أكثر شيء على زوي، خصوصا أنها لبست معاه هذا الحزام التان النحيف، بالعموم ما يعجبني لما زوي تضيف الحزام على الفساتين اللي تلبسها (سوتها أكثر من مرة) لكن مع هذا عجبني كثير، حسيته أعطى شكل للفستان، إيمي روسم لبست معاه قبعة، جانواري جونز لبست نظارات بإطار أحمر، و شباشب ما أعجبني شكلها، أما أماندا فاتركته زي ما هو مع نظارات وايفارر سوداء و بعد شباشب سوداء.

ما فيه وحدة بالنسبة لي كان شكلها مو حلو، بس زي ما قلت لكم، أنا حبيت الفستان على زوي أكثر شيء.

شرايكم بالفستان، أو الفساتين المقلمة كامل؟. و على مين أعجبكم أكثر؟

Bloody Red

2011-08-09T12:55:00.000+03:00

أكثر المكياج بعروض خريف 2011 كان هادي، و مايل للطبيعي، حبيت اللوك هذا كثير، لكن ما أعتقد أنه ما راح نشوف إلا هذي الألوان (الطبيعية و المحايدة) على الخريف و الشتاء اللي جايين.

تكلمت لكم قبل عن مجموعة الريزورت حقت ريتشل زو، و قلت لكم إنها تقريبا مجموعتها الأولى، اللي خلاني أقول تقريبا، إنها قبل هذي المجموعة طلعت مجموعة (بعد أسابيع الموضة بمدة) لخريف 2011، ما عجبتني المجموعة كثير، بس الشيء اللي حبيته فيها هو لون الروج.

الستايلست أختارت اللون العنابي الغامق هذا للموديلز حقاتها، من فترة طويلة الدرجة هذي من الروج موجودة (كانت منتشرة بالتسعينات)، و من سنة تقريبا و أنا أشوفه على بعض المشاهير مثل آشلي أولسين هنا.

رغم إني أشوف أنه لون حلو لمكياج الشتاء، إلا أنه بعض السلبرتي مثل فريدا بينتو و روز بيرن طلعوا ببريمرات هذا الصيف حاطات هذا الروج. اللي يخليني أنبسط أنه هذي الدرجة لسا موجودة و الناس يحطونها، هي إنها تنفع على تقريبا كل درجات البشرة، زي ما تشوفون بصور عارضات ريتشيل زو، و صور السلبرتي اللي وريتكم إياها.

بالشتاء اللي فات كنت أدور على هذي الدرجة من الروج، ما لقيته عند أغلب الماركات الكبيرة للي تبيع منتجات التجميل حقتها عندنا، لكن و أنا أدور بستاند رافيلون بأرواجهم لقيت هذا الروج، درجته أعجبتني، و لا فيه لمعة (ما أحب لمعة القلوس أبدا، أحسها سعابيل) :) و أهم شيء أنه ثابت على الشفايف، مو على طول يروح لونه من أول ما يلمس شفايفك شيء.

صراحة ما كنت عارفة أنه فيه أحد مهتم باللون هذا، بس لقيت أكثر من بحث عندي يسأل عن هذا الروج، الأول: "مين تعرف لون روج عنابي على اسود" أما البحث الثاني فكان بهذي الكلمات: "روج لون الكبده" :)، ما أظن إن اللون يسمى كذا، صح أتذكر إني قد تكلمت عنه و قلت لونه "كبدي" بس اسمه عند رافيلون Garnet-Chrome و رقمه 386. ما لقيت اللون هذا أونلاين بأي موقع مستحضرات تجميل، حتى موقع رافيلون نفسه (قصدي للبيع)، لكن لقيته ينباع على eBay ما أعرف هو الموضوع أنه عليه إقبال برا، و خلص من المحلات، و صاروا الناس يبيعونه على eBay أو إيش، بس أنا شريته من عند فافافوم بالرياض، دوروا عليه بأي ستاند لرافيلون بأي مكان، أعتقد راح تلقونه.

Teen Choice Awards: Best Dressed

2011-08-08T22:51:00.000+03:00

أعرف إني متأخرة، بس كمبيوتري ما كان عندي، أمس كانت جوائز التينز، و كان جاي كثار منهم زوي سالدانا و بلايك لايفلي. لكن أكثر وحدة عجبتني كانت إيما ستون بفستان من مجموعة الريزورت 2012 لديور.

أعرف إن الفستان ما كأنه ديور، و أعرف أنه ممكن لو شفته على أحد ثاني غيرها ما أظن راح أشوف أنه حلو، لكن عجبني كثير خفته عليها، ألوانه مرة مناسبة لبشرتها، خصوصا أنه هو أوف وايت و هي بشرتها مرة فاتحة، و فيه قطع برونزية طالعة حلوة مع لون شعرها. أختيار الجزم مرة حلو، يمكن ألي خلاني أختار هذا الفستان أحسن فستان، علشان أختيارات إيما اللي فاتت، كثير منها كانت حلوة مرة، و إن كان فيه أحد باختاره أحسن واحده لبس لنصف السنة الأخير هذي (لحد الآن) هي إيما ستون.

زي ما قلت لكم اختيارات إيما الفترة هذي كلها (تقريبا) حلوة مرة مرة، بس رجعت للون شعرها الأصلي "الكذبي" (أصلا هي شقراء)، طالع كل لبس مع هذا الشعر الأحمر مرة حلو، من فستان جامبتيستا فالي (يسار)، بعدين هذا الفستان الوردي مع الحلقات الخضراء اللي طالعة تتمشى فيه، و آخر شيء على اليمين الفستان الآتزارو الأسود اللي لبسته لدايفيد ليترمان، و خصوصا مع الكعبات العنابي.

إن كنتوا تابعتوا مين أحسن لبس عندكم؟

Cinderella, you wish if you had one

2011-08-04T11:29:00.002+03:00

ما أعرف كم واحد منكم يعرف إني لما سويت هذي المدونة بصيف 2008 كان لأني شفت فيلم Sex and the City، و كان فيه كلام كثير ودي أقوله عن الملابس، و الفاشن اللي فيه، بس أقول لمين؟ و ما لقيت إلا إني أسوي هذي المدونة. للي كان معاي من ذاك الوقت، أو حصل له فرصة أنه يشوف واحد من المواضيع القديمة، ممكن يتذكر أنه كان فيه كعب نيلي أعجبني مرة، شرته كيري برادشو لنفسها، بذاك الوقت ما أعرف كيف قررت، أو كيف قررت إني سمعت أنه من لوي فيتون، بعد فترة عرفت أنه من ماركة مكانها بريطانيا، مصممها أسباني اسمه مانولو بلينك.

أمس رحت لسنتريا، و لمعلوماتكم المول هذا يريحني نفسيا، بس يكفي إني أدخل مارك جايكوبز، و أقلب ملابسه، بعدين أحول على سلين، ثم بلانسياقا، ثم أشيك على شنطة فيندي، من دون ما أدفع و لا ريال، بعدين على الأغلب إني أرقى فوق آكل شيء من واحد من المطاعم و المقاهي :). المهم أنه أمس و أنا طالعة من الدرج المتحرك شفت محل جديد يتوهج و لما قريت كان مانولو بلينك، بس قررت إني ماراح أدخله إلا بعد ما أتقهوى و أروق :).

طبعا الشيء اللي تشوفونه فوق هذا كل خيالي :) ما أعرف ليه تخيلت نفسي كيري برادشو، بس ما أنلام، لما يجي الموضوع للملابس و الجزم (بالذات) أظن أي بنت بالعالم ودها لو إنها كيري. بعد ما تقهويت زي ما قلت لكم نزلت للبوتيك من جديد، وشفت الجزمة الكلاسيكية حقت مانولو بس اللي شفت كان لونين و لا واحد منهم كان هذا الأزرق، الأول كان فوشيا و الثاني وردي، لكن لقيت من الأزرق فلات و جربته، طبعا لا كان فيه مستر بيق يلبسني و لا أحد، أنا لبست نفسي P: بس وقفت قدام المرايا شفت الجزمة تشع من رجولي، لونها كان حلو، الشيء الكريستال اللي بالجزمة كان حلو، بس مشكلتها الوحيدة إنها فلات P: غير اللون الأزرق هذا كان فيه بعد لون نود بعد بس فلات. لما سألت عن الأسعار كان سعر الكعب على ما أظن 3700 و الفلات 3200 ريال. طبعا طلعت من المحل من دونهم، مو بس لأنهم غاليات، بس لأني ما أحتاجهم و لا عندي أي مناسبة تخليني لو أفكر 10 يالمية فيهم، بس يظلون حلوات.

لما رجعت للبيت كان قدامي جزم فلات مرة حلوات ملبسات قماش فيه لمعة شوي عليه ورود، جابته أختي لي هدية لما جت من السفر، ما أعرف من بازار أو من محل فينتاج أو من وين. بس خطر ببالي إني أحط عليهم شيء من قدام، تذكرت من زمان أمي كان عندها عدد كبييير من الكليبز حقات الجزم، بس زي كثير من أشياء أمي الحلوة ضاع أكثرها بالنقل. رحت أدور على أشياء ممكن تكون حلوة بـ Etsy و لقيت أشياء مرة حلوة، لقيت وحدة تشبه كريستالات مانولو (ماراح أشتريها لي) بس لو خاطركم تحولون وحده من جزمكم لجزم مانولو تلقونها هنا.

Pink Hair II

2011-08-03T01:56:00.003+03:00

من زمااان و أنا أحب الشعر الوردي، صح ما عندي الجرأة إني أصبغ شعري وردي، و يمكن أعطي نفسي عذر بأن شعري غامق و صعب يصير وردي، يعني لازم يسحبون اللون الأسود بالأول علشان يضبط الوردي اللي ببالي، و لا أبغى أخرب شعري بكثر اللعب فيه، طبعا زي ما قلت لكم هذا عذر أحطه لنفسي علشان ما أجرب اللون الوردي.

طبعا لأني أحب الشعر الوردي، أول ما شفت هذي الصورة الجديدة لكاتي بيري بشعر وردي انبسطت مرة، غير إنها اختارت اللون اللي أحبه، أهم شيء بالنسبة لي إنها أخيرا أختارت لون زين (على الأقل اللي أشوفه بهذي الصورة)، و هذا الشيء ما صار من فترة طويلة (إن لون شعرها يصير حلو).

كاتي بيري على أنه أغلب اللي يعرفونها، يعرفونها بشعر أسود، إلا أنه شعرها الطبيعي هو أشقر، بالنسبة لي الأسود عليها أحلى كثير من الأشقر، و هو اللي عاطيها الشكل "الدمية" هذا.

زي ما قلت لكم، بالصيف هذا أعتقد أنه كاتي بيري جربت تصبغ شعرها كل يومين،. من الأسود اللي دايم، للأحمر، و بعدين بس قبل أسبوع ببريمير السنافر كان شعرها أشقر (ما أظنه اللون الطبيعي، لأن اللي شفته لها من زمان كان غير). بصراحة لا الأحمر و لا الأشقر أعجبوني، بس زي ما قلت لكم من الصور اللي شفتها لحد الآن، أحس إني راح أحب عليها الوردي (أتمنى نشوف صور لها ثانية، بهذا الشعر).

الشيء هذا (موضوع لون شعرها اللي زي ما قلت لكم كل شوي متغير) فكرت أحط لكم صور كاتي بيري بكل الآلوان الأربعة، و أترككم تصوتون على لون الشعر اللي حبيتوه أكثر عليها ... قلت لكم قبل أفضل الأسود على الأحمر و الأشقر، لكن أظن أني باحب الوردي، بس ودي أشوفوه عليها وقت أطول، و بمناسبات ثانية، علشان أعرف إذا بجد يستاهل الشعر الوردي كل هذا الهبال مني، أو أنه بيطلع مرة رخيص، و أحاول أقنع نفسي مرة ثانية، إن هذا اللون ما يصلح إلا بصور المجلات و الأفلام :).

زي ما قلت لكم كاتي كان شعرها أسود، ثم مع موجة الشعر الأحمر اللي طاحت فيها هوليوود على بداية الصيف، ثم تحولت للأشقر زي ما قلت لكم قبل أسبوع لبريمير السنافر 3D و اليوم بالوردي. الخيارات حطيتها بالترتيب من الأسود للوردي.

* عفوا غيرت التصويت، لأن الأول ما يظهر النتايج، و لا أقدر أكتب فيه بالعربي

Some Color Needed

2011-07-31T12:23:00.000+03:00

أمس كانت أنجلينا جولي بسراييفو، تحضر ختام مهرجانهم السينمائي، بشكل عام أنجلينا مو مودي، قصدي لبسها، يعني ما أشوف إن لبسها يناسب لا لعمري و لا لذوقي، أظنه مناسب لنساء فوق 35. المهم أنه أنجلينا كانت لابسة فستان مشمشي، أو خوخي أو خربزي من إيلي صعب.

تكلمت عن الفستان هذا قبل سنة تقريبا، أول ما شفته بعرض إيلي لربيع 2011. انبسط كثير لما أشوف فستان حبيته من الرانواي، ينلبس على الريدكاربيت، مو لشيء بس أحس أنه فيه أحد قدر هذي الأشياء زي ما أنا مقدرتها، بس أحد يقدر يدفع قيمتها P:.

بالنسبة لي الفستان مرة مناسب لأنجلينا، و لا عندي مشكلة أنه هي اللي لبسته، خصوصا إن الفستان صعب شوي، و يحتاج وحدة زي أنجلينا لها كاريزما علشان يطلع حلو. عجبني المايك آب، ما عندي مشكلة كبيرة مع شعرها، مع إني أحس أنه يحتاج فاليوم شوي، يعني لو كان فيه شوي وايفز، أو لو حتى على شكله بس ما يكون كذا لاصق.

مشكلتي الوحيدة معه، مع الإكسسوار اللي لابسته معاه، ما أشوف أنجلينا شايلة أي شنط (و هذا بعد مو مهم)، و لا هي لابسة عقد (بعد مو مهم)، لكن أكثر شيء ضايقني من ناحية الإكسسوار أنها ما لبست حلق، بجد تمنيت إنها لابسة حلق، و ببالي حلق لونه أخضر، شيء يشبه هذا. أنجلينا مو غريبة على الحلق الأخضر، أتذكر إنها قبل كم سنة لبست للأوسكار حلق أخضر أظنه يشبه هذا، و أظن بعد مع فستان أسود لإيلي صعب، يعني الموضوع مو صعب، و لا راح يكلفها شيء، بس تقتح دولابها و تطلع الحلق من جديد.

قبل لا أخلص، كثير يسألون وش ممكن يلبسون لون جزم مع فستان خربزي، بالنسبة لي ممكن صندل ذهبي كعب، بيكون أكثر شيء مناسب، أنجلينا لابسة كعب نود، مو شين الاختيار، خصوصا مع فستان طويل زي هذا، بس مع فستان قصير بشكل عام ما أحب النود و خصوصا مع لون زي هذا، لأنه قريب كثير من اللون اللحمي أو النود، فكثير مرات يخليك كأنك حافية، فيطلع شوي "تو متش".

Boots for Summer

2011-07-30T10:07:00.001+03:00

اليوم باكتب عن واحد من الأسئلة اللي تجيني، بعذ سؤال عن يصلح نلبس بالصيف .....؟ هذي المرة: "هل تلبس الأبوات في الصيف". شفت الصورة هذي لكارلي كلوس، و قلت خليني أكتب عن هذا الموضوع، خصوصا إني أشوف لبسها للبوت مرة مناسب للصيف.

بالعموم رأيي بالأبوات بالصيف أخف من لبس المخمل بالصيف بس :)

الصورة من تصوير تيري ريتشاردسون

حطيت بس بالبداية، لأني أساسا مو مرة أميل للأبوات، يمكنها من أكثر أنواع الجزم الي قليل مرة تستهويني، لكن راح أتكلم لكم عن رأيي أنا كيف ممكن تنلبس بالصيف:

لازم ما تكون طويلة، يعني أنكل بوت، و إن كان ما فيه أنكل بوت، على الأقل شيء طوله أقل من نصف الساق. بعد الطول هذا آسفة على الكلمة هذي، بس أحس إني اشم ريحة الرجل :).
الشيء الثاني إذا كنتي بتلبسين بوت، اللبس لازم يكون، صيفي صيفي صيفي، يعني قصير خفيف، إذا ما تحبين، و لا تبغين تلبسين قصير على الأقل التنورة الميدي أو الماكسي تكون صيفية (فلورال، خفيفة، ألوانها فاتحة أو حتى شفافة) أي شيء يحسس العالم أنك مو ميته من الحر.
لا تلبسين البوت مع جلد أو بنطلون جينز، الجد خطأ كبير، بس بنطلون الجينز ممكن يمشي، بس مو كل أنواعه فلا تخاطرين، إلا إذا كنت متأكدة أنه ما راح يعطي شكل أنك (ميته من الحر)، و أكيد أكيد يكون التوب صييييييييفي.
آخر شيء، إذا بخاطرك تلبسين البوت مع الأشياء اللي قلت لك لا تلبسينها معاه، على الأقل أختاري بوت مفتوح من عند الكعب، أو من عند الأصابع، أو يكون البوت نفسه على شكل دانتيل، فيعني الفتحات من كل جهة.

New Look

2011-07-28T10:27:00.000+03:00

اليوم قررت إني أعطى المدونة نيو لوك، صراحة ما كنت أتوقع إني أغير التصميم الأول، بس مع الوقت صار يضايقني قوة مساحة السايد بار، و كيف أنه يضيق على مساحة المكان حق التدوين.

مصدر الصورة

الشيء الثاني اللي خلاني أغير التصميم، هو إن القالب اللي كنت حاطته، ما يدعم الأشياء الجديدة اللي حاطتها بلوقر للمدونات (تلقونها تحت كل تدوينة)، و اللي تسهل فكرة إنك تشارك الموضوع مع ناس ثانين بمواقع التواصل زي فايس بوك، و تويتر.

إن شاء الله عجبكم اللوك الجديد، و لا أعرف كم راح يستمر هذا اللوك، خصوصا أنه التغيير رقم ما أدري كم، بالثلاثة سنوات اللي فاتوا.